ក្រុមហ៊ុនស៊ីនទ្រី ត្រៀមរថយន្តដឹកសំរាមជិត៥០គ្រឿង និងកម្មករជិត៥០០នាក់ ដើម្បីប្រមូល និងដឹកជញ្ជូនសំរាម ក្នុងព្រះរាជពិធីបុណ្យ អុំទូក

ភ្នំពេញ ៖ ក្នុងព្រះរាជ ពិធីបុណ្យអុំទូក អកអំបុក បណ្ដែតប្រទីប និងសំពះព្រះខែ រយៈពេល៣ថ្ងៃ ខាងមុខនេះក្រុមហ៊ុនស៊ីនទ្រី បានត្រៀមរថយន្តដឹកសំរាមចំនួន៤៩គ្រឿង និងកម្មករចំនួន ៤៨៩នាក់ និងសម្ភារមួយចំនួន សម្រាប់ ដឹកជញ្ជូនសំរាម ក្នុងព្រះរាជពិធីបុណ្យ អុំទូកអកអំបុក បណ្ដែតប្រទីប និងសំពះព្រះខែ នៅថ្ងៃទី២១ ២២ និងថ្ងៃទី ២៣ ខែវិឆ្ឆិកា ឆ្នាំ២០១៨ ខាងមុននេះ ដើម្បី ចូលរួមធ្វើការសំអាតឲ្យបានទាន់ពេល។

ប្រធានប្រតិបត្តិ ផ្នែកប្រមូល និងដឹកជញ្ជូនសំរាមរបស់ក្រុមហ៊ុនស៊ីនទ្រី លោក ខៀវ វុទ្ធី បានលើកឡើងថា រយៈពេល៣ថ្ងៃ នៃពិធីបុណ្យអុំទូកនេះ ស៊ីនទ្រីមានគោលការណ៍ច្បាស់លាស់ បែងចែកកម្មករជាពីរក្រុម មានវេនថ្ងៃ និងវេនយប់ ក្នុងនោះសម្រាប់វេនថ្ងៃចាប់ពីម៉ោង៥ភ្លឺ ដល់ម៉ោង៣រសៀល។ វេនយប់ចាប់ពីម៉ោង១១យប់ ដល់ម៉ោង៧ព្រឹក ដោយមានកម្មករបោសសំអាតជាង ៤៨៩នាក់ និងរថយន្តប្រមូល និងដឹកជញ្ជូនសំរាមចំនួន ៤៩គ្រឿង។ ក្រៅពី កម្លាំងបោសសំអាត និងរថយន្តដឹកជញ្ជូន នៅមានរទេះអូសសំរាមចំនួន១៨គ្រឿង ធុងDamster ឬដេប៉ូទុកដាក់សំរាមចំនួន ៧ធំៗ និងមានកញ្ឆេរ សម្រាប់ពង្រាយដាក់តាមសួនច្បារ ដងផ្លូវ និងកន្លែងប្រគំតន្ត្រីចំនួន១២០២បន្ថែមទៀត។

លោក ប្រធានប្រតិបត្តិ ផ្នែកប្រមូល បានបញ្ជាក់ថា កម្មវិធីប្រមូលសំអាតក្នុងព្រះរាជពិធីនេះ បានចែកចេញជា៦ ក្រុម និងបែងចែកជា ២វេន គឺវេនទី១-វេនថ្ងៃចាប់អនុវត្ដ ពីម៉ោង៥ព្រឹក រហូតដល់ម៉ោង៤ល្ងាច។ ចំណែកវេនទី២- វេនយប់ចាប់អនុវត្ដពីម៉ោង១យប់ រហូតដល់ម៉ោង៥ព្រឹក។ ដែលទាំងនេះ គឺជាផែនការរៀបចំកម្លាំង តាមគោលដៅដែលត្រូវអនុវត្ត ដើម្បី ចុះប្រមូលសំរាមឲ្យបានទាន់ពេល ក្នុងព្រះរាជ្យពិធីបុណ្យអុំទូក។

