សម្ដេច​តេ​ជោ ហ៊ុន សែន នឹង​ដឹកនាំ​គណៈប្រតិភូ​ទៅ​ចូលរួម​កិច្ចប្រជុំ​កំពូល​អាស៊ាន​លើក​ទី​៣៣ និង​កិច្ចប្រជុំ​កំពូល​ពាក់ព័ន្ធ រយៈពេល​៣​ថ្ងៃ ​នៅ​សិង្ហ​បុរី

ភ្នំពេញ​ ៖​ តប​តាម​ការ​អញ្ជើញ​របស់​ឯកឧត្ដម លី សៀន​ឡុង​ (Lee Hsien Loong) ​នាយករដ្ឋមន្ត្រី​ នៃ​សាធារណរដ្ឋ​សិង្ហ​បុរី សម្ដេច​អគ្គ​មហា​សេនាបតី​តេ​ជោ ហ៊ុន សែន នាយករដ្ឋមន្ត្រី ​នៃ​ព្រះរាជាណាចក្រ​កម្ពុជា នឹង​ដឹកនាំ​គណៈប្រតិភូ​ជាន់ខ្ពស់​អញ្ជើញ​ទៅ​ចូលរួម​កិច្ចប្រជុំ​កំពូល​អាស៊ាន​លើក​ទី​៣៣ និង​កិច្ចប្រជុំ​កំពូល​ពាក់ព័ន្ធ ដែល​នឹង​ប្រព្រឹត្តទៅ​ក្រោម​មូលបទ “​ភាព​រឹងមាំ និង​នវានុវត្តន៍​របស់​អាស៊ាន​” ពីថ្ងៃ​ទី​១៣ ដល់​ថ្ងៃទី​១៥ ខែ​វិច្ឆិកា ឆ្នាំ​២០១៨ នៅ​ប្រទេស​សិង្ហ​បុរី នេះ​បើតាម​សេចក្ដី​ប្រកាស​ព័ត៌មាន​។​

នៅ​ប្រទេស​សិង្ហ​បុរី សម្ដេច​តេ​ជោ​នាយករដ្ឋមន្ត្រី នឹង​អញ្ជើញ​ចូលរួម​ក្នុង​កិច្ចប្រជុំ​កំពូល​មួយចំនួន​ដូចជា កិច្ចប្រជុំ​កំពូល​អាស៊ាន លើក​ទី​៣៣ / ការ​ពិសា​អាហារ​ការងារ​ពេល​ល្ងាច សម្រាប់​ថ្នាក់ដឹកនាំ​អាស៊ាន​, កិច្ចប្រជុំ​កំពូល​ក្រៅផ្លូវការ​អាស៊ាន​-​អូស្ត្រាលី អមដោយ​អាហារ​ពេលព្រឹក​, កិច្ចប្រជុំ​កំពូល​អាស៊ាន​-​ចិន លើក​ទី​២១, កិច្ចប្រជុំ​កំពូល​អាស៊ាន​-​សាធារណរដ្ឋ​កូរ៉េ លើក​ទី​២០ , កិច្ចប្រជុំ​កំពូល​អាស៊ាន​-​រុស្ស៊ី លើក​ទី​៣, កិច្ចប្រជុំ​កំពូល​អាស៊ាន​-​ជប៉ុន លើក​ទី​២១, កិច្ចប្រជុំ​កំពូល​ក្រៅផ្លូវការ​អាស៊ាន​-​ឥណ្ឌា អម​ដោយ​អាហារ​ពេលព្រឹក​, កិច្ចប្រជុំ​កំពូល​អាស៊ាន​-​សហរដ្ឋអាមេរិក លើក​ទី​៦, កិច្ចប្រជុំ​កំពូល​អាស៊ាន​បូក​បី លើក​ទី​២១, កិច្ចប្រជុំ​កំពូល​អាស៊ី​បូព៌ា លើក​ទី​១៣ (​ពេញអង្គ​), កិច្ចប្រជុំ​កំពូល​អាស៊ី​បូព៌ា (​ចង្អៀត​) អម​ដោយ​អាហារ​ថ្ងៃត្រង់ និង​កិច្ចប្រជុំ​ថ្នាក់ដឹកនាំ​ នៃ​ភាពជា​ដៃគូ​សេដ្ឋកិច្ច​ទូលំទូលាយ​ក្នុង​តំបន់​លើក​ទី​២​។

