ប្រទេសជាប់ទន្លេមេគង្គទាំង៥គឺ មីយ៉ាន់ម៉ា ថៃ ឡាវ កម្ពុជា និងវៀតណាម នឹងត្រៀមបញ្ជូនក្រុមជម្រើសជាតិក្រោមអាយុ១៧ឆ្នាំ (U17) ចូលរួមប្រកួតក្នុងពានរង្វាន់ JENESYS 2018 Japan-Mekong U-17 Football Exchange Tournament នៅប្រទេសជប៉ុន ដើមខែតុលា នេះ ខណៈមានក្រុមចំនួន៣ទៀតរបស់ម្ចាស់ស្រុកក៏ចូលរួមដែរ។
សម្រាប់ក្រុម U17របស់កម្ពុជា ដែលសហព័ន្ធកីឡាបាល់ទាត់កម្ពុជា បានកោះហៅរួមមាន ថា ច័ន្ទឬទ្ធី, វី អាមីលីន, សៀន សុភត្ត្រា, សៀង ចន្ធា, សឿត ណាវ៉ា, ធី វ៉ាឈុន, សៅ វ៉ៃហ្វី,ពៅ ចាន់ថេត, អាត អូនតូច, ផន អយ, ភេម តៅ សិញ, មិត សាមើល, កយ សាលីម, ស្រ៊ី ពិសិដ្ឋ,កាយ ហេងលី,ហ៊ត ឈិនជិន, ដោរ រ៉ូហ្ស៉ាន់,ជុំ សាវង្ស,អ៊ឹម វីនុន, ជួង មករា។
យោងតាមការបញ្ជាក់នៅលើវិបសាយផ្លូវការរបស់សហព័ន្ធកីឡាបាល់ទាត់ជប៉ុន (JFA) បានលើកឡើងថា ក្រុម U-17 កម្ពុជាស្ថិតក្នុងពូល A មានជម្រើសជាតិជប៉ុនវ័យក្រោម១៧ឆ្នាំ,មីយ៉ាន់ម៉ា និងវៀតណាម ខណៈពូល Bមាន U17 ថៃ ក្រុមយុវជនរបស់សាលា Japan High School Team, Japan Youth Team និងជម្រើសជាតិវ័យក្រោម១៧ឆ្នាំឡាវ។ ចំណែកកាលបរិច្ឆេទប្រកួតចាប់ផ្ដើមធ្វើឡើងនៅថ្ងៃទី០៥ ខែតុលា ដល់ថ្ងៃទី០៨ ខែតុលាឆ្នាំ២០១៨ ដោយប្រើប្រាស់ទីលាន២គឺកីឡដ្ឋាន National Training Center J-Village ក្នុងតំបន់ Futaba ខេត្តFukushima។
យោងតាមការកំណត់របស់គណៈកម្មការប្រកួតក្រុមទាំងអស់អនុញ្ញាតឲ្យយកកីឡាករវ័យ១៧ឆ្នាំចុះក្រោម ក្នុងមួយក្រុមមានកីឡាករចុះឈ្មោះ២០នាក់។ ក្រុមទាំង៨បែងចែកជា២ពូល ក្នុងមួយពូលមាន៤ក្រុម។ ការប្រកួតធ្វើឡើងក្នុងលក្ខណៈវិលជុំដើម្បីរក២ក្រុមដែលមានពិន្ទុខ្ពស់ជាងគេឡើងទៅវគ្គពាក់កណ្ដាលផ្ដាច់ព្រ័ត្រ និងវគ្គផ្តាច់ព្រ័ត្រ តែម្តង។
ក្រុម U17កម្ពុជា កំពុងតែដឹកនាំដោយលោក Lee Tae Hoon អតីតគ្រូបង្វឹកក្រុមជម្រើសជាតិកម្ពុជា និងជាគ្រូបង្វឹកសាលាបាល់ទាត់ជាតិបាទី ក្រោមអាយុ១៦ឆ្នាំ។ លោកទើបតែដឹកនាំក្រុមមកពីប្រកួតមិត្តភាពអន្តរជាតិនៅប្រទេសម៉ាឡេស៊ី ក៏ដូចជាប្រកួតក្នុងពានរង្វាន់ជើងឯកអាស៊ាន 2018 AFF U16 Championship នៅប្រទេសឥណ្ឌូណេស៊ី ផងដែរ ខណៈក្រុមនេះបានធ្លាក់ចេញត្រឹមវគ្គជម្រុះតាមពូលប៉ុណ្ណោះ៕
Source: Kampuchea Thmey Daily
0 Comments