ភ្នំពេញ ៖ អនុសាខាកាកបាទក្រហមកម្ពុជា ខណ្ឌដូនពេញ ដឹកនាំដោយ លោក សុខ ពេញវុធ ប្រធានកិត្តិយសអនុសាខា បានចុះសាកសួរសុខទុក្ខ និងនាំយកអំណោយមនុស្សធម៌របស់កាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ទៅចែកជូនប្រជាពលរដ្ឋដែលមានជីវភាពខ្វះខាត សរុបចំនួន២០០គ្រួសារ ដែលបានមកពីសង្កាត់ទាំង១១ ក្នុងខណ្ឌដូនពេញ នៅរសៀលថ្ងៃទី១៥ ខែវិច្ឆិកា ឆ្នាំ២០១៨នេះ។
ក្នុងឱកាសនោះដែរ លោក សុខ ពេញវុធ អភិបាល នៃគណៈអភិបាលខណ្ឌពេញបានផ្ដាំផ្ញើ នូវការសាកសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាដែលជានិច្ចកាលសម្ដេច តែងយកចិត្តទុកដាក់ និងគិតគូរពីសុខទុក្ខរបស់បងប្អូនប្រជាពលរដ្ឋទាំងអស់ ដែលជាជនងាយរងគ្រោះជនក្រីក្រចាស់ជរា កុមារកំព្រា អ្នកផ្ទុកមេរោគអេដស៍ជាដើម ហើយសម្ដេចកិត្តិព្រឹទ្ធបណ្ឌិត តែងតែបានណែនាំដល់កាកបាទក្រហម នៅគ្រប់ថ្នាក់ ឲ្យយកចិត្តទុកដាក់ដល់បងប្អូនដែលជួបការលំបាកទាំងអស់ឲ្យអស់ពីលទ្ធភាព។
លោក សុខ ពេញពេញវុធ បានផ្ដាំផ្ញើដល់បងប្អូនទាំងអស់ឲ្យខិតខំយកចិត្តទុកដាក់ថែរក្សាសុខភាព អនាម័យការរស់នៅ និងប្រកបរបរចិញ្ចឹមជីវិត ទោះបីជាយើងមានជីវភាពក្រីក្រ ប៉ុន្តែយើងនៅតែអាចកាត់បន្ថយភាពក្រីក្របានតាមរយៈសុខភាពល្អ គ្មានជំងឺ និងមានការងារធ្វើត្រឹមត្រូវ ហើយការនាំយក អំណោយ របស់អនុសាខាកាកបាទក្រហមខណ្ឌដូនពេញនេះ គឺចែកជូនដល់បងប្អូនប្រជាពលរដ្ឋដោយមិនរើសអើងនិន្នាការនយោបាយជំនឿសាសនា អ្វីឡើយ។
លោកអភិបាលខណ្ឌបានមានប្រសាសន៍ទៀតថា អំណោយនេះថ្វីត្បិតមានបរិមាណមិនច្រើនក្តី តែនេះជាសន្តានចិត្ត ជាវប្បធម៌ចែករំលែករបស់អាជ្ញាធរដែនដី គ្រប់លំដាប់ថ្នាក់តែងតែចុះជួយដល់បងប្អូនប្រជាពលរដ្ឋដែលជួបការលំបាក ដោយមិនប្រកាន់ថា ពលរដ្ឋជាបក្សនយោបាយណាឡើយនិងបានស្នើឲ្យប្រជាជនតាំងចិត្តរស់នៅប្រកបដោយសេចក្ដីអំណត់តស៊ូ ជម្នះនូវការលំបាក និងត្រូវថែទាំសុខភាពយើង ដើម្បីអនាគតយើង សង្គមជាតិយើង និងជីវភាពគ្រួសារយើង បានសុខសាន្តតទៅមុខទៀត។
លោកអភិបាលបានបញ្ជាក់ថា អំណោយ ដែលត្រូវយកទៅចែកជូនបងប្អូនប្រជាពលរដ្ឋទាំង២០០គ្រួសារនេះដែរ អំណោយមនុស្សធម៌ដែលបានផ្តល់ជូនមានអង្ករ៣០គីឡូក្រាម ទឹកត្រី១យួរ ទឹកស៊ីអ៊ីវ១យួរ និងថវិកាចំនួន២០.០០០ម៉ឺនរៀល។
ទន្ទឹមនឹងបានទទួលអំណោយនេះផងដែរ អាជ្ញាធរខណ្ឌ សង្កាត់ និងប្រជាពលរដ្ឋ សូមថ្លែងអំណរគុណដល់សម្ដេចកិត្តិព្រឹទ្ធបណ្ឌិត និង លោក សុខ ពេញវុធ អភិបាល នៃគណៈអភិបាលខណ្ឌដូនពេញ និងមន្ត្រីសាលាខណ្ឌ ដែលតែងតែគិតគូរ និងបាននាំអំណោយមកចែកជូនដល់ពួកគាត់ដែលកំពុងតែជួបនូវការខ្វះខាតនៅពេលនេះផងដែរ៕
Source: Kampuchea Thmey Daily
0 Comments