ប្រទេសទួរគីកាលពីថ្ងៃសុក្របាននិយាយថា ខ្លួនចង់ឲ្យជនជាតិអារ៉ាប៊ីសាអ៊ូឌីតចំនួន១៨នាក់ត្រូវធ្វើបត្យាប័នជុំវិញករណីឃាតកម្មអ្នកសារព័ត៌មាន Jamal Khashoggi ខណៈដែលលោកប្រធានាធិបតី Recep Tayyip Erdogan បាននិយាយថា រដ្ឋាភិបាលក្រុងអង់ការ៉ានៅតែមានភស្តុតាងបន្ថែមទៀតដើម្បីលាតត្រដាងអំពីករណីនេះ។
ការប្រកាសនេះបានកើតឡើងមួយថ្ងៃបន្ទាប់ពីព្រះរាជអាជ្ញាអារ៉ាប៊ីសាអ៊ូឌីតបាននិយាយថា ផ្អែកលើភស្តុតាងដែលផ្តល់ដោយប្រទេសទួរគី ការសម្លាប់នេះហាក់ដូចជាត្រូវបានគេគិតទុកជាមុនដែលនេះជាលើកដំបូងហើយដែលអាជ្ញាធរអារ៉ាប៊ីសាអ៊ូឌីតបានទទួលស្គាល់បែបនេះ។
ក្នុងសុន្ទរកថានៅទីក្រុងអង់ការ៉ា លោក Erdogan បាននិយាយថា ព្រះរាជអាជ្ញាអារ៉ាប៊ីសាអ៊ូឌីតនឹងធ្វើទស្សនកិច្ចទីក្រុងអ៊ីស្តង់ប៊ុលនៅថ្ងៃអាទិត្យដើម្បីនិយាយទៅកាន់អាជ្ញាធរទួរគីដែលជាផ្នែកមួយនៃការស៊ើបអង្កេត។
អាជ្ញាធរអារ៉ាប៊ីសាអ៊ូឌីតបានចាប់ខ្លួនមនុស្សចំនួន១៨នាក់ដែលអ្នកទាំងនោះកំពុងតាមចាប់ដោយក្រុងអង់ការ៉ាក្រោយពីមានការខឹងសម្បាជាអន្តរជាតិលើការសម្លាប់លោក Khashoggi ដែលជាអ្នកកាសែត Washington Post និងជាអ្នករិះគន់គោលនយោបាយរបស់ប្រទេសអារ៉ាប៊ីសាអ៊ូឌីត។ គាត់ត្រូវបានសម្លាប់នៅស្ថានកុងស៊ុលរបស់អារ៉ាប៊ីសាអ៊ូឌីតប្រចាំទីក្រុងអ៊ីស្តង់ប៊ុលកាលពីថ្ងៃទី២ខែតុលា។
សំណើជាលាយលក្ខណ៍អក្សរសម្រាប់ការធ្វើបត្យាប័នជនសង្ស័យចំនួន១៨នាក់ត្រូវបានរៀបចំដោយរដ្ឋអាជ្ញារបស់ទីក្រុងអ៊ីស្តង់ប៊ុល។
មន្ត្រីទួរគីជាន់ខ្ពស់ម្នាក់បាននិយាយថា “វាច្បាស់ណាស់ថា ប្រព័ន្ធយុត្តិធម៌នៅក្នុងប្រទេសទួរគីកាន់តែមានភាពល្អប្រសើដើម្បីបំរើភាពយុត្តិធម៌នៅក្នុងករណីនេះ”។
កាលពីថ្ងៃសុក្រ លោក Erdogan បានអំពាវនាវឲ្យទីក្រុងរីយ៉ាដត្រូវបង្ហាញថា តើនរណាជាអ្នកបញ្ជាឲ្យសម្លាប់និងកន្លែងទុកសាកសពរបស់លោក Khashoggi ។
ប្រធានាធិបតីទួរគីរូបនេះបានបន្ទោសដោយផ្ទាល់ទៅលើរដ្ឋាភិបាលអារ៉ាប៊ីសាអ៊ូឌីតដោយបាននិយាយថា ជនសង្ស័យទាំង១៨នាក់ត្រូវតែដឹងថាតើអ្នកណាជាអ្នកសម្លាប់លោក Khashoggi ហើយអំពាវនាវម្តងហើយម្តងទៀតឲ្យបុរសទាំងនោះត្រូវបានកាត់ទោសនៅក្នុងប្រទេសទួរគី៕ AFP
Source: Kampuchea Thmey Daily
0 Comments