លោកបានបន្តថា ក្នុងនាមលោកតំណាងអោយក្រុមហ៊ុនស៊ីនទ្រី ចំពោះ ផែនការរៀបចំកម្លាំងនិង សម្ភារៈ ដើម្បី សំអាត ប្រមូលនិងដឹកជញ្ជូន សំរាមនៅក្នុងព្រះរាជពិធីបុណ្យ អកអំបុក បណ្ដែតប្រទីប និងសំពះព្រះខែ នាថ្ងៃទី ២១ ២២ និងថ្ងៃទី ២៣ ខែ វិឆ្ឆិកា ឆ្នាំ២០១៨ លោកធានាថានឹងធ្វើឲ្យបានស្អាតទៅតាមស្មារតីអង្កប្រជុំ របស់សាលារាជធានី ដែលបានដាក់ផែនការ កុំឲ្យមានសំរាម កកស្ទះក្នុងព្រះរាជពិធី៣ថ្ងៃនេះ។ ការសំអាតនេះ ធ្វើយ៉ាងណាឲ្យបានទាន់ពេលវេលា ដើម្បី ឆ្លើយតបក្នុងព្រះរាជពិធី៣ថ្ងៃនេះ ធ្វើយ៉ាងណាឲ្យមានសោភ័ណភាពស្អាត ទៅតាមគោលការណ៍របស់សាលារាជធានី ជាពិសេស ការងារប្រមូលសំរាមនៅក្នុងព្រះរាជពិធីតែម្តង។ លោក ក៏បានធ្វើការសំណូមពរផងដែរ ដល់បងប្អូនប្រជាពលរដ្ឋ និងក្រុមអាជីវករ ក៏ដូចអ្នកមកចូលទស្សនាក្នុងព្រះរាជពិធីបុណ្យអុំទូករយៈពេល៣ថ្ងៃនេះ មេត្តាចូលរួមជួយសហការ ក្នុងការវេចខ្ចប់ ទុកដាក់កាកសំណល់សំរាមឲ្យបានត្រឹមត្រូវទៅតាមការកំណត់ ជៀសវាងយកសំណល់ទៅបោះចោលពាសវាលពាសកាល ដែលធ្វើឲ្យបាត់បង់សោភ័ណភាពក្នុងព្រះរាជពិធីបុណ្យនេះ។

លោកបានបញ្ជាក់ថា ការបោសសំអាតសំរាមបានល្អមិនមែនពឹងផ្អែកទៅលើខាងស៊ីនទ្រី តែមួយ មុខទេ គឺតម្រូវមានការចូលរួមពីប្រជាពលរដ្ឋ និងភាគីពាក់ព័ន្ធ ដើម្បី ធ្វើយ៉ាងណាឲ្យព្រះរាជពិធីបុណ្យអុំទូកយើងនេះ ប្រព្រឹត្តទៅបានលូននិងល្អស្អាត ដើម្បីទាក់ទាញភ្ញៀវជាតិ និងអន្តរជាតិចូលរួមទស្សនាបានច្រើនកាន់តែប្រសើរឡើង។

សូមបញ្ជាក់ថា បន្ទាប់ពីបញ្ចប់ព្រះរាជ បុណ្យអុំទូក អកអំបុក បណ្ដែតប្រទីប និងសំពះព្រះខែ រយៈពេល៣ថ្ងៃនេះ ក្រុមហ៊ុនស៊ីនទ្រី និងចូលបម្រើការងារជាធម្មតាឡើងវិញ នៅថ្ងៃទី២៤។ ដោយ ថ្ងៃទី២៤នោះ ខាងស៊ីនទ្រី នឹងបើកយុទ្ធនាការមួយ ដើម្បីសំអាតក្រោយពីបញ្ចប់ព្រះរាជពិធីបុណ្យអុំទូកនេះ៕