ភ្នំពេញ ៖ បុរសជាបុគ្គលិកសហគ្រាសផលិតថ្នាំពេទ្យម្នាក់ បានដេកស្លាប់ក្នុងបន្ទប់ជួលគ្មានអ្នកណាដឹងនោះទេ ដោយមានការសង្ស័យ ព្រោះមិនឃើញទៅធ្វើការ ទើបគោះទ្វារហៅមិនឮសូរឆ្លើយតប ពេលអើតមើល ឃើញជនរងគ្រោះដេកស្លាប់បាត់ទៅហើយ កាលពីវេលាម៉ោង៧និង២០នាទីព្រឹកថ្ងៃទី១៦ ខែវិច្ឆិកា ឆ្នាំ២០១៨ ស្ថិតនៅបន្ទប់ជួលលេខ១៥ ភូមិព្រៃបឹង សង្កាត់កន្ទោក ខណ្ឌពោធិសែនជ័យ។
ជនរងគ្រោះឈ្មោះ អ៊ីវ ណាង ភេទប្រុស អាយុ៣០ឆ្នាំ មុខរបរបុគ្គលិកសហគ្រាសផលិតឱសថPPM ស្នាក់នៅ បន្ទប់ជួល លេខ១៥ ភូមិព្រៃបឹង សង្កាត់កន្ទោក ខណ្ឌពោធិសែនជ័យ មានស្រុកកំណើត ភូមិវាលប្រិយ៍ ឃុំចំបក់ ស្រុកបាទី ខេត្តតាកែវ។ មានប្រពន្ធឈ្មោះ ណៃ ស្រីនាង អាយុ៣៣ មុខរបរមេផ្ទះ មានកូនចំនួន២នាក់ ប្រុស១នាក់ ស្រី១នាក់ រស់នៅភូមិទ្រា ឃុំសេនារាជឧត្តម ស្រុកព្រះស្ដេច ខេត្តព្រៃវែង។
តាមសាច់ញាតិបានឲ្យដឹងថា ជនរងគ្រោះមកស្នាក់នៅបន្ទប់ជួលតែម្នាក់ឯងទេ រីឯប្រពន្ធនៅមើលថែកូនៗនៅឯស្រុកព្រះស្ដេច ខេត្តព្រៃវែង រហូតមកដល់ព្រឹកថ្ងៃនេះ ក៏មានរឿងបែបនេះតែម្ដង។
តាមសម្ដីបុរស ឈ្មោះ សុខ ណាង អាយុ២៥ឆ្នាំ មុខរបរកម្មកររោងចក្រស្នាក់នៅបន្ទប់ជួលក្បែរគ្នា បានឲ្យដឹងថា ជារៀងរាល់ព្រឹក ជនរងគ្រោះតែងតែភ្ញាក់ក្រោកពីដំណេក ម៉ោង៦ព្រឹក ហើយចាក់ចម្រៀង តាមធុងបាស មុនរៀបចំខ្លួនទៅធ្វើការងារ តែសម្រាប់ព្រឹកកើតហេតុនេះ មិនឮសូរ ចាក់ចម្រៀង មិនឃើញក្រោក ងើបចេញក្រៅដូចសព្វដង មិនបានចាប់អារម្មណ៍ រហូតដល់វេលាម៉ោង៧ជាងទៅហើយ នៅតែមិនឃើញចេញក្រៅបន្ទប់ទៀត ទើបអ្នកជិតខាង៥ ទៅ៦នាក់ ងឿងឆ្ងល់ ក៏គោះទ្វារហៅ មិនសូរឆ្លើយ ដាក់ជណ្ដើរឡើងអើតមើល ស្រាប់តែប្រទះឃើញជនរងគ្រោះដេកស្លាប់ទៅហើយ ឃើញដូច្នេះក៏នាំគ្នាឆោឡោ ប្រាប់ទៅម្ចាស់ផ្ទះជួល រាយការណ៍ប្រាប់សមត្ថកិច្ច ចុះមកពិនិត្យ និងប្រាប់សាច់ញាតិមកមើលជាក់ស្ដែង រួចសាច់ញាតិមកគាស់ទ្វារបើកមើលឃើញពិតជាស្លាប់បាត់មែន។
សាកសពជនរងគ្រោះ ក្រោយពីសមត្ថកិច្ចជំនាញ ពិនិត្យធ្វើកោសល្យវិច័យរួច ឃើញថាស្លាប់ដោយជំងឺខ្យល់គរ ពុំមានពាក់ព័ន្ធបទល្មើសអ្វីឡើយ រួចប្រគល់ជូនក្រុមគ្រួសារ ចាត់ចែងដឹកយកទៅធ្វើបុណ្យតាមប្រពៃណី ដោយពុំមានប្ដឹងផ្ដល់អ្វីឡើយ៕
Source: Kampuchea Thmey Daily
0 Comments