ពានរង្វាន់​ក្រៅ​ផ្លូវការ​មួយ​នៅ​ប្រទេស​ថៃ ​អញ្ជើញ​ក្រុម​ភ្នំពេញ​ក្រោន​របស់​កម្ពុជា​ឲ្យ​ចូលរួម​ប្រកួត

ព័ត៌មាន​ក្នុង​ស្រុក​របស់​ប្រទេស​ថៃ​ បាន​បញ្ជាក់​ថា ​ក្លិបបាល់ទាត់ភ្នំពេញក្រោន សមាជិក​ក្នុង​ពាន​រង្វាន់​លីគ​កំពូល​កម្ពុជា (Metfone Cambodian League) ត្រូវ​បាន​​ពានរង្វាន់​​ក្រៅ​ផ្លូវការ​មួយ​នៅ​ទីនោះ​អញ្ជើញ​ឲ្យ​ចូលរួម​ប្រកួត​ប្រជែង នៅ​ដើម​ឆ្នាំ​២០១៩​ខាង​មុខ ខណៈ​​គោល​ដៅ​នៅ​ក្នុង​ពានរង្វាន់​នេះ​គឺ​ត្រៀម​អញ្ជើញ​​ក្រុម​ចំនួន​​១៦ មក​ពី​៥​ប្រទេស​ក្នុង​តំបន់​អាស៊ាន​​ឲ្យ​ចូលរួម​ដូចគ្នា​ដែរ។

ប្រភព​បាន​បន្ត​ថា ​ពានរង្វាន់​នេះ​ទទួល​បាន​ការ​ឧបត្ថម្ភ​ពី​ក្រុមហ៊ុន​ស្រាបៀ​ធំមួយ​នៅ​ប្រទេស​ថៃ ហើយ​មាន​ក្រុម​ចំនួន១២​នៅ​លីគកំពូលថៃ ត្រូវ​បាន​ស្ថិត​ក្នុង​បញ្ជី​ជា​បេក្ខភាព​ចូលរួម​​ប្រកួត​ហើយ​ក្រុម​៤ក្រុម​ផ្សេង​​ទៀត​នឹង​អញ្ជើញ​មក​ពី​លីគ​កំពូល​ប្រទេស​ ឡាវ មីយ៉ាន់ម៉ា និងវៀតណាម។ ចំពោះ​កម្ពុជា គឺ​ខាង​ពានរង្វាន់​នេះ​បាន​អញ្ជើញ​ក្រុម​ភ្នំពេញក្រោន។ យ៉ាងណាក្តី​ប្រភព​មិន​បាន​បញ្ជាក់​ពី​កាលបរិច្ឆេទ​ប្រកួត​ជាក់លាក់​នៅ​ឡើយ​នោះ​ទេ។

គោលដៅ​នៃ​ការ​បង្កើត​ពានរង្វាន់​អន្តរជាតិ​នេះ​ឡើង​គឺ​ដោយ​សារ​តែ​​លីគ​តាម​ប្រទេស​ដែល​ជា​បេក្ខភាព​ទាំង​អស់​កំពុង​តែ​សម្រាក​ត្រៀម​រដូវ​កាល​ឆ្នាំ​២០១៩ ក្រោយ​ក្រុម​ជម្រើស​ជាតិ​ប្រមូលផ្ដុំ​កីឡា​ករ​រៀងៗ​ខ្លួន​ដើម្បី​ប្រកួត​ក្នុង​ពានរង្វាន់​ធំ​ប្រចាំ​តំបន់​អាស៊ាន AFF Suzuki Cup 2018 នៅ​ចុង​ឆ្នាំ​នេះ។ ដូច្នេះ​ក្រុមទាំង​ ១៦​មាន​ឱកាស​បាន​ពង្រឹង​សមត្ថភាព​តាមរយៈ​ការ​ប្រកួតប្រជែង​ដ៏​ស្វិតស្វាញ​ក្នុង​ដំណាក់កាល​ត្រៀម​ខ្លួន​សម្រាប់​រដូវកាលថ្មីនៃលីគ​តាម​បណ្ដា​ប្រទេសនីមួយៗ។

ថ្មីៗនេះ​ក្រុម​ភ្នំពេញក្រោន បាន​តែងតាំង​ក្បាលម៉ាស៊ីន ថ្មី​ក្រោយ​ជម្រុះ​ថ្នាក់​ដឹកនាំ​ចាស់​អស់​បន្ទាប់​ពី​ចប់​រដូវកាល​ឆ្នាំ​២០១៨។ ចំណែក​ថ្នាក់ដឹកនាំ​ថ្មី​របស់​ក្លិប​​មាន​ដូចជា លោក លី ហៀង ជា​អ្នកចាត់ការ​ទូទៅ​ក្លិប ​ចំណែក លោក Leonardo Vitorino​ ជាគ្រូ​បង្គោល​ថ្មី ស្របពេល​ប្អូន​ប្រុសរបស់ខ្លួន​ Luis Fernando Vitorino កាន់តំណែងជាគ្រូបង្វឹកអ្នកចាំទីឈុតធំ។ អតីតគ្រូវេស្ទើន លោក ស៊ុំ វណ្ណា បាន​ទទួល​តំណែងជាគ្រូជំនួយក្រុមឈុតធំ ខណៈដែលអតីតខ្សែប្រយុទ្ធ កែវ សុខង៉ន ជា​អ្នក​ចាត់ការ​ទូ​ទៅ​ក្រុម​ឈុតធំ។

សូម​បញ្ជាក់​ថា នៅ​រដូវ​កាល​ឆ្នាំ២០១៨ ថ្មីៗនេះក្នុង​ពានរង្វាន់​លីគ​កំពូល​កម្ពុជា ក្រុមភ្នំពេញក្រោន ​រក្សាចំណាត់ថ្នាក់លេខ៥ក្រោយប្រកួតបាន២២លើក ឈ្នះបាន១១លើក​ ស្មើគ្នា​៣​លើក​ និង​ចាញ់៨​លើក​ មាន​៣៦ពិន្ទុ ពោលគឺចាញ់ក្រុមកំពូលតារាងណាហ្គាវើល រហូតដល់២០ពិន្ទុ។ ភ្នំពេញក្រោន​ ទាត់​បញ្ចូល​ទី​គូប្រកួតបាន៤១គ្រាប់ ហើយគេទាត់ចូលវិញចំនួន៣៣គ្រាប់។​ ចំណែក​នៅ​ក្នុង​ពានរង្វាន់​សម្ដេច​តេជោ​ ហ៊ុន សែន (Hun Sen Cup)វិញ ក្រុមក្រុមភ្នំពេញក្រោន​ បាន​ធ្លាក់ចេញ​ត្រឹម​វគ្គ​៨​ក្រុម​ចុងក្រោយ បន្ទាប់ពីចាញ់ក្រុម​អង្គរ​ថាយហ្គឺរ ដែលមកពីខេត្តសៀមរាប​ ដោយ​បាល់​ប៉េ​ណាំងទី​កាត់​សេចក្ដី​៤ ​ទល់​៣ ក្រោយ​ប្រកួត​ស្មើ​គ្នា​ទាំង​២​ជើង​៤​ទល់​៤៕

 

Source: Kampuchea Thmey Daily