ការប្រកួតជម្រុះដណ្តើមខ្សែក្រវាត់ជើងឯកWurkz ទម្ងន់៦៧គីឡូក្រាម នៅសង្វៀនទូរទស្សន៍SEA TV នារសៀលថ្ងៃអាទិត្យទី១៤ ខែតុលា ឆ្នាំ២០១៨នេះ ជាការប្រកួតសប្តាហ៍ទី៤ ជុំទី២ រវាងអ្នកប្រដាល់កម្ពុជា រឿង សារ័ត្ន ក្លិបកងពលតូចទ័ពឆ័ត្រយោង៩១១ និងអ្នកប្រដាល់ថៃ Pheach Aroun ហើយអ្នកប្រដាល់កម្ពុជាជឹម ចិត្រា ក្លិបខ្លារខិនមានរិទ្ធ និង អ្នកប្រដាល់ថៃ Kao Ah។
សម្រាប់ជំនួបក្នុងជុំទី២នេះ អ្នកប្រដាល់ថៃKao Ah ត្រូវបានឈ្នះដោយស្វ័យប្រវត្តិ ដោយសារអ្នកប្រដាល់កម្ពុជាជឹម ចិត្រា បានអវត្ថមានបោះបង់ការប្រកួត។ ដូច្នេះ Kao Ahគេបានគេបាន៤ពិន្ទុ ក្នុងការប្រកួតពីរជុំនេះ ឯជឹម ចិត្រា បាន១ពិន្ទុដដែលក្នុងពីរជុំនេះ។
ទោះបីត្រូវឈ្នះស្វ័យប្រវត្តិក្តី Kao Ah ត្រូវគេផ្គូផ្គងអោយប្រកួតជាមួយអ្នកប្រដាល់កម្ពុជា ជា សំនៀង ក្លិបកងពលតូចទ័ពឆ័ត្រយោង៩១១ ជាលក្ខណៈមិត្តភាពដែរ។
Kao Ah តាមមើលគេមិនអាចឈ្នះជា សំនៀងនោះឡើយ ព្រោះថាបទពិសោធន៍របស់គេតិចជាងសំនៀង ជិតពាក់កណ្តាលឯណោះ។ ប្រវត្តិប្រកួតរបស់ Kao Ah បានចំនួន៦៣លើក ឈ្នះ៥៣លើក ចាញ់១០លើក មិនដែលស្មើ ។ ចំណែកប្រវត្តិប្រកួតរបស់ ជា សំនៀង គឺ៩៥លើក ឈ្នះ៧៤លើក ចាញ់១៨លើក និងស្មើ០៣លើក។
ចំពោះការជួបប្រកួតរវាង រឿង សារ័ត្ន និង Pheach Aroun វិញ ពួកគេទាំងពីរនាក់នេះ មិនធ្លាប់ជួបគ្នាទេកន្លងមក ។ពីរនាក់នេះ គេមានសមត្ថភាពប្រហាក់ប្រហែលគ្នាទេ ហើយមាឌ ក៏ប្រហែលគ្នាដែរ ប៉ុន្តែគេចាញ់កម្ពស់ថៃ ដោយគេមានកម្ពស់១,៦៥ម៉ែត្រ ខណះ Pheach Aroun គេ១,៧១ ម៉ែត្រ។
Pheach Aroun គេមានកំនត់ត្រាប្រកួតចំនួន៩១លើក ឈ្នះ៨១លើក និង ចាញ់១០ លើក មិនដែលស្មើ។ ចំណែក រឿង សារ័ត្ន គេមានកំនត់ត្រាប្រកួត៨០លើក ឈ្នះ៦០លើក ចាញ់១៦ លើក និងស្មើ០៤លើក ។
ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ។ ប៉ុន្តែយ៉ាងណា រឿង សារ័ត្ន ជួប Pheach Aroun នៅក្នុងព្រឹត្តិការណ៍ខ្សែក្រវាត់ជុំទី២នេះ គេប្រហែលជាពុំមានសំណាងល្អនោះទេ ព្រោះ Pheach Aroun ជាអ្នកប្រដាល់ថៃជើងចាស់និងធ្លាប់វាយឈ្នះអ្នកប្រដាល់កម្ពុជាច្រើននាក់ហើយ។
អ្នកប្រដាល់ថៃរូបនេះ មានរបៀបវាយល្អ គឺវាយដោយមិនបង្ខំ គេវាយចេញមួយៗតែច្បាស់ហើយវាយចេញភាគច្រើនចំគោលដៅបានល្អ ។ ដូច្នេះ ចាំមើល ការប្រកួតក្នុងជុំទី២នេះ តើរឿង សារ័ត្ន អាចយកឈ្នះ Pheach Aroun បានឬអត់នោះ ?។
ចំពោះ ការប្រកួតក្រៅពីគូខ្សែក្រវាត់នេះ ឆាយ មាស អ្នកប្រដាល់ក្លិបសំរោងកោងកីឡាខេត្តបាត់ដំបង នឹងជួបប្រកួតជាមួយថន ភឿត អ្នកប្រដាល់ក្លិបឃ្លាំងមឿងកីឡា។សម្រាប់ការជួបគ្នារវាងអ្នកប្រដាល់ទាំងពីរនាក់នេះ គេមិនហ៊ានទស្សន៍ទាយមុនថា នរណាឈ្នះ នរណាចាញ់នោះឡើយ ព្រោះថាពួកគេទាំងពីរ មិនធ្លាប់មានប្រវត្តិជួបគ្នាទេពីមុនមក ។
រឿន សុខលី អ្នកប្រដាល់ក្លិបការិយាល័យទី៥ កងទ័ពជើងគោក នឹងជួបប្រកួតជាមួយសយ សី អ្នកប្រដាល់ក្លិបវិបុលដារិទ្ធពោធិសែនជ័យ ដោយប្រកួតក្នុងទម្ងន់៥៤គីឡូក្រាម។ពួកគេពីរនាក់នេះ មិនដែលជួបគ្នាទេកន្លងមក ។ ចាំមើល រវាងរឿន សុខលី និង សយ សី នេះ តើនរណាឈ្នះ ?៕
Source: Kampuchea Thmey Daily
0 Comments