ប្រទេស​ទួរគី​ធ្វើជា​ម្ចាស់ផ្ទះ​នៃ​កិច្ចប្រជុំ​កំពូល​ស៊ី​រី​ជាមួយ​វត្តមាន​មេដឹកនាំ​រុស្ស៊ី បារាំង​និង​អាល្លឺម៉ង់

មេដឹកនាំ​នៃ​ប្រទេស​ទួរគី រុស្ស៊ី បារាំង​និង​អាល្លឺម៉ង់​នឹង​ជួបគ្នា​ក្នុង​ទីក្រុង​អ៊ី​ស្តង់​ប៊ុល​នៅ​ថ្ងៃ​សៅរ៍​ដើម្បី​ព្យាយាម​និង​ស្វែងរក​ដំណោះស្រាយ​នយោបាយ​យូរអង្វែង​មួយ​ចំពោះ​សង្គ្រាមស៊ីវិល​ស៊ី​រី ​និង​ពង្រឹង​បទ​ឈប់​បាញ់​ដ៏​ផុយស្រួយ​មួយ​នៅ​ខេត្ត​ភាគ​ខាងជើង​ដែល​កាន់កាប់​ដោយ​ពួក​ឧទ្ទាម​។​
​
ប្រធានាធិបតី​ទួរគី​លោក Recep Tayyip Erdogan នឹង​ទទួល​ប្រធានាធិបតី​រុស្ស៊ី​លោក Vladimir Putin, ប្រធានាធិបតី​បារាំង​លោក Emmanuel Macron និង​អធិការបតី​អាល្លឺម៉ង់​លោកស្រី Angela Merkel សម្រាប់​កិច្ចប្រជុំ​កំពូល​មួយ​ស្តីពី​ជម្លោះ​ដែល​ក្នុងនោះ​មាន​មនុស្ស​ជាង​៣៦០,០០០​នាក់​ត្រូវបាន​សម្លាប់​ចាប់តាំងពី​ឆ្នាំ​២០១១​មក​។​
​
ប្រទេស​រុស្ស៊ី​ដែល​គាំទ្រ​របប​ស៊ី​រី​របស់លោក​ប្រធានាធិបតី Bashar al-Assad ហើយ​ប្រទេស​ទួរគី​ដែល​គាំទ្រ​ពួក​ឧទ្ទាម​បានរៀបចំ​កិច្ចចរចា​កាលពី​លើក​មុន​ជាមួយ​អ៊ីរ៉ង់​ស្តីពី​បញ្ហា​នេះ​។​
​
ប៉ុន្តែ​កិច្ចប្រជុំ​កំពូល​នៅ​ថ្ងៃ​សៅរ៍​នឹង​ក្លាយជា​លើកដំបូង​ដែល​ប្រមូលផ្តុំ​មេដឹកនាំ​ទួរគី​និង​រុស្ស៊ី​ជាមួយ​ថ្នាក់ដឹកនាំ​នៃ​ប្រទេស​សំខាន់បំផុត​ទាំងពីរ​របស់​សហភាព​អឺរ៉ុប​។​
​
អ្នកនាំពាក្យ​ប្រធានាធិបតី​ទួរគី​លោក Ibrahim Kalin បាន​និយាយ​កាលពី​ថ្ងៃ​សុក្រ​ថា គោលដៅ​ចម្បង​គឺ​ត្រូវ​បញ្ជាក់​ពី​ជំហាន​ដែល​នឹងត្រូវ​ធ្វើ​សម្រាប់​ដំណោះស្រាយ​នយោបាយ​មួយ​និង​ដើម្បី​កំណត់​ផែនទី​បង្ហាញផ្លូវ​មួយ​។​
​
លោក Kalin បាន​ប្រាប់​ទីភ្នាក់ងារ​ព័ត៌មាន​រដ្ឋ Anadolu ថា ការរៀបចំ​គណកម្មកា​រ​មួយ​ដើម្បី​បង្កើត​រដ្ឋធម្មនុញ្ញ​ក្រោយ​សង្គ្រាម​របស់​ប្រទេស​ស៊ី​រី​ដែល​គេ​មើលឃើញថា​ជា​កត្តា​ដ៏​សំខាន់​មួយ​ក្នុង​ការរៀបចំ​ការបោះឆ្នោត​នៅក្នុង​ប្រទេស​ដែល​ហែកហួរ​ដោយ​សង្គ្រាម​មួយ​នេះនោះ​គឺ​នឹង​ក្លាយជា​ចំណុច​សំខាន់​មួយ​។​
​
គួរ​បញ្ជាក់ថា កិច្ចចរចា​នេះ​ក៏​នឹង​សម្លឹង​ឆ្ពោះទៅរក​ការពន្យារពេល​បទ​ឈប់​បាញ់​មួយ​នៅ​ជុំវិញ​ខេត្ត Idlib ដែល​កាន់កាប់​ដោយ​ពួក​ឧទ្ទាម​ផងដែរ​ដែល​នៅ​ទីនោះ ក្រុម​ផ្តល់ជំនួយ​បាន​ព្រមាន​ថា ការវាយលុក​របស់​យោធា​អាច​បង្ក​ឲ្យ​មាន​គ្រោះមហន្តរាយ​មនុស្សធម៌​អាក្រក់​បំផុត​នៃ​សង្គ្រាម​ប្រាំពីរ​ឆ្នាំ​៕ AFP
​

​

Source: Kampuchea Thmey Daily