ភ្នំពេញ ៖ យុវជនម្នាក់ ជិះម៉ូតូតាំងពីខេត្តតាកែវចូលមករាជធានីភ្នំពេញយប់ស្ងាត់ ត្រូវជនសង្ស័យមួយក្រុមមានគ្នា០៦នាក់ ជិះម៉ូតូ០៣គ្រឿង ដេញតាមពីក្រោយ រួចធាក់ឲ្យដួល និងវាយជនរងគ្រោះ ប្លន់យកម៉ូតូម៉ាកហុងដា សេ១២៥ ស៊េរីឆ្នាំ២០១៨ រួចជិះគេចខ្លួនបាត់ដោយសុវត្ថិភាព។
ករណីនេះ បានកើតឡើងកាលពីវេលាម៉ោងប្រមាណ០៤ទៀបភ្លឺ ឈានចូលថ្ងៃទី១៣ ខែវិច្ឆិកា ឆ្នាំ២០១៨ នៅចំណុចមុខ រោងម៉ាស៊ីនកិនស្រូវ តាមបណ្ដោយផ្លូវ២១៧ ស្ថិតក្នុងសង្កាត់ព្រែកកំពឹស ខណ្ឌដង្កោ រាជធានីភ្នំពេញ។
ជនរងគ្រោះឈ្មោះ ឆាយ ចាងណាង ភេទប្រុស អាយុ២៥ឆ្នាំ មុខរបរលាងរថយន្ត នៅម្ដុំផ្សារបឹងត្របែក ស្នាក់នៅកន្លែងធ្វើការ និងមានស្រុកកំណើត ភូមិកំពង់ជ្រៃ ឃុំស្មោង ស្រុងទ្រាំង ខេត្តតាកែវប្រាប់ឲ្យដឹងថា មុនកើតហេតុរូបគាត់បានជិះម៉ូតូ១គ្រឿង ម៉ាកហុងដា សេ១២៥ ស៊េរី ឆ្នាំ២០១៨ ពណ៌ខ្មៅ ពាក់ស្លាកលេខ តាកែវ 1Q-1857 ជិះចេញពីស្រុកកំណើតបំណងចូលមកក្រុងភ្នំពេញមកកន្លែងធ្វើការម្តុំផ្សារបឹងត្របែក ដោយធ្វើដំណើរតាមបណ្ដោយផ្លូវជាតិលេខ០២ ទិសដៅពីត្បូងទៅជើង លុះមកដល់រង្វង់មូលស្រីកងស្រូវ ស្រាប់តែលេចមុខជនសង្ស័យ០៦នាក់ ជិះម៉ូតូ០៣គ្រឿង ក្នុងនោះ០២គ្រឿង ម៉ាកហុងដា និង០១គ្រឿងទៀត ម៉ាក Duke (មិនចាំស្លាកលេខ) បានជិះដេញតាមពីក្រោយរូបគាត់ លុះដល់ចំណុចកើតហេតុ ជនសង្ស័យបានកៀរម៉ូតូរូបគាត់ឲ្យដួល រួចធ្វើសកម្មភាពវាយទៅលើរូបគាត់បន្ថែមទៀត បណ្ដាលឲ្យរងរបួសក្បាលជង្គង់ និងកែងដៃផងដែរ ហើយប្លន់យកម៉ូតូគាត់ជិះគេចខ្លួនដោយសុវត្ថិភាព។
ហេតុការណ៍នេះបានបង្កឲ្យមានការភ្ញាក់ផ្អើលដល់សមត្ថកិច្ចចុះដល់កន្លែងកើតហេតុ បានត្រឹមតែនាំជនរងគ្រោះទៅដាក់ពាក្យបណ្ដឹងតែប៉ុណ្ណោះ៕
Source: Kampuchea Thmey Daily
0 Comments