ភ្នំពេញ ៖ លោកបណ្ឌិត អ៊ិត សំហេង រដ្ឋមន្ត្រីក្រ សួងការងារ និងបណ្តុះបណ្តាលវិជ្ជាជីវៈបានអះអាងថា បច្ចុប្បន្ននេះមានកម្មសិក្សាការីខ្មែរប្រមាណ៨០៦០នាក់កំពុងសិក្សានិងធ្វើការនៅប្រទេសជប៉ុនដែលបានជួយបង្កើនប្រាក់ចំណូលលើកស្ទួយដល់សេដ្ឋកិច្ចគ្រួសារក៏ដូចជាសេដ្ឋកិច្ចជាតិឲ្យកាន់តែប្រសើរឡើងថែមទៀត។
លោកបណ្ឌិតអ៊ិត សំហេង បានបន្តថា ការបញ្ជូនកម្លាំងពលកម្មកម្ពុជាទៅសិក្សានិងធ្វើការនៅប្រទេសជប៉ុននេះពិតជាមានសារៈសំខាន់ណាស់ព្រោះថា មិនត្រឹមតែជួយបង្កើនចំនួនពលករទៅធ្វើការនៅទីនោះឲ្យកាន់តែច្រើនថែមទៀតប៉ុណ្ណោះទេថែមទាំងផ្តល់ឱកាសឲ្យកម្មសិក្សាការីខ្មែរទទួលបាននូវចំណេះដឹង បទពិសោធន៍ថ្មីៗពីប្រទេសជប៉ុនដើម្បីយកមកអភិវឌ្ឍន៍នៅប្រទេសរបស់ខ្លួនវិញផងដែរ។
លោករដ្ឋមន្ត្រីបានស្នើឲ្យអង្គការសមាគមសហប្រតិបត្តិការកម្ពុជា-ជប៉ុនដែលបានចុះអនុស្សរណៈរយៈពេល៥ឆ្នាំ ក្នុងការបញ្ជួនកម្មករកម្មការីខ្មែរទៅសិក្សានិងធ្វើការនៅជប៉ុន ជួយបណ្តុះបណ្តាលនិងបញ្ជូនកម្មសិក្សាការីខ្មែរទៅសិក្សានិងធ្វើការនៅប្រទេសជប៉ុនឲ្យបានច្រើនថែមទៀតដើម្បីឲ្យពួកគេទទួលបានប្រាក់ចំណូលខ្ពស់ជួយលើកស្ទួយដល់សេដ្ឋកិច្ចគ្រួសារឲ្យកាន់តែប្រសើរឡើងថែមទៀតខណៈបច្ចុប្បន្ននេះមានកម្មសិក្សាការីខ្មែរកំពុងធ្វើការនៅប្រទេសជប៉ុនប្រមាណជាង៨០០០នាក់។
លោក Fumio Yamada ប្រធានអង្គការសមាគមសហប្រតិបត្តិការកម្ពុជា-ជប៉ុន បានមានប្រសាសន៍ថា អង្គការបានជួយបណ្តុះបណ្តាលដល់កម្មសិក្សាការីខ្មែរនូវជំនាញមួយចំនួនដូចជាជំនាញផ្នែកសេវាថែទាំមនុស្សចាស់ សំណង់ស្ថាបត្យកម្ម ទេសចរណ៍និងផ្នែកធ្វើគ្រឿងបន្លាស់តូចៗជាដើមដើម្បីបញ្ជូនទៅសិក្សានិងធ្វើការនៅប្រទេសជប៉ុនដែលតាមក្នុង១ឆ្នាំត្រូវបញ្ជូនទៅប្រមាណពី១០០ទៅ២០០នាក់ខណៈកន្លងមកអង្គការធ្លាប់បានបញ្ជូនទៅប្រទេសជប៉ុនបានប្រមាណជិត៥០នាក់រួចមកហើយ។
លោកបានបន្តថា ប៉ុន្តែកម្មសិក្សាការីដែលរៀនចប់ត្រឹមថ្នាក់ទី១២ត្រូវមកចុះឈ្មោះរៀនភាសាជប៉ុននិងសិក្សាជំនាញទាំងនេះរយៈ៣ឆ្នាំជាមុនសិនទើបបញ្ជូនទៅប្រទេសជប៉ុន។
លោកបណ្ឌិត អ៊ិត សំហេង បានមានប្រសាសន៍បន្ថែមថា រហូតមកដល់បច្ចុប្បន្ននេះមានពលករខ្មែរដែលកំពុងធ្វើការនៅក្រៅប្រទេសចំនួន១លាន២សែននាក់ដោយបានផ្ញើមកស្រុកកំណើតវិញប្រមាណ២លានដុល្លារអាមេរិក ក្នុង១ឆ្នាំៗដែលបានជួយលើកស្ទួយដល់សេដ្ឋកិច្ចគ្រួសារនិងសេដ្ឋកិច្ចជាតិកាន់តែប្រសើរឡើងថែមទៀត។
លោកបណ្ឌិតអ៊ិត សំហេង បានបន្តថា ក្នុងចំណោមពលករខ្មែរធ្វើការនៅបរទេសនោះក្នុងនោះប្រទេសថៃមានច្រើនជាងគេរហូតដល់ទៅជាង១លាន៨ម៉ឺននាក់ បន្ទាប់មកនៅប្រទេសកូរ៉េខាងត្បូង ម៉ាឡេស៊ី ជប៉ុន សឹង្ហបុរី កាតា អារ៉ាប៊ីសាអីឌីតនិងគូវ៉េត ។
លោករដ្ឋមន្ត្រីបានបន្ថែមទៀតថា ការដែលពលករខ្មែរទៅធ្វើការនៅបរទេសនេះគឺដោយសារតែនិន្នាការរបស់ពិភពលោកខណៈដែលប្រទេសមួយចំនួនខ្វះកម្លាំងពលកម្មដូចជាប្រទេសកូរ៉េខាងត្បូងប្រទេសជប៉ុនជាដើម ហើយប្រទេសដែលបញ្ជូនពលករទៅធ្វើការនៅក្រៅប្រទេសច្រើនជាងគេគឺប្រទេសហ្វីលីពីន បន្ទាប់មកឥណ្ឌូនេស៊ី មីយ៉ាន់ម៉ា វៀតណាម កម្ពុជា ឡាវនិងប្រទេសថៃ។
ក្នុងការការពារដល់ពលករខ្មែរធ្វើការនៅបរទេសលោករដ្ឋមន្ត្រីបានឲ្យដឹងថា រាជរដ្ឋាភិបាលតែងតែគិតគូរ និង យកចិត្តទុកដាក់ចំពោះពលករខ្មែរធ្វើការនៅបរទេស។ ជាក់ស្តែងកន្លងមករាជរដ្ឋាភិបាលបានបញ្ជូនក្រុមការងារអន្តរក្រសួងចុះទៅធ្វើភាពស្របច្បាប់នៅប្រទេសថៃបាន១០០ភាគរយដើម្បីឲ្យពួកគេទទួលបាននូវភាពស្របច្បាប់ក្នុងការធ្វើការងារនៅប្រទេសថៃដោយមិនមានការព្រួយបារម្ភពីការបញ្ជូនត្រឡប់មកស្រុកកំណើតវិញឡើយ៕
Source: Kampuchea Thmey Daily
0 Comments