អញ្ជើញ​អមដំណើរ​សម្ដេច​តេ​ជោ​នាយករដ្ឋមន្ត្រី រួមមាន ឯកឧត្ដម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និង​សហប្រតិបត្តិការ​អន្តរជាតិ ឯកឧត្ដម ប៉ាន សូរ​ស័ក្តិ រដ្ឋមន្ត្រី​ពាណិជ្ជកម្ម ឯកឧត្ដម​បណ្ឌិត ហង់ ជួន ណា​រ៉ុ​ន រដ្ឋមន្ត្រី​អប់រំ យុវជន និង​កីឡា ព្រមទាំង​ឥស្សរជន​ជាន់ខ្ពស់ ​នៃ​រាជ​រដ្ឋាភិបាល និង​ថ្នាក់ដឹកនាំ​ធុរកិច្ច​ នៃ​សភា​ពាណិជ្ជកម្ម​កម្ពុជា​ផងដែរ​។​

ស្របពេល​កិច្ចប្រជុំ​កំពូល​នេះ សម្ដេច​តេ​ជោ​នាយករដ្ឋមន្ត្រី នឹង​អញ្ជើញ​ចូលរួម​ក្នុង​ប្រជុំ និង​កម្មវិធី​មួយ​ចំនួន​ដូចជា កិច្ចប្រជុំ​ជាមួយ​ក្រុមប្រឹក្សា​ពិគ្រោះ​យោបល់​ធុរកិច្ច​អាស៊ាន​, កម្មវិធី​អាហារ​ការងារ​ថ្ងៃត្រង់​រៀបចំ​ដោយ​ឯកឧត្ដម លី សៀន​ឡុង សម្រាប់​ថ្នាក់ដឹកនាំ​អាស៊ាន និង ពិធី​លៀង​សាយ​ភោជន (Gala Dinner) រៀបចំ​ដោយ​ប្រធាន​កិច្ចប្រជុំ សម្រាប់​ថ្នាក់ដឹកនាំ​អាស៊ាន​។

សេចក្ដីប្រកាស​ព័ត៌មាន ចុះ​ថ្ងៃទី​០៩ ខែវិច្ឆិកា ឆ្នាំ​២០១៨ បាន​បញ្ជាក់​ថា ក្នុងអំឡុងពេល​ស្នាក់នៅ​ប្រទេស​សិង្ហ​បុរី សម្ដេច​តេ​ជោ​នាយករដ្ឋមន្ត្រី នឹង​មាន​ជំនួប​ទ្វេភាគី ជាមួយ​ប្រមុខ​គណៈប្រតិភូ​ នៃ​ប្រទេស​មួយចំនួន​ផងដែរ​។

ក្នុងការ​ត្រៀម​រៀបចំ​កិច្ចប្រជុំ​កំពូល​អាស៊ាន​លើក​ទី​៣៣ និង​កិច្ចប្រជុំ​កំពូល​ពាក់ព័ន្ធ ឯកឧត្ដម​ឧបនាយករដ្ឋមន្ត្រី ប្រាក់ សុខុន នឹង​អញ្ជើញ​ចូលរួម​ក្នុង​កិច្ចប្រជុំ​ក្រុមប្រឹក្សា​សហគមន៍​នយោបាយ​-​សន្តិសុខ​អាស៊ាន លើក​ទី​១៨ និង​កិច្ចប្រជុំ​ក្រុមប្រឹក្សា​សម្របសម្រួល​អាស៊ាន លើក​ទី​២២ ដែល​កិច្ច​ប្រជុំ​ទាំងពីរ​នេះ នឹង​ប្រព្រឹត្តទៅ​នៅមុន​កិច្ចប្រជុំ​កំពូល​អាស៊ាន៕

Source: Kampuchea Thmey Daily