អង្គការសហប្រជាជាតិបាននិយាយកាលពីថ្ងៃអង្គារថា ការផលិតនិងជួញដូរគ្រឿងញៀនខុសច្បាប់បានឈានដល់កម្រិតមួយដែលមិនធ្លាប់មានពីមុនមកនៅក្នុងតំបន់មេគង្គរបស់អាស៊ីអាគ្នេយ៍និងនៅអាស៊ីខាងកើត។ អង្គការនេះបានព្រមានថា ការផ្គត់ផ្គង់ច្រើនហួសបានបង្កើនហានិភ័យដល់អ្នកប្រើប្រាស់វ័យក្មេង។
មន្ត្រីនៃការិយាល័យគ្រឿងញៀននិងឧក្រិដ្ឋកម្មរបស់អង្គការសហប្រជាជាតិ (UNODC) បាននិយាយថា ថ្វីបើអាជ្ញាធរបានរឹបអូសគ្រឿងញៀនខុសច្បាប់យ៉ាងច្រើនក៏ដោយ ការផ្គត់ផ្គង់ច្រើនហួសបានជំរុញឲ្យតម្លៃធ្លាក់ចុះហើយនាំមកនូវថ្នាំញៀនជាច្រើនដូចជាមេតំហ្វេតាមីនជាដើម។
តួលេខរបស់អង្គការសហប្រជាជាតិនៅឆ្នាំនេះបានបង្ហាញថា នៅក្នុងប្រទេសថៃ ថ្នាំគ្រាប់មេតំហ្វេតាមីនមួយបន្ទះមានតម្លៃពី១.៥ដល់៤.៥ដុល្លារក្នុងឆ្នាំ២០១៧ពោលគឺធ្លាក់ចុះពី៤ទៅ៧ដុល្លារបើធៀបទៅនឹងឆ្នាំ២០១៤។
នៅប្រទេសសិង្ហបុរីដែលស្ថិតនៅជិតខាង តម្លៃបានធ្លាក់ចុះដល់ក្រោម៦ដុល្លាក្នុងឆ្នាំ២០១៧ពី ២០ដុល្លាក្នុងឆ្នាំ២០១៤។
លោក Jeremy Douglas អ្នកតំណាងប្រចាំតំបន់របស់ស្ថាប័ននេះបានប្រាប់រ៉យទ័រមុនពេលកិច្ចប្រជុំមួយនៅរដ្ឋធានីថៃថា “ការកើនឡើងនៃការផ្គត់ផ្គង់ថ្នាំយ៉ាម៉ាបានរុញច្រានតម្លៃតាមផ្លូវនៅទូទាំងតំបន់ឲ្យធ្លាក់ចុះដែលជាហេតុធ្វើឲ្យពួកគេមានតម្លៃសមរម្យអាចលៃលកទិញបានដោយអ្នកប្រើប្រាស់វ័យក្មេងដែលកំពុងត្រូវបានគេណែនាំឲ្យប្រើប្រាស់ថ្នាំប្រភេទនេះ”។
ប៉ូលិសបានរឹបអូសថ្នាំគ្រាប់មេតំហ្វេតាមីនជាង១៤លានគ្រាប់ដែលមានតម្លៃ៤៥លានដុល្លារនៅក្នុងការវាយឆ្មក់គ្រឿងញៀនធំបំផុតមួយក្នុងប្រទេសថៃកាលពីខែសីហា។
ប្រទេសម៉ាឡេស៊ីបានរឹបអូសគ្រឿងញៀនគ្រីស្តាល់ធំបំផុតរបស់ខ្លួនកាលពីខែឧសភាដោយស្ទាក់ចាប់គ្រឿងញៀនបានជិត១.២តោនដែលក្លែងធ្វើជាតែដឹកមកពីប្រទេសមីយ៉ាន់ម៉ា។
UNODC បាននិយាយនៅឆ្នាំ២០១៧ថា ការផលិតមេតំហ្វេតាមីននៅអាស៊ីអាគ្នេយ៍ភាគច្រើនគឺមកពីតំបន់គ្មានច្បាប់នៃប្រទេសមីយ៉ាន់ម៉ាជាពិសេសនៅរដ្ឋ Shan៕ REUTERS
Source: Kampuchea Thmey Daily
0 Comments