នាយករដ្ឋមន្ត្រីជប៉ុនលោក Shinzo Abe បានត្រួតពិនិត្យកងទ័ពនៅឯទីលាន Tiananmen របស់ទីក្រុងប៉េកាំងនៅថ្ងៃសុក្រក្នុងដំណើរទស្សនកិច្ចដ៏កម្រមួយទៅកាន់ប្រទេសចិនស្របពេលចំណងទាក់ទងត្រូវបានកែលម្អបន្ថែមទៀត ហើយប្រទេសទាំងពីរកំពុងប្រឈមនឹងបញ្ហាប្រឈមផ្នែកពាណិជ្ជកម្មពីលោកប្រធានាធិបតីសហរដ្ឋអាមេរិក Donald Trump។
លោក Li Keqiang បានស្វាគមន៍លោក Abe ខណៈទង់ជាតិជប៉ុនបានបក់នៅខាងក្រៅវិមាន Great Hall of the People ហើយអ្នកទាំងពីរបានពិនិត្យមើលឆ្មាំកិត្តិយសមុនពេលចូលទៅខាងក្នុងសម្រាប់កិច្ចពិភាក្សា។
ទំនាក់ទំនងរវាងប្រទេសសេដ្ឋកិច្ចធំជាងគេទាំងពីររបស់អាស៊ីមានភាពប្រសើរឡើងនៅក្នុងរយៈពេលប៉ុន្មានឆ្នាំថ្មីៗនេះបន្ទាប់ពីបានធ្លាក់ចុះដល់កម្រិតទាបថ្មីកាលពីឆ្នាំ២០១២នៅពេលទីក្រុងតូក្យូកាន់កាប់កោះជម្លោះដែលក្រុងប៉េកាំងទាមទារ។
ទំនាក់ទំនងរវាងប្រទេសទាំងពីរមានភាពល្អប្រសើរយ៉ាងឆាប់រហ័សនៅពេលលោក Trump ដាក់ពន្ធនាំចូលយ៉ាងច្រើនទៅលើប្រទេសចិនហើយគាត់ក៏កំពុងតម្រង់គោលដៅទៅលើការនាំចេញរបស់ជប៉ុនផងដែរនៅក្នុងកិច្ចខិតខំប្រឹងប្រែងរបស់គាត់ដើម្បីកាត់បន្ថយឱនភាពពាណិជ្ជកម្មសហរដ្ឋអាមេរិកថ្វីបើគាត់អួតអាងអំពីចំណងទាក់ទងផ្ទាល់ខ្លួនជាមួយលោក Abe និងប្រធានាធិបតីចិនលោក Xi Jinping ក៏ដោយ។
លោក Abe និងលោក Xi ត្រូវបានគេរំពឹងថានឹងពិភាក្សាពីរបៀបដើម្បីជំរុញកិច្ចសហប្រតិបត្តិការសេដ្ឋកិច្ចរវាងប្រទេសសេដ្ឋកិច្ចធំបំផុតទីពីរនិងទីបីរបស់ពិភពលោកនៅពេលពួកគេជួបគ្នា។
លោក Abe បាននាំគណៈប្រតិភូមកពីក្រុមហ៊ុនជប៉ុនចំនួន៥០០ដែលចង់ចូលទីផ្សារចិនដ៏ធំខណៈទីក្រុងប៉េកាំងចាប់អារម្មណ៍នឹងបច្ចេកវិទ្យានិងចំណេះធ្វើសាជីវកម្មរបស់ប្រទេសជប៉ុន។
អ្នកទាំងពីរទំនងជាផ្តោតលើកិច្ចព្រមព្រៀងក៏មានសក្តានុពលជាច្រើនរួមទាំងការវិនិយោគរួមក្នុងវិស័យហេដ្ឋារចនាសម្ព័ន្ធនៅប្រទេសក្នុងតំបន់រួមមានឥណ្ឌូនេស៊ីនិងហ្វីលីពីនផងដែរ។
គួរបញ្ជាក់ថា ដំណើរទស្សនកិច្ចផ្លូវការចុងក្រោយបំផុតទៅកាន់ទីក្រុងប៉េកាំងដោយនាយករដ្ឋមន្ត្រីជប៉ុនមួយរូបគឺនៅក្នុងឆ្នាំ២០១១។
ចាប់តាំងពីការទាស់គ្នាក្នុងឆ្នាំ២០១៤រវាងលោក Abe និងលោក Xi នៅខាងក្រៅសន្និសីទកំពូលមួយមក មានដំណើរទស្សនកិច្ចនានាពីសំណាក់ភាគីទាំងពីរនិងការបន្ធូរបន្ថយវោហាសាស្ត្រ។ លោក Li បានធ្វើទស្សនកិច្ចនៅទីក្រុងតូក្យូកាលពីខែឧសភា៕ AFP
Source: Kampuchea Thmey Daily
0 Comments