ភ្នំពេញ ៖ ក្រុមអ្នកគាំទ្រអតីតបក្សប្រឆាំងបានមកជំទាស់ជាបណ្តើរៗហើយ ទាក់ទងទៅអ្វីដែលទណ្ឌិត សម រង្ស៊ី អតីតមេដឹកនាំបក្សប្រឆាំង ចេញមុខបបួលសម្តេចតេជោ ហ៊ុន សែន ភ្នាល់គ្នារឿងដោះលែងជនត្រូវចោទ កឹម សុខា នាពេលខាងមុខ ដោយសំអាងថា យុទ្ធសាស្ត្រដែលមេដឹកនាំរបស់ខ្លួនយកទៅប្រើនោះ ជាយុទ្ធសាស្ត្រខុស។
លោក ហ៊ុន កុសល ដែលគេស្គាល់ថា ជាអ្នកគាំទ្រគណបក្សប្រឆាំងតាំងពីដើមនោះ បានប្រកាសនៅក្នុងបណ្តាញសង្គមហ្វេសប៊ុករបស់ខ្លួនកាលពីព្រឹកថ្ងៃទី១៣ ខែវិច្ឆិកា ថា លោកគឺជាអ្នកគាំទ្រគណបក្សសម រង្ស៊ី តាំងពីបង្កើតដំបូង រហូតមកដល់បច្ចុប្បន្ន ហើយក៏នៅតែគោរពស្រឡាញ់ដដែល។ លោកបញ្ជាក់យ៉ាងនេះថា “ខ្ញុំបាទ ហ៊ុន កុសល ជាអ្នកគាំទ្រ គណបក្ស សម រង្ស៊ី តាំងពីគណបក្សបង្កើតដំបូង រហូតមកដល់បច្ចុប្បន្ន ខ្ញុំនៅគោរពស្រឡាញ់លោកប្រធានដដែល ប៉ុន្តែខ្ញុំនៅតែប្រកាន់ជំហរ មិនគាំទ្រសារនយោបាយរបស់លោកប្រធានចុងក្រោយ ដែលបបួលលោកនាយករដ្ឋមន្ត្រីភ្នាល់គ្នាដាក់សេរីភាព ព្រោះធ្វើឲ្យប៉ះពាល់ស្មារតីសាមគ្គីរបស់បក្សសង្គ្រោះជាតិ។ ខ្ញុំប្រកាសជំទាស់មេ ខ្ញុំមិនអាចរុញមេទម្លាក់ទឹកទេ ខ្ញុំនៅតែប្រកាន់ថា យុទ្ធសាស្ត្រភ្នាល់ ជាយុទ្ធសាស្ត្រខុស”។
ជាមួយនឹងការលើកឡើងខាងលើនេះ លោក ហ៊ុន កុសល បានបញ្ជាក់ទៀតថា “ការមិនទុកចិត្តគ្នារវាងអ្នកនយោបាយជាន់ខ្ពស់របស់សង្គ្រោះជាតិ គឺកាចសាហាវជាងជំងឺមហារីកទៅទៀត”។
ភាសាចុងក្រោយរបស់លោក ហ៊ុន កុសល គេមិនបានបញ្ជាក់ពីមូលហេតុច្បាស់លាស់ទេ ប៉ុន្តែគេអាចសន្និដ្ឋានបានថា លោក ហ៊ុន កុសល ពិតជាចង់និយាយពីជំហរនយោបាយរបស់លោក សម រង្ស៊ី ទៅលើលោក កឹម សុខា ។ ពីព្រោះ ក្រោយពីលោក សម រង្ស៊ី បានប្រើយុទ្ធសាស្ត្រមួយបបួលសម្តេចតេជោ ហ៊ុន សែន ភ្នាល់នោះ មានអ្នកវិភាគ និងសកម្មជនអ្នកគាំទ្រ ក៏ដូចជាអតីតមេដឹកនាំនៅក្នុងគណបក្សប្រឆាំងជាច្រើនបានចេញមកថ្កោលទោសលោក សម រង្ស៊ី ដោយអះអាងថា លោក សម រង្ស៊ី