លោក ស៊ុំ វណ្ណា អតីតគ្រូបង្វឹករបស់ក្រុមវេស្ទើនភ្នំពេញ ដែលកំពុងតែនៅទំនេរពីការងារបាល់ទាត់ នៅពេលនេះបានសម្រេចចិត្តទៅចូលរួមជាមួយក្រុមភ្នំពេញក្រោន ហើយកាលពីពេលថ្មីៗ ដោយធ្វើជាគ្រូជំនួយរបស់លោកគ្រូបង្គោលថ្មី Leonardo Vitorino ដែលជាជនជាតិប្រេស៊ីល ធ្លាប់ដឹកនាំក្រុមបាល់ទាត់ជម្រើសជាតិកម្ពុជាកន្លងទៅ។
បុរសដែលធ្លាប់ឆ្លងកាត់បរិញ្ញាបត្រកីឡានៅប្រទេសគុយបារូបនេះបានបញ្ជាក់ថា ដំណើរការទៅកាន់កីឡដ្ឋាន RSN នេះគឺលោកសម្លឹងឃើញថា ក្លិបមានការផ្ដោតលើគម្រោងអភិវឌ្ឍន៍យុវជនច្រើនបើធៀបនឹងក្រុមផ្សេងៗ។
លោកបានស្គាល់កីឡាករវ័យក្មេងភាគច្រើនរបស់ភ្នំពេញក្រោន ពេលធ្វើគ្រូជំនួយក្រុមជម្រើសជាតិកម្ពុជា អាយុក្រោម១៩ឆ្នាំចូលរួមការប្រកួតអាស៊ីអាគ្នេយ៍ឆ្នាំ២០១៦។ ដូច្នេះលោកថា ដំណើរចូលមកកាន់កីឡដ្ឋាន RSN មិនមែនជាការសម្រេចចិត្តលំបាកឡើយ។
លោកបានបញ្ជាក់ថា «វាត្រូវជាមួយអ្វីដែលខ្ញុំធ្វើកន្លងមក ហើយភាគច្រើនយើងចូលចិត្តអភិវឌ្ឍយុវជន ប្រមូលផ្ដុំយុវជន។ ណាមួយទៀត កីឡាករក្មេងៗរបស់ភ្នំពេញក្រោន ក៏បានចូលរួមប្រកួតនៅវៀតណាម កាលឆ្នាំ២០១៦ ហើយកាលណោះខ្ញុំជាគ្រូជំនួយរបស់ពួកគាត់ អ៊ីចឹងវាជារឿងដ៏ល្អដែលយើងបានធ្វើការរួមគ្នាជាថ្មីម្ដងទៀត»។
លោកគិតថាការរួមក្រុមការងារជាមួយគ្រូបង្វឹកLeonardo Vitorino ជាបទពិសោធន៍ថ្មីមួយដើម្បីបង្កើនចំណេះដឹងបាល់ទាត់ដល់ខ្លួន។ លោក ស៊ុំ វណ្ណា កាន់បរិញ្ញាបត្រអប់រំកាយ និង កីឡា ពីប្រទេសគុយបា កាលពីឆ្នាំ២០០៩។
លោកធ្លាប់ធ្វើជាគ្រូជំនួយក្លឹបបៀលប្រាយ ពីឆ្នាំ២០១៣-២០១៥ មុននឹងបន្តទៅកាន់តំណែងជាគ្រូធំក្លិបមជ្ឈមណ្ឌលកម្ចាត់មីនកម្ពុជា (ស៊ីម៉ាក់) កាលពីរដូវកាល២០១៥-២០១៦ ហើយបានជួយឲ្យក្លឹបនេះឡើងវគ្គពាក់កណ្ដាលផ្ដាច់ព្រ័ត្រពានរង្វាន់សម្ដេចតេជោ ហ៊ុន សែន ផងដែរ។
លោកបានចុះកិច្ចសន្យាជាផ្លូវការដឹកនាំក្រុមវេស្ទើន កាលពីដើមរដូវកាល ឆ្នាំ២០១៧ ខណៈលោកបានបញ្ចប់វគ្គសិក្សាគ្រូបង្វឹកផ្នែកអាជ្ញាប័ណ្ណ B (AFC B License) នៅមជ្ឈមណ្ឌល និងសាលាបាល់ទាត់ជាតិបាទី នៅគ្រានោះផងដែរ។
នៅរដូវកាលកន្លងទៅ លោកនៅទំនេរ ដោយដឹកនាំក្រុមក្រៅផ្លូវការមួយចំនួនបណ្ដោះអាសន្នផងដែរ៕
Source: Kampuchea Thmey Daily
0 Comments