បើកសមរភូមិអធិរាជអ្នកប្រយុទ្ធគុនខ្មែរអន្តរជាតិគ្រូនសាននៅសង្វៀនCNCថ្ងៃសុក្រ

ក្រុមហ៊ុនភេសជ្ជៈ ប៉ូវកម្លាំងគ្រូនសានរបស់ប្រទេសកូរ៉េ បានសហការជាមួយទូរទស្សន៍ CNC និងសហព័ន្ធកីឡាប្រដាល់គុនខ្មែរ រៀបចំការប្រកួតប្រដាល់ថ្មីមួយទៀត ដែលប្រសិទ្ធនាមឈ្មោះថា”សមរភូមិអធិរាជអ្នកប្រយុទ្ធគុនខ្មែរអន្តរជាតិគ្រូនសាន” នៅរាល់ល្ងាចថ្ងៃសុក្ររៀងរាល់សប្ដាហ៍ ។

ក្នុងសន្និសីទកាសែតនាព្រឹកថ្ងៃទី២៦តុលា២០១៨ លោក ហួរ រតនៈ ដែលជាប្រធានទីផ្សារទូរទស្សន៍CNC បានឲ្យដឹងថា “សមរភូមិអធិរាជអ្នកប្រយុទ្ធគុនខ្មែរអន្តរជាតិគ្រូនសាន” ត្រូវបានចាប់បដិសន្ធិឡើងក្រោមការសហការគ្នាយ៉ាងស្អិតរមួតរវាងក្រុមហ៊ុនភេសជ្ជៈប៉ូវកម្លាំងគ្រូនសាននិងស្ថានីយទូរទស្សន៍CNC ដែលមានសហព័ន្ធប្រដាល់គុនខ្មែរជួយគាំទ្រយ៉ាងពេញទំហឹងនិងអនុញ្ញាតឲ្យមានសកម្មភាពប្រកួតនេះកើតឡើង ហើយថែមទាំងបានផ្តល់នូវគណៈកម្មការរៀបចំការប្រកួតព្រមទាំងកីឡាករល្អៗឲ្យមកចូលរួមបង្ហាញថ្វៃដៃថែមទៀតផង។លោកបានអះអាងថា នឹងធ្វើឲ្យការប្រកួតមួយនេះ ប្រព្រឹត្តធ្វើឡើងដោយរលូននិងជក់ចិត្តដិតអារម្មណ៍គ្រប់ការប្រកួតគ្រប់សប្តាហ៍នឹងចប់ចុងចប់ដើម។

លោក ហួរ រតនៈ បានបញ្ជាក់ទៀតថា កម្មវិធី”សមរភូមិអធិរាជអ្នកប្រយុទ្ធគុនខ្មែរអន្តរជាតិគ្រូនសាន”លើសង្វៀនថ្មី ដែលនឹងចាប់ផ្តើមពីថ្ងៃទី០២ខែវិច្ឆិកាខាងមុខនេះ នឹងចាប់ផ្តើមដំបូងគឺការប្រកួតជាលក្ខណះអន្តរជាតិ ដែលមានកីឡាករបរទេសល្បីៗ សម្រាប់លាយជាមួយគូអ្នកប្រដាល់រួមជាតិ ។

លោក គីម ជុងហ៊ី(Kim Jung Hwi) អគ្គនាយកក្រុមហ៊ុនគីម ឡាយអេង បានអះអាងថា ក្រុមហ៊ុនក្រុមហ៊ុនភេសជ្ជៈប៉ូវកម្លាំងគ្រូនសាន គឺជាអ្នកឧបត្ថម្ភផ្តាច់មុខនូវកម្មវិធីប្រកួតប្រដាល់ថ្មីមួយនេះ ដើម្បីចូលរួមលើកស្ទួយនិងអភិរក្សវិស័យកីឡាប្រដាល់នៅកម្ពុជា ក៏ដូចជាពង្រីកវិសាលភាពនៃការផ្សព្វផ្សាយ ។ លោក បានអោយដឹងទៀតថា នេះលើកទី១របស់ភេសជ្ជៈប៉ូវកម្លាំងគ្រូនសាន ដែលឧបត្ថម្ភកីឡាប្រដាល់ដែលមានសក្តានុពលនៅកម្ពុជានេះ ។

លោក ម៉ិល កាដូ អគ្គលេខាធិការសហព័ន្ធកីឡាប្រដាល់គុនខ្មែរ បានសំដែងនូវមោទនភាពចំពោះកម្មវិធីប្រដាល់ថ្មីនៅCNCនេះ ព្រោះវាបានធ្វើឲ្យការការផ្សព្វផ្សាយវិស័យកីឡានៅកម្ពុជា ពិសេសកីឡាប្រដាល់កាន់តែទូលំទូលាយថែមទៀត ដែលបង្កលក្ខណះដល់មន្ត្រីបច្ចេកទេស ក៏ដូចជាកីឡាករប្រដាល់មានការងារធ្វើ និងរកចំណូលបង្កើនជីវភាពបានថែមមួយកម្រិតទៀត ។

លោកបានកោតសរសើរចំពោះការខិតខំរបស់ក្រុមហ៊ុនក្រុមហ៊ុនភេសជ្ជៈ ប៉ូវកម្លាំងគ្រូនសាន និងស្ថានីយទូរទស្សន៍CNC ដែលបានផ្តួចផ្តើមបង្កើតឲ្យមានព្រឹត្តិការណ៍ប្រដាល់បន្ថែមទៀតនេះ ពីព្រោះតាមរយះព្រឹត្តិការណ៍នេះ វាបានរួមចំណែកធ្វើអោយកម្ពុជារក្សានិងអភិរក្សក្បាច់គុនខ្មែរ ដែលជាសិល្បះ មរតក វប្បធម៌ របស់បុព្វបុរស ដូនតា កាន់តែរស់រវើក និងផ្សព្វផ្សាយមិនត្រឹមតែក្នុងក្របខណ្ឌជាតិប៉ុណ្ណោះទេ គឺថែមទាំងរួមចំណែកអោយពិភពលោកកាន់តែស្គាល់និងដឹងថា ប្រដាល់ក្បាច់គុនបុរាណជារបស់ខ្មែរនោះ ។

ជាមួយគ្នានេះដែរ លោកអគ្គលេខាធិការសហព័ន្ធប្រដាល់ ក៏បានក្រើនរម្លឹកដល់មន្ត្រីបច្ចេកទេស និងកីឡាករប្រដាល់គ្រប់ៗរូប ត្រូវតែរៀបចំខ្លួនឲ្យបានល្អជាងមុន។ បើជាមន្ត្រីបច្ចេកទេសត្រូវតែខិតខំបំពេញការងារឲ្យអស់ពីសមត្ថភាព ទាំងអាជ្ញាកណ្ដាល-ចៅក្រមត្រូវតែមានភាពសុចរឹតក្នុងការងារ ព្រោះនេះជាជាការងារមួយដែលទាំងអស់គ្នាសុទ្ធតែបានទទូលផលប្រយោជន៍៕