លោក Donald Trump បានធ្វើដំណើរទៅវិហារក្រុង Pittsburgh កាលពីថ្ងៃអង្គារដែលជាកន្លែងមនុស្សចំនួន១១នាក់ត្រូវបានបាញ់សម្លាប់កាលពីចុងសប្តាហ៍នៅក្នុងការវាយប្រហារប្រឆាំងអម្បូរជ្វីហ្វមួយខណៈអ្នកតវ៉ាជាង១,៥០០នាក់បានប្រមូលផ្ដុំនៅក្បែរនោះដើម្បីបញ្ជាក់ឲ្យច្បាស់ថា ប្រធានាធិបតីអាមេរិកមិនត្រូវបានស្វាគមន៍ទេ។
ដោយមានកាន់បដាដែលសរសេរថា “ប្រធានាធិបតីគួរឲ្យស្អប់ ចាកចេញពីរដ្ឋរបស់យើងទៅ! ”, បាតុករបានប្រមូលផ្ដុំនៅជិតវិហារ Tree of Life ដែលជាកន្លែងនៃការសម្លាប់រង្គាលកាលពីថ្ងៃសៅរ៍។
លោក Trump ដែលអមដោយភរិយារបស់គាត់គឺលោកស្រី Melania បានទៅដល់នៅពេលល្ងាចហើយបានដាក់ផ្កាពណ៌សនិងដុំថ្មតូចមួយនៅលើផ្កាយនីមួយៗដែលរៀបចំឡើងដើម្បីរំលឹកដល់អ្នកស្លាប់នៅកន្លែងគោរពវិញ្ញាណក្ខន្ធបណ្តោះអាសន្នមួយនៅខាងក្រៅវិហារ Tree of Life។
កូនស្រីរបស់លោក Trump ឈ្មោះ Ivanka និងស្វាមីរបស់នាងឈ្មោះ Jared Kushner ដែលជាជនជាតិជ្វីហ្វក៏បានឈប់នៅត្រង់ចំណុចផ្កាយនីមួយៗផងដែរ។
បន្ទាប់មកអ្នកទាំងពីរបានចូលទៅក្នុងវិហារហើយអុជទានដើម្បីអធិដ្ឋានដល់អ្នកដែលត្រូវបានសម្លាប់ស្របពេលមានអ្នកតវ៉ានៅខាងក្រៅ។
ដំណើរដ៏ចម្រូងចម្រាសនេះបានកើតឡើងបន្ទាប់ពីអ្នកកាន់ទុក្ខជាច្រើនចូលទៅក្នុងវិហារនៅជិតនោះហើយបានចូលរួមពិធីដង្ហែសពតាមដងផ្លូវសម្រាប់ជនរងគ្រោះនៃការវាយប្រហារប្រឆាំងពួកជ្វីហ្វសាហាវបំផុតនៅក្នុងប្រវត្ដិសាស្ដ្រសម័យទំនើប។
ដំណើររបស់លោកប្រធានាធិបតីទៅរដ្ឋ Pennsylvania បានកើតឡើងចំពេលមានជម្លោះកើនឡើងយ៉ាងខ្លាំងអំពីថាតើវោហាសាស្ត្រដ៏កាចសាហាវរបស់គាត់នៅឯយុទ្ធនាការឃោសនានិងនៅលើ Twitter បានជួយជំរុញភាពជ្រុលនិយមដែរឬអត់មុនការបោះឆ្នោតពាក់កណ្តាលអាណត្តិនៅសប្តាហ៍ក្រោយ។
ជនសង្ស័យឈ្មោះ Robert Bowers កំពុងប្រឈមមុខនឹងការចោទប្រកាន់ជាច្រើនករណីទាក់ទងនឹងការបង្ហូរឈាមនៅព្រះវិហារ Tree of Life ដែលមានទីតាំងស្ថិតនៅសង្កាត់ Squirrel Hill សម្បូរដោយជនជាតិជ្វីហ្វរបស់ទីក្រុង៕ AFP
Source: Kampuchea Thmey Daily
0 Comments