បាត់ដំបង ៖ ទឹកប្រាក់ប្រមាណ ១ សែនបាត ត្រូវបានជនមិនស្គាល់មុខ លបលួចយកអស់ពីក្នុងបន្ទប់ ដោយគេបានលបឡើងចូលតាមពិតាន ខណៈដែលម្ចាស់បន្ទប់បានចេញទៅធ្វើការនៅក្នុងកាស៊ីណូ ជាប់ខ្សែបន្ទាត់ព្រំដែនថៃ ដោយបានបិទទ្វារបន្ទប់ចោល។
ការភ្ញាក់ផ្អើលនេះ បានកើតឡើងនៅវេលាម៉ោង ១២ ថ្ងៃត្រង់ នាថ្ងៃទី ២៩ ខែកញ្ញា ឆ្នាំ២០១៨ ត្រង់ចំណុចផ្ទះជួលមួយកន្លែង ស្ថិតក្នុងភូមិដអ ឃុំបឹងរាំង ស្រុកកំរៀង ខេត្តបាត់ដំបង ខណៈដែលម្ចាស់បន្ទប់ត្រឡប់មកពីធ្វើការវិញ។
តាមការរៀបរាប់ពីជនរងគ្រោះឈ្មោះ ហេង ម៉ាច ភេទស្រី អាយុ៣៨ឆ្នាំ ស្នាក់នៅក្នុងបន្ទប់ជួលលេខ ៩ ក្នុងភូមិសាស្ត្រខាងលើ បានរៀបរាប់ថា នាងបានទុកលុយចំនួន ១ សែនបាត ដែលនាងខំសន្សំប្រាក់ខែជាយូរមកហើយ រួចនាងក៏បានចេញទៅធ្វើការនៅក្នុងកាស៊ីណូជាធម្មតា។
នារីរងគ្រោះបានបន្តថា លុះនៅថ្ងៃកើតហេតុ ពេលដែលនាងចេញពីធ្វើការ និងចូលដល់ក្នុងបន្ទប់ គឺនាងមានអារម្មណ៍ស្លុតយ៉ាងខ្លាំង ដោយសារតែឃើញពិតានបន្ទប់របស់នាងបើក ហើយសម្ភារៈនៅក្នុងបន្ទប់មានសភាពរាយប៉ាយ ទើបនាងចាប់អារម្មណ៍ទៅលើប្រាក់របស់នាង ក៏ស្ទុះទៅរកមើលគឺបានបាត់មែន នាងក៏បានប្តឹងទៅសមត្ថកិច្ច ។
ភ្លាមៗនោះដែរ ក្រោយពីកម្លាំងជំនាញបានចុះសិក្សា និងត្រួតពិនិត្យរួចមក ទើបសមត្ថកិច្ចឈានដល់ការចាប់ខ្លួនជនសង្ស័យដែលស្នាក់នៅក្នុងបន្ទប់ជាប់គ្នា ដែលជនសង្ស័យនោះមាន ឈ្មោះ ជិន សុហេង ភេទប្រុស អាយុ៤៧ឆ្នាំ បានធ្វើសកម្មភាពលួចគាស់ពិតានបន្ទប់លេខ៩ របស់នារីរងគ្រោះ ដែលស្ថិតនៅជាប់បន្ទប់គ្នា ដើម្បីលួចលុយទាំងនោះ។
ក្រោយពីជនសង្ស័យបានសារភាពរួចមក សមត្ថកិច្ចក៏បានរៀបចំឯកសារក្នុងការបញ្ជូនជនសង្ស័យខាងលើនេះ ទៅកាន់ស្នងការដ្ឋាន នគរបាលខេត្ត ក្នុងការចាត់វិធានការតាមផ្លូវច្បាប់៕
Source: Kampuchea Thmey Daily
0 Comments