ភ្នំពេញ ៖ ក្រសួងអប់រំយុវជន និងកីឡា បានបង្កើនគុណភាពបណ្ដុះបណ្ដាលភាសាអង់គ្លេសដល់សិស្សចាប់ពីកម្រិតបឋមសិក្សាដល់អនុវិទ្យាល័យដើម្បីជួយឲ្យសិស្សមានសមត្ថភាពផ្នែកភាសាអង់គ្លេសនេះកាន់តែខ្ពស់ថែមទៀតងាយស្រួលក្នុងការស្រាវជ្រាវឯកសារផ្សេងៗសម្រាប់ការសិក្សា។
ថ្លែងនៅក្នុងពិធីចុះអនុស្សារណៈនៃការយោគយល់គ្នារវាងក្រសួងអប់រំយុវជននិងកីឡាជាមួយអង្គការសកម្មភាពសម្រាប់បឋមសិក្សានៅកម្ពុជានិងអង្គការមូលនិធិអាស៊ីនៅទីស្តីការក្រសួង លោក បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំយុវជននិងកីឡាបានមានប្រសាសន៍ថាការពង្រឹងគុណភាពបណ្តុះបណ្តាលភាសាអង់គ្លេសនេះគឺធ្វើឡើងតាមរយៈការចែកសៀវភៅភាសាអង់គ្លេសនៅតាមបណ្ណាល័យនៅក្នុងសាលានានាដើម្បីឲ្យសិស្សមានទម្លាប់ការអានសៀវភៅសម្រាប់បង្កើនចំណេះដឹងទាក់ទិននឹងផ្នែកភាសាអង់គ្លេសនេះកាន់តែប្រសើរ។
លោក រដ្ឋមន្ត្រីបានស្នើឲ្យអង្គការជាដៃគូធ្វើការចែកចាយសៀវភៅភាសាអង់គ្លេសនេះឲ្យបានគ្រប់សាលាគោលដៅនៅទូទាំងប្រទេសដើម្បីឲ្យសិស្សានុសិស្សអាចមានលទ្ធភាពទទួលបានសៀវភៅសម្រាប់អានឲ្យបានគ្រប់ៗគ្នា។
លោក សៅ វណ្ណា នាយកប្រតិបត្តិអង្គការសកម្មភាពសម្រាប់បឋមសិក្សានៅកម្ពុជាបានមានប្រសាសន៍ថាតាមគម្រោងអង្គការនឹងចែកចាយសៀវភៅភាសាអង់គ្លេសប្រមាណ៣សែនក្បាលនៅតាមបណ្ណាល័យដែលសាលាកម្រិតបឋមសិក្សានិងអនុវិទ្យាល័យនៅជាមួយគ្នានិងមានបណ្ណារក្សធ្វើការពេញម៉ោងជាង១ពាន់នៅទូទាំងប្រទេសក្នុងរយៈពេល៥ឆ្នាំដើម្បីឲ្យសិស្សអាចមានលទ្ធភាពបានអានសៀវភៅភាសាអង់គ្លេសកាន់តែច្រើន ។
លោកបានបន្ថែមទៀតថាទន្ទឹមនឹងដាក់នៅតាមបណ្ណាល័យអង្គការក៏បានបណ្តុះបណ្តាលដល់បណ្ណារក្សនៅតាមសាលាគោលដៅផងដែរដើម្បីឲ្យពួកគេចេះពីរបៀបទុកដាក់និងថែរក្សាសៀវភៅឲ្យបានល្អនិងការរកសៀវភៅដល់សិស្សជាដើម។
លោកស្រី មេឡូនី លីនប៊ឺក តំណាងមូលនិធិអាស៊ីប្រចាំកម្ពុជាបានមានប្រសាសន៍ថាការដែលអង្គការផ្តល់សៀវភៅភាសាអង់គ្លេសនេះដល់សាលាកម្រិតអនុវិទ្យាល័យនេះគឺដើម្បីផ្គត់ផ្គង់តម្រូវការរបស់សិស្សានុសិស្សដែលកំពុងមានការខ្វះខាតសៀវភៅភាសាអង់គ្លេសនៅតាមបណ្ណាល័យក៏ដូចជាចូលរួមលើកកម្ពស់ទំលាប់ការអានរបស់សិស្សនិងពង្រឹងចំណេះដឹងសិស្សទៅលើគុណភាពអប់រំផ្នែកភាសាអង់គ្លេសផងដែរ។
លោកស្រីបានបន្តថា«អង្គការមូលនិធិអាស៊ីមានក្តីសោមនុស្សរីករាយក្នុងការសហការជាមួយក្រសួងអប់រំយុវជននិងកីឡាដើម្បីលើកកម្ពស់ការអានក៏ដូចជាភាសាអង់គ្លេសនៅប្រទេសកម្ពុជាឲ្យកាន់តែប្រសើរឡើងថែមទៀត។
គួរបញ្ជាក់ថាកិច្ចព្រមព្រៀងស្តីពីចែកចាយសៀវភៅភាសាអង់គ្លេសដល់សាលាអនុវិទ្យាល័យនេះមានរយៈពេល៥ឆ្នាំគឺចាប់ពីខែមករាឆ្នាំ២០១៨រហូតដល់ថ្ងៃទី៣១ ខែធ្នូ ឆ្នាំ២០២២ខាងមុខនេះ ដោយចំណាយថវិកាប្រមាណជាង២០ម៉ឺនដុល្លារអាមេរិក ដែលជាថវិការួមគ្នារវាងក្រសួងអប់រំយុវជននិងកីឡានិងអង្គការមូលនិធិអាស៊ី។
ថវិកាជាង២០ម៉ឺនដុល្លារអាមេរិកនេះឆ្នាំទី១អង្គការមូលនិធិអាស៊ីចំណាយ១០០ភាគរយឆ្នាំទី២ចំណាយ៧០ភាគរយក្រសួងអប់រំចូលរួមចំណាយ៣០ភាគរយឆ្នាំទី៣អង្គការចំណាយ៥០ភាគរយក្រសួង៥០ភាគរយឆ្នាំទី៤អង្គការចំណាយ៣០ភាគរយក្រសួងចំណាយ៧០ភាគរយ និងឆ្នាំទី៥អង្គការចំណាយ២០ភាគរយក្រសួងចំណាយ៨០ភាគរយ៕
Source: Kampuchea Thmey Daily
0 Comments