មិនគួរយកសេរីភាពរបស់លោក កឹម សុខា មកធ្វើជាល្បែងភ្នាល់គ្នានោះទេ ហើយមានអតីតមេដឹកនាំនៅក្នុងគណបក្សសង្គ្រោះជាតិមួយចំនួនអះអាងថា ការដែលលោក សម រង្ស៊ី លើកយកសេរីភាពរបស់លោក កឹម សុខា មកធ្វើជាល្បែងភ្នាល់នោះ ដើម្បីញោះកុំឲ្យមានការដោះលែងលោក កឹម សុខា ដោយសំអាងថា ខ្លាចគេផាត់ខ្លួនចោលឲ្យនៅក្រៅសង្វៀននយោបាយ។
ចំណែកលោក គង់ គាំ ដែលជាអតីតថ្នាក់ដឹកនាំមួយរូបនៅក្នុងគណបក្សសង្គ្រោះជាតិនោះ បានលើកឡើងថា សុខៗស្រាប់តែលើកយកការដោះលែងលោក កឹម សុខា ធ្វើជាល្បែងភ្នាល់ ហើយលោកបានលើកជាសំណួរថា ហេតុអ្វីបានជាខ្លាចលោក កឹម សុខា ត្រូវដោះលែង ឬខ្លាចគេទុកខ្លួនក្រៅកញ្ចប់? តាមលោក គង់ គាំ សេចក្តីសង្ឃឹមទាំងអ្នកគាំទ្រ មានគន្លឹះតែមួយគត់ គឺខ្មែរ និងខ្មែរចេះដោះស្រាយបញ្ហាជាតិរបស់ខ្លួនដោយខ្លួនឯង ប៉ុន្តែបើលោក សម រង្ស៊ី ធ្វើបែបនេះ ក្ដីសង្ឃឹមទាំងអស់ត្រូវបានរលាយខ្សុល។
សូមបញ្ជាក់ថា កាលពីថ្ងៃទី០៩ វិច្ឆិកា ឆ្នាំ២០១៨ លោក សម រង្ស៊ី បានសរសេរប្រកាសតាមរយៈបណ្តាញសង្គមហ្វេសប៊ុក (Facebook) ផ្លូវការរបស់ខ្លួន ដោយបបួលសម្តេចតេជោ ហ៊ុន សែន ភ្នាល់គ្នាលើករណីការដោះលែងលោក កឹម សុខា។ ក្នុងការភ្នាល់នេះ លោក សម រង្ស៉ី បានកំណត់ថា បើសិនមានការដោះលែងលោក កឹម សុខា នៅថ្ងៃទី២៩ ខែធ្នូ ឆ្នាំ២០១៨ ឬយ៉ាងយូរថ្ងៃទី០៣ ខែមីនា ឆ្នាំ២០១៩ ខាងមុខនោះ សម្តេចតេជោ នឹងចុះចេញពីតំណែង តែបើសិនមិនមានការដោះលែងទេ លោក សម រង្ស៊ី នឹងស្ម័គ្រចិត្តប្រឈមចំពោះមុខច្បាប់ ដោយចូលឲ្យសមត្ថកិច្ចចាប់ខ្លួន ដើម្បីអនុវត្តទោសនៅក្នុងពន្ធនាគារ។
ភ្លាមៗបន្ទាប់ពីការប្រកាសនេះ សម្តេចតេជោ ហ៊ុន សែន បានប្រកាសតាមរយៈបណ្តាញព័ត៌មាន FN ថា សម្តេចហ៊ានភ្នាល់ជាមួយលោក សម រង្ស៊ី ដោយបញ្ជាក់ថា ប្រសិនបើលោកសម រង្ស៊ី ចាញ់ក្នុងការភ្នាល់លើកនេះ ត្រូវហ៊ានចូលឲ្យចាប់ខ្លួន ដើម្បីអនុវត្តទោស៕
Source: Kampuchea Thmey Daily
0 Comments