អ្នកនយោបាយ​លី​ប៊ី​កំណត់​យក​កិច្ចប្រជុំ​កំពូល​នៅ​ប្រទេស​អ៊ីតាលី​ដើម្បី​ដោះស្រាយ​វិបត្តិ

អ្នកនយោបាយ​សំខាន់ៗ​របស់​ប្រទេស​លី​ប៊ី​គ្រោង​នឹង​ជួប​បណ្តា​ថ្នាក់ដឹកនាំ​ពិភពលោក​ក្នុងប្រទេស​អ៊ីតាលី​នៅ​សប្តាហ៍​ក្រោយនេះ​ក្នុងការ​ប៉ុនប៉ង​ចុងក្រោយ​បំផុត​ដោយ​មហាអំណាច​ធំៗ​ដើម្បី​ចាប់ផ្តើម​ដំណើរការ​នយោបាយ​ដែល​ជាប់គាំង​យូរអង្វែង​មួយ​និង​ធ្វើ​ឲ្យ​មានការ​បោះឆ្នោត​។​

ជំនួប​កំពូល​ក្នុង​ទីក្រុង​ប៉ារីស​កាលពី​ខែឧសភា​បានធ្វើ​ឲ្យ​រដ្ឋាភិបាល Government of National Accord (GNA) ដែលមាន​មូលដ្ឋាន​នៅ​រដ្ឋធានី Tripoli និង​រដ្ឋាភិបាល​ភាគ​ខាងកើត​របស់​បុរស​ខ្លាំង​លី​ប៊ី Khalifa Haftar ព្រមព្រៀងគ្នា​ដើម្បី​រៀបចំ​ការបោះឆ្នោត​ថ្នាក់ជាតិ​មួយ​នៅ​ថ្ងៃទី​១០​ខែធ្នូ​។​

ប៉ុន្តែ​ដោយ​ទទួលស្គាល់​អំពី​ស្ថានការណ៍​នយោបាយ​ដ៏​វឹកវរ​ចាប់តាំងពី​មេដឹកនាំ​ផ្តាច់ការ Moamer Kadhafi ត្រូវបាន​ទម្លាក់​នៅក្នុង​ឆ្នាំ​២០១១​នោះ អង្គការសហប្រជាជាតិ​កាលពី​ថ្ងៃ​ព្រហស្បតិ៍​បាន​ទទួលស្គាល់ថា ការបោះឆ្នោត​នឹង​មិនអាច​សម្រេច​បានទេ​មុន​និ​ទាឃ​រដូវ​ឆ្នាំ​២០១៩​។​

ក្រុមអ្នកវិភាគ​បាន​និយាយថា កិច្ចប្រជុំ​កំពូល​នៅ​សប្តាហ៍​ក្រោយ​ក្នុង​ទីក្រុង Palermo នឹងមាន​ហានិភ័យ​មិន​ត្រឹមតែ​ដោយសារ​ភាព​តានតឹង​រវាង​បក្សពួក​លី​ប៊ី​ប៉ុណ្ណោះ​ទេ​ប៉ុន្តែ​ក៏​ជា​របៀបវារៈ​ប្រកួតប្រជែង​របស់​មហាអំណាច​បរទេស​ផងដែរ​។​

នៅ​ខែឧសភា បក្សពួក​លី​ប៊ី​សំខាន់ៗ​ដែល​ត្រូវបាន​គេ​អញ្ជើញ​គឺមាន​លោក Haftar, ប្រធានសភា​ភាគ​ខាងកើត​លោក Aguila Salah, ប្រមុខ GNA លោក Fayez al-Sarraj និង​លោក Khaled al-Mechri ដែលជា​ប្រធានសភា​ជាន់ខ្ពស់​មាន​មូលដ្ឋាន​នៅ​ទីក្រុង Tripoli ។​

ក្នុង​បទសម្ភាសន៍​ជាមួយ AFP កាលពី​ថ្ងៃ​ព្រហស្បតិ៍​, លោក Sarraj បាន​ជំរុញ​ឲ្យ​សហគមន៍​អន្តរជាតិ​ស្វែងរក “​ចក្ខុវិស័យ​រួម​” មួយ​សម្រាប់​អនាគត​នៃ​ប្រទេស​អាហ្វ្រិក​ខាងជើង​របស់គាត់​ដែល​រងគ្រោះ​ដោយ​ភាពវឹកវរ​។​

សហរដ្ឋអាមេរិក បណ្តា​ប្រទេស​អារ៉ាប់​និង​បណ្តា​ប្រទេស​នៅ​អឺរ៉ុប​នឹង​បញ្ជូន​តំណាង​របស់​ពួកគេ​ទៅកាន់​កិច្ចចរចា​ដែល​នឹង​ប្រព្រឹត្តទៅ​នៅ​ថ្ងៃ​ចន្ទ​និង​អង្គារ​។​

បេសកជន​អង្គការសហប្រជាជាតិ​លោក Ghassan Salame បាន​ប្រាប់​ក្រុមប្រឹក្សាសន្តិសុខ​កាលពី​ថ្ងៃ​ព្រហស្បតិ៍​ថា សន្និសីទ​ថ្នាក់ជាតិ​មួយ​នៅ​ដើមឆ្នាំ​២០១៩​នឹង​ត្រូវបាន​រៀបចំឡើង​ដើម្បី​ផ្តល់នូវ “​វេទិកា​មួយ​” សម្រាប់​ប្រជាជន​លី​ប៊ី​ដើម្បី​បញ្ជាក់​ពី​ចក្ខុវិស័យ​របស់​ពួកគេ​នាពេល​អនាគត​៕ AFP

​

Source: Kampuchea Thmey Daily