ហ្សឺណែវ ៖ ក្រសួងពីររបស់កម្ពុជា មានក្រសួងពាណិជ្ជកម្ម និង ក្រសួងកសិកម្ម រុក្ខាប្រមាញ់ និងនេសាទ បានធ្វើការសហការ អគ្គលេខាធិការអង្គការអភិវឌ្ឍន៍ឧស្សាហកម្មរបស់អង្គការសហប្រជាជាតិ (UNIDO) ដើម្បីជំរុញការអភិវឌ្ឍវិស័យពាណិជ្ជកម្ម និងកសិកម្មនៅកម្ពុជា។
ក្រសួងពាណិជ្ជកម្មបានឲ្យដឹងថា លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម រួមជាមួយ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទកាលពី ថ្ងៃព្រហស្បតិ៍ ១រោច ខែអស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៥ ខែតុលា ឆ្នាំ២០១៨ បានទទួលជួប លោក លី យ៉ុង (Li Yong) អគ្គលេខាធិការអង្គការអភិវឌ្ឍន៍ឧស្សាហកម្មរបស់អង្គការសហប្រជាជាតិ (UNIDO) នៅស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជាប្រចាំអង្គការពាណិជ្ជកម្មពិភពលោក និងអង្គការអន្តរជាតិពាក់ព័ន្ធវិស័យសេដ្ឋកិច្ចពាណិជ្ជកម្ម នៅទីក្រុងហ្សឺណែវ ប្រទេសស្វីស។
នាឱកាសនោះ លោក លី យ៉ុង បានជម្រាបជូនដោយសង្ខេបនូវគម្រោង និងសកម្មភាពមួយចំនួនដែលអង្គការ UNIDO បាននិងកំពុងតែអនុវត្តនៅប្រទេសកម្ពុជា ជាពិសេសកម្មវិធីស្ដីពីភាពជាដៃគូប្រចាំប្រទេស (Programme for Country Partnership - PCP) ដែលជាកម្មវិធីចម្បងរបស់ UNIDO ក្នុងការគាំទ្រ និងជំរុញការអភិវឌ្ឍឧស្សាហកម្មនៅប្រទេសជាដៃគូ។ សម្រាប់កម្មវិធីនេះ UNIDO នឹងសហការយ៉ាងជិតស្និទ្ធជាមួយនឹងរាជរដ្ឋាភិបាល និងវិស័យឯកជន ក្នុងការកៀងគរធនធានបន្ថែមដើម្បីអនុវត្តកម្មវិធីនេះ ជាពិសេសសម្របសម្រួលជាមួយក្រុមហ៊ុនចិន និងជប៉ុន ដែលមានចំណាប់អារម្មណ៍វិនិយោគក្រោមក្របខណ្ឌភាពជាដៃគូនេះ។
ក្រៅពីនេះផងដែរ លោកអគ្គនាយក បានឲ្យដឹងថា UNIDO កំពុងតែអនុវត្តគម្រោងមួយចំនួនទៀតផងដែរទាក់ទងទៅនឹងការអភិវឌ្ឍឧស្សាហកម្ម រួមមានតំបន់សេដ្ឋកិច្ចពិសេស និងខ្សែសង្វាក់តម្លៃកសិកម្ម គម្រោងកាត់បន្ថយជាតិកាបូន គម្រោងជលផល CaPFish ដែលនឹងធ្វើការពង្រឹងលើប្រព័ន្ធគុណភាព អនាម័យ និងភូតគាមអនាម័យនៅក្នុងវិស័យជលវប្បកម្ម និងកិច្ចសហប្រតិបត្តិការជាមួយក្រសួងពាណិជ្ជកម្មក្នុងការធ្វើបច្ចុប្បន្នភាពយុទ្ធសាស្ត្រសមាហរណកម្មពាណិជ្ជកម្មកម្ពុជា ២០១៩-២០២៣។
