ក្រុម​ក្រសួងការពារជាតិ ប៉ះ​ក្រុម​ថៃ​នៅ​ម៉ោង​២​រសៀល​ថ្ងៃ​ពុធ​នេះ​នៅ​ប្រទេស​ចិន

ក្រុមបាល់ទាត់​ម្ចាស់​ជើងឯក​ពានរង្វាន់​សម្តេច​តេ​ជោ ហ៊ុន សែន រដូវ​កាល​ឆ្នាំ ២០១៨ ក្រសួងការពារជាតិ (​ទ័ព​) នឹង​ប្រកួត​ជាមួយ​ក្រុម BTU FC នៅវេលា​ម៉ោង​២​រសៀល ថ្ងៃ​ពុធ ទី​១៤ ខែវិច្ឆិកា ឆ្នាំ​២០១៨ នេះ ក្នុង​ពានរង្វាន់​អន្តរជាតិ 2018 China-ASEAN Cities Football Tournament នៅ​ខេត្ត Nanning ប្រទេស​ចិន​។



ពានរង្វាន់​នេះ​ មាន​ក្រុម​ចំនួន​៤​ចូលរួម​ដោយ​ក្នុង​នោះ​មាន​ក្រុម​២​មកពី​ថៃ​គឺ Police Tero Sasana និង​ក្រុម​សាកលវិទ្យាល័យ BTU FC បូករួម​ទាំង​ក្លិប Than Quang Ninh របស់​វៀតណាម​និង​ក្រុម​ក្រសួងការពារជាតិ​រ​បស់​កម្ពុជា​។ តាម​ក្រោយ​ក្រុម​ក្រសួងការពារជាតិ​ប៉ះ​ក្រុម BTU FC ក្រុម​ដែល​ទទួលបាន​ជ័យជម្នះ​នឹងត្រូវ​ឡើង​ទៅ​លេង​នៅ​វគ្គ​ផ្ដាច់ព្រ័ត្រ តែម្តង​។



ក្រុម​ក្រសួងការពារជាតិ របស់​កម្ពុជា បាន​ចេញ​ដំណើរ​នៅ​ព្រឹក​ថ្ងៃ​ច័ន្ទ សប្ដាហ៍​នេះ ដែល​មាន​ថ្នាក់ដឹកនាំ​ដូចជា​លោក ខូវ ឆាយ ជា​អគ្គលេខាធិការ​ក្លិប លោក ទេព ឡុង​រចនា ជា​អ្នកចាត់ការ​ទូទៅ​ក្លិប​លោក ភា សុភ​ត្រា ជា​គ្រូបង្វឹក​លោក អ៊ុំ សាវង្ស​, ហោ សុខ​ហេង​,​ឡុង សុធា​រ៉ា និង លេង ណា​វីន ជា​ជំនួយការ​គ្រូបង្វឹក​។ ចំណែក​កីឡាករ​មាន សំរឹទ្ធ សីហា​, គឹម ស៊ី​ម៉េង​, ខែ​ក ខេមរិន្ទ​, រឿ​ម ចាន់​រឿន​, ម៉ាត់ សាត់​យ៉ា​,​អ៊ែ​ល ធី​ហឿ​ត​, អ៊ុ​ព កា​ម៉ុ​ល​, ង៉ែត លី​ទី​,​សុខ ហៀ​ង​,​ភួង សុខ​សា​ណា​, ជា ណា​វីន​, កាន់ ពិសាល​, ទូច រ៉ូ​ម៉ា​,​ណា​រ៉ុង កក្កដា​។ ក្រៅពីនោះ​កីឡាករ​បរទេស​មាន Yoo Jae Ho ជនជាតិ​កូរ៉េខាងត្បូង​, Yudai Ogawa ជនជាតិ​ជប៉ុន​,MOHAMED HAMZA ជនជាតិ​អេ​ហ្ស៊ី​ប​, Na Hyosung ជនជាតិ​កូរ៉េខាងត្បូង​។



​ដំណើរ​ទៅកាន់​ប្រទេស​ចិន នេះ​ត្រូវបាន​ក្លិប​ក្រសួងការពារជាតិ គិតថា​គឺជា​ឱកាស​ក្នុង​ការ​ធ្វើតេស្ត​សមត្ថភាព​ដល់​កីឡាករ​ថ្មីៗ​មួយចំនួន​មុន​រដូវ​កាល​ថ្មី​ឆ្នាំ​២០១៩ មកដល់​ខណៈ​លោក​ក៏បាន​ចុះបញ្ជី​កីឡាករ​យុវជន​៤​នាក់ ​នៅក្នុង​ក្រុម​ដើម្បី​ជំនួស​កីឡាករ​សំខាន់ៗ​ដែល​កំពុង​ជាប់​ឈ្មោះ​ក្នុង​ក្រុម​ជម្រើសជាតិ​កម្ពុជា ប្រកួត​ក្នុង​ពានរង្វាន់ AFF Suzuki Cup 2018​។ កីឡាករ​ទាំងអស់​នោះ​មាន​ឈិន ឈឿន​,​រ៉ឹ​ម ប៊ុន​ហៀ​ង​, ស ពិសិដ្ឋ និង អ៊ុំ វិចិត្រ​៕

Source: Kampuchea Thmey Daily