សហរដ្ឋអាមេរិក​បដិសេធ​ “​សង្គ្រាមត្រជាក់​” ជាមួយ​ចិន​ ប៉ុន្តែ​ភាព​ខុសគ្នា​ខ្លាំងក្លា​នៅតែ​មាន

សហរដ្ឋអាមេរិក​កាលពី​ថ្ងៃ​សុក្រ​បាន​ទទូច​ថា ខ្លួន​មិនបាន​បន្ត “​សង្គ្រាមត្រជាក់​” ជាមួយ​ប្រទេស​ចិន​ទេ ​ប៉ុន្តែ​មហាអំណាច​តំបន់​ប៉ាស៊ីហ្វិក​ទាំងពីរ ​បាន​បង្ហាញ​ពី​ភាព​ខ្វែងគំនិត​គ្នា​ក្នុង​អំឡុង​កិច្ចពិភាក្សា​កម្រិត​ខ្ពស់។

ប្រមុខ​ការពារជាតិ​និង​មន្ត្រី​កិច្ចការបរទេស​ជាន់ខ្ពស់​នៃ​ប្រទេស​ទាំងពីរ​បាន​ជួបគ្នា​នៅ​ទីក្រុង​វ៉ាស៊ីនតោន​សម្រាប់​កិច្ចសន្ទនា​ជា​ទៀងទាត់​មួយ​ចំពេល​មាន​ភាព​តានតឹង​កាន់តែខ្លាំង​ឡើង​រយៈពេល​ច្រើន​ខែ​រវាង​ប្រទេស​ដែលមាន​សេដ្ឋកិច្ច​ធំជាងគេ​ទាំងពីរ​របស់​ពិភពលោក​។​

បន្ទាប់ពី​លោក​ប្រធានាធិបតី​អាមេរិក Donald Trump បាន​និយាយ​រិះគន់​ប្រឆាំង​ប្រទេស​ចិន​ក្នុងការ​បោះឆ្នោត​សភា​នៅ​សប្តាហ៍​នេះ រដ្ឋមន្ត្រីការបរទេស​លោក Mike Pompeo បាន​ក្លាយជា​អ្នក​ផ្សះផ្សា​។​
​
លោក Pompeo បាន​ប្រាប់​សន្និសីទ​សារព័ត៌មាន​រួមមួយ​ថា “​សហរដ្ឋអាមេរិក​មិនបាន​បន្ត​សង្គ្រាមត្រជាក់​ឬ​គោលនយោបាយ​ទប់ស្កាត់​ជាមួយ​ប្រទេស​ចិន​ទេ​។ ផ្ទុយទៅវិញ យើង​ចង់​ធានាថា ប្រទេស​ចិន​បានធ្វើ​សកម្មភាព​ប្រកបដោយ​ការទទួលខុសត្រូវ​និង​យុត្តិធម៌​ដើម្បី​គាំទ្រ​សន្តិសុខ​និង​វិបុលភាព​នៅក្នុង​ប្រទេស​នីមួយៗ​របស់​យើង​”​។​
​
ខណៈពេលដែល​រដ្ឋបាល​លោក Trump ជាទូទៅ​បាន​និយាយ​ទន់ភ្លន់​អំពី​សិទ្ធិមនុស្ស​នោះ លោក Pompeo បានប្រកាស​ថ្កោលទោស​ការបង្ក្រាប​របស់​ចិន​លើ​ក្រុម​សាសនា​និង​ក្រុម​ជនជាតិភាគតិច​រាប់បញ្ចូល​ទាំង​សហគមន៍​អ៊ុយ​ហ្គ័​រ​ផងដែរ​ដោយ​លើកឡើង​ពី​របាយការណ៍​របស់​អង្គការសហប្រជាជាតិ​ដែលថា មាន​សមាជិក​នៃ​ជនជាតិភាគតិច​មូស្លីម​រហូតដល់​ទៅមួយ​លាន​នាក់​បាន​ជាប់​នៅក្នុង​ជំរំ​ឃុំឃាំង​។​
​
ហើយ​អំពី​បញ្ហា​កោះ​តៃវ៉ាន់ លោក Pompeo បាន​និយាយ​ឥត​លាក់លៀម​អំពី​ការតស៊ូ​មតិ​ចំពោះ​កោះ​លទ្ធិប្រជាធិបតេយ្យ​ដែល​កាន់អំណាច​ដោយ​ខ្លួនឯង​មួយ​នេះ​ដោយ​រិះគន់​កិច្ចខិតខំ​ប្រឹងប្រែង​រប​ស់​ទីក្រុង​ប៉េកាំង​ក្នុងការ​កាត់ផ្តាច់​កោះ​ដែល​ខ្លួន​ចាត់ទុកថា​ជា​ខេត្ត​រឹង​ចចេស​មួយ​នេះ​។​
​
សហរដ្ឋអាមេរិក​ក៏បាន​លើកយក​បញ្ហា​យោធា​របស់​ក្រុង​ប៉េកាំង​នៅក្នុង​ជម្លោះ​សមុទ្រ​ចិន​ខាងត្បូង​ផងដែរ​ដែល​គេ​បានឃើញ​ហេតុការណ៍​ជាច្រើន​មានដូចជា​ការព្រមាន​យន្តហោះ​ស៊ើបការណ៍​កងទ័ពជើងទឹក​អាមេរិក​ដោយ​យន្តហោះ​ចម្បាំង​ចិន​កាលពី​ឆ្នាំមុន​ជាដើម​។​
​រដ្ឋមន្ត្រី​ការពារជាតិ​អាមេរិក​លោក Jim Mattis បាន​និយាយថា កិច្ចចរចា​នេះ​គឺ “​ស្មោះត្រង់​” ប៉ុន្តែ​ថា កងទ័ព​ទាំងពីរ​បាន​សម្លឹង​ទៅមុខ​ដើម្បី​ធ្វើ​ឲ្យ​ប្រសើរឡើង​នូវ​ទំនាក់ទំនង​និង​ចៀសវាង “​ការ​គណនា​ខុស​” នៅតាម​សមុទ្រ​។​
​
គួរ​បញ្ជាក់ថា កិច្ចចរចា​នេះ​បាន​ធ្វើឡើង​ប៉ុន្មាន​សប្តាហ៍​មុនពេល​លោក Trump នឹង​ជួប​ជាមួយ​ប្រធានាធិបតី​ចិន​លោក Xi Jinping នៅ​ខាងក្រៅ​កិច្ចប្រជុំ​ក្រុម​ប្រទេស 20 ក្នុងប្រទេស​អា​ហ្ស​ង់​ទីន​ដែលជា​អាចជា​ឱកាស​ដ៏​ធំ​មួយ​ក្នុងការ​ដោះស្រាយ​វិវាទ​៕ AFP

​

Source: Kampuchea Thmey Daily