ជាកិច្ចឆ្លើយតប លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម ក៏បានថ្លែងអំណរគុណចំពោះ UNIDO ដែលបានសហការគ្នាល្អជាមួយក្រសួងពាណិជ្ជកម្ម ជាពិសេសតាមរយៈគម្រោងមួយចំនួនដែលស្ថាប័នទាំងពីរបានអនុវត្តរួមគ្នា។ លោក រដ្ឋមន្ត្រី បានសង្កត់ធ្ងន់លើកិច្ចសហការនៅក្នុងការរៀបចំយុទ្ធសាស្ត្រសមាហរណកម្មពាណិជ្ជកម្មកម្ពុជា ជាពិសេសលើជំពូកស្ដីពីពាណិជ្ជកម្មតាមអេឡិចត្រូនិក ដែលជាគោលដៅអាទិភាពមួយរបស់ក្រសួងពាណិជ្ជកម្ម ជាពិសេសការជួយដល់សហគ្រាសធុនតូច និងមធ្យម ក្នុងការទាញយកផលចំណេញតាមរយៈការធ្វើពាណិជ្ជកម្មបែបថ្មី និងមិនមានព្រំដែន។
នៅក្នុងការងារពាណិជ្ជកម្មតាមអេឡិចត្រូនិកនេះ លោកក៏បានជម្រាបជូនផងដែរថា លោកបានស្វះស្វែងជួបជាមួយប្រតិបត្តិករពាណិជ្ជកម្មតាមអេឡិចត្រូនិកមួយចំនួនរួចហើយដែរ ដើម្បីឲ្យគេមកសិក្សា និងជួយរៀបចំប្រព័ន្ធ Ecosystem សម្រាប់វិស័យនេះនៅកម្ពុជា។ ក្រៅពីនោះផងដែរ លោក រដ្ឋមន្ត្រីពាណិជ្ជកម្ម បានស្នើសុំឲ្យ UNIDO បន្តគាំទ្រលើការបណ្ដុះបណ្ដាលបច្ចេកទេសវិចខ្ចប់ អភិវឌ្ឍន៍សមត្ថភាព និងជំរុញការកែច្នៃ ដើម្បីបង្កើតតម្លៃបន្ថែមសម្រាប់នាំចេញ។ ចំពោះការអភិវឌ្ឍតំបន់សេដ្ឋកិច្ចពិសេស លោករដ្ឋមន្ត្រី បានគូសបញ្ជាក់ថា កម្ពុជាបានជំរុញការអភិវឌ្ឍវិស័យកម្មន្ដសាលធុនស្រាល ជាពិសេសការផលិតផ្នែក និងគ្រឿងផ្សំរថយន្ត និងគ្រឿងផ្សំដទៃទៀតនៅតាមតំបន់សេដ្ឋកិច្ចពិសេសតាមព្រំដែន ដើម្បីនាំចេញទៅប្រទេសជិតខាងដែលមានរោងចក្រផ្សំផ្គុំផលិតផលសម្រេច។
នៅក្នុងជំនួបនោះដែរ លោក វេង សាខុន រដ្ឋមន្ត្រីក្រសួងកសិកម្ម ក៏បានកោតសរសើរ UNIDO ដែលបានសហការយ៉ាងជិតស្និទ្ធជាមួយក្រសួងកសិកម្ម រុក្ខាប្រមាញ់ និងនេសាទ និងបានស្នើសុំឲ្យ UNIDO ជួបបន្ថែមទៀតនៅក្នុងការជំរុញការកែច្នៃផលិតផលជលផលសមុទ្រ និងបណ្ដុះបណ្ដាលជលវប្បកម្ម មិនត្រឹមតែសម្រាប់ទីផ្សារក្នុងស្រុកប៉ុណ្ណោះទេ ថែមទាំងសំដៅដល់ការនាំចេញបន្ថែមទៀត។
ជាមួយនោះផងដែរ លោក រដ្ឋមន្ត្រីកសិកម្ម ក៏បានស្នើសុំឲ្យ UNIDO សិក្សា និងពង្រឹងប្រព័ន្ធអនាម័យ និងភូតគាមអនាម័យលើផលិតផលសក្ដានុពលសម្រាប់នាំចេញ ជាពិសេសទៅកាន់ទីផ្សារប្រទេសចិនមួយចំនួន ដូចជាអង្ករ ពោត ស្វាយ និងរុក្ខផលដទៃទៀត ដែលកម្ពុជាមានលទ្ធភាពផលិត ប៉ុន្តែមិនទាន់អាចនាំចេញបាន។
លោក លី យ៉ុង បានឯកភាពលើការលើកឡើង និងគំនិតផ្ដួចផ្ដើម ដែលសុទ្ធតែជាចំណុចល្អៗសម្រាប់ជំរុញការអភិវឌ្ឍវិស័យពាណិជ្ជកម្ម និងកសិកម្មនៅកម្ពុជា។ លោកអគ្គលេខាធិការ បានទទួលយកសំណើរបស់លោករដ្ឋមន្ត្រីទាំងពីររូប និងសន្យាថានឹងបន្តកិច្ចសហប្រតិបត្តិការជាមួយស្ថាប័នទាំងពីរឲ្យកាន់តែស្អិតរមួតបន្ថែមទៀត៕
Source: Kampuchea Thmey Daily
0 Comments