ភ្នំពេញ ៖ ជនរងគ្រោះចំនួន៦នាក់ ត្រូវបានជនសង្ស័យ មួយក្រុមមានគ្នា៤នាក់ ជិះម៉ូតូមួយគ្រឿងប្រដាប់ដោយដាវសាមូរ៉ៃ៤ដើម មកធ្វើសកម្មភាពកាប់ប្លន់ ខណៈជនរងគ្រោះកំពុងជិះម៉ូតូ២គ្រឿង មកអង្គុយលេងនៅមាត់ទន្លេ បណ្ដាលឲ្យយុវជនម្នាក់ ត្រូវ១ដាវ រួចប្លន់យកម៉ូតូ១គ្រឿង បានសម្រេចហើយជិះគេចខ្លួនបាត់ដោយសុវត្ថិភាព កាលពីវេលាម៉ោង១២និង៣០នាទីយប់រំលងអធ្រាត្រ ឈានចូលថ្ងៃទី១៦ ខែវិច្ឆិកា ឆ្នាំ២០១៨ ស្ថិតនៅតាមបណ្ដោយផ្លូវទន្លេសាប ខាងជើងអូតែសុខខា ប្រមាណជាង២០០ម៉ែត្រ សង្កាត់ជ្រោយចង្វា ខណ្ឌជ្រោយចង្វា។
ជនរងគ្រោះមានឈ្មោះ ហេង ហម ភេទប្រុស អាយុ១៩ឆ្នាំ មុខរបរធ្វើការនៅឃ្លាំងមួយកន្លែង ស្នាក់នៅផ្ទះជួល សង្កាត់ទឹកថ្លា ខណ្ឌសែនសុខ។
តាមប្រភពពីជនរងគ្រោះបានឲ្យដឹងថា មុនកើតហេតុ គេមានគ្នា៦នាក់ មានប្រុស មានស្រី ជិះម៉ូតូ២គ្រឿង ដោយមួយគ្រឿងដែលត្រូវជនសង្ស័យយកទៅបាត់ម៉ាកឌ្រីមសង់ ស៊េរី០១៧ ពណ៌ខ្មៅ ពាក់ស្លាកលេខភ្នំពេញ1GC-2306 និងមួយគ្រឿងទៀតម៉ាកនិច មិនចាំស្លាកលេខ បាននាំគ្នាមកអង្គុយលំហែកាយលេងនៅចំណុចកើតហេតុខាងលើ លុះមកដល់ម៉ោងកើតហេតុ រៀបនឹងនាំគ្នាជិះត្រឡប់ទៅផ្ទះវិញ ស្រាប់តែលេចមុខជនសង្ស័យ៤នាក់ ជិះម៉ូតូនិចមួយគ្រឿង មិនចាំស្លាកលេខ ប្រដាប់ដោយដាវសាមរ៉ៃចំនួន៤ដើម រួចជិះមកអែប ហើយបានធ្វើសកម្មភាពដកដាវមកកាប់ទៅលើរូបគេជាជនរងគ្រោះត្រូវ១ដាវ បន្ទាប់មក រូបគេ និងមិត្តភ័ក្ដិ ភ័យស្លន់ស្លោ ក៏នាំគ្នារត់គេចចេញពីកន្លែងកើតហេតុ ដោយមិនដកសោចេញពីម៉ូតូ ធ្វើឲ្យជនសង្ស័យមានឱកាសប្លន់យកម៉ូតូមួយគ្រឿងគេចខ្លួនបាត់ដោយសុវត្ថិភាព។
ក្រោយកើតហេតុ សមត្ថកិច្ចមូលដ្ឋានបានចុះមកដល់ បានដឹកជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលជ្រោយចង្វា ហើយក៏បាននាំគ្នាទៅផ្ទះវិញដោយក្ដីអស់សង្ឃឹមបំផុត៕
Source: Kampuchea Thmey Daily
0 Comments