ភ្នំពេញ ៖ អាជីវករលក់ឱសថ និងឱសថបុរាណ ក៏ដូចឱសថស្ថាន នៅក្នុងរាជធានីភ្នំពេញ ប្រមាណ៦០០នាក់កាលពីរសៀលថ្ងៃទី១៦វិច្ឆិកា។ ត្រូវបានអាជ្ញាធររាជធានីអញ្ជើញមកប្រជុំផ្សព្វផ្សាយពីយន្តការស្ដីពីការផ្តល់សេវាល់វិស័យសុខាភិបាលតាមរយៈច្រកចេញចូលតែ១ រាជធានីភ្នំពេញ។
លោកស្រីមួក យុវលក្ខ័ ប្រធានការិយាល័យច្រកចេញចូលតែ១ រាជធានីភ្នំពេញឲ្យដឹងថា យើងចង់ប្រាប់ដល់បងប្អូនអាជីវករលក់ ឱសថឲ្យបានជ្រាប ពីរបៀបរបបនៃការសុំច្បាប់អាជីវកម្ម,ការសុំបន្តសុពលភាពជាដើម ដែលយើងមានមន្ត្រីជំនាញចាំទទួលនិងពន្យល់លើផ្នែកនីតិវិធីពាក់ព័ន្ធនឹងវិស័យសុខាភិបាលនឹងចង់ឲ្យបងប្អូនមកស្វែងយល់ពីការិយាល័យច្រកចេញចូលតែ១រាជធានីភ្នំពេញដែលកំពុងបម្រើសេវាជូនប្រជាពលរដ្ឋចំនួន១២វិស័យ។
លោកហួត ហៃ អភិបាលរងរាជធានីភ្នំពេញដែលអញ្ជើញចូលរួមក្នុងកម្មវិធីនេះបានលើកឡើងថា ច្រកចេញចូលតែ១រាជធានីភ្នំពេញ ជាកន្លែងប្រមូលផ្តុំបម្រើសេវាសាធារណៈជូនប្រជាពលរដ្ឋ។ តែសម្រាប់ពេលនេះ យើងអញ្ជើញតែបងប្អូន ដែលពាក់ព័ន្ធនឹងវិស័យសុខាភិបាលតែប៉ុណ្ណោះ។ ចំណុចសំខាន់គឺក្នុងគោលបំណងផ្តល់ការយល់ដឹងដល់បងប្អូន សូមបងប្អូនអញ្ជើញមកដោយខ្លួនឯងកុំឆ្លងកាត់អ្នករត់ការដែលនាំឲ្យចំណាយលើសេវាច្រើនលើសការកំណត់។
លោកបន្តថា ចំណុចសំខាន់១ទៀត ការិយាល័យច្រកចេញចូលតែមានតួនាទីផ្តល់សេវាចំនួន ៣ពាក់ព័ន្ធនឹងវិស័យសុខាភិបាលគឺលិខិតអនុញ្ញាតបើកអាជីវកម្មឱសថ ការសុំបើកទីតាំងលក់ឱសថ,ការសុំប្តូរទីតាំង,ការសុំប្តូរឈ្មោះឱសថ,ការសុំបន្តសុពលភាព។ ការផ្តល់វិញ្ញាបនបត្របញ្ជាក់ពីអនាម័យតាមអាហារដ្ឋាន,ភោជនីយដ្ឋានជាដើម។
គួរបញ្ជាក់ថា ការិយាល័យច្រកចេញចូលតែ១រាជធានីភ្នំពេញ បានចាប់ដំណើរការតាំងពីថ្ងៃទី២៦កក្កដា ឆ្នាំ២០១៨នេះ៕
Source: Kampuchea Thmey Daily
0 Comments