ភ្នំពេញ ៖ កីឡាករគុនខ្មែរ៣នាក់ មាន ឡុង សុវណ្ណឌឿន អ្នកប្រដាល់របស់ក្លិបសាលវ័នកីឡា កីឡាករ ពុយ វណ្ណៈ អ្នកប្រដាល់មកពីក្លិបឃ្លាំងមឿងកីឡាខេត្តពោធិ៍សាត់ និងកីឡាករ លិញ ភារម្យ អ្នកប្រដាល់ នៃក្លិបឆ្មាសសែនសុខគុនខ្មែរ ត្រូវគេផ្គូផ្គងឲ្យជួបកីឡាករកាណាដា Hung Ngoc និងកីឡាករថៃ ភិតដាំ គាតបានឌិតយីម ព្រមទាំងកីឡាករ ភេតណងបី គាតបានឌិតយីម នៅលើសង្វៀន ស៊ីអិនស៊ី នាថ្ងៃទី១៥ ខែធ្នូ ឆ្នាំ២០១៨។
កីឡាករ ឡុង សុវណ្ណឌឿន គេនឹងត្រូវជួបប្រកួតជាមួយអ្នកប្រដាល់កីឡាករកាណាដា Hung Ngoc ដោយប្រកួតក្នុងប្រភេទទម្ងន់៦៩គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក ហើយមិនទាន់ដឹងពីសមត្ថភាពរបស់កីឡាករកណាដានេះខ្លាំងប៉ុនណានោះដែរ។
សម្រាប់ សុវណ្ណឌឿន គេជាកីឡាករជើងខ្លាំងទម្ងន់ធ្ងន់មួយរូប ក្នុងចំណោមអ្នកប្រដាល់ជួមុខរបស់ប្រទេសកម្ពុជានាពេលបច្ចុប្បន្ននេះ។
កីឡាករ ឡុង សុវណ្ណឌឿន គេជាអ្នកលេងស្នៀតកណ្ដាប់ដៃ និងកែង រីឯស្នៀតជើងទាត់ និងជង្គង់របស់គេ ក៏ល្អហើយខ្លាំងថែមទៀត។ ប៉ុន្តែយ៉ាងណា សុវណ្ណឌឿន ក៏មានចំណុចខ្សោយខ្លះដែរ គឺត្រង់គេវាយចេញរាងយឺតបន្តិចប៉ុណ្ណោះ តែគេមានកម្លាំងពលំពេញ៥ទឹក មិនពិបាកឡើយ។
ឡុង សុវណ្ណឌឿន គេជាកីឡាករជើងចាស់ និងខ្លាំងម្នាក់ ដែលឡើងប្រកួតលើកណាក៏ពិបាករកដៃគូមកផ្តួលឲ្យគេចាញ់ពិន្ទុ ឬ ឲ្យសន្លប់នៅលើរេញណាស់។ អញ្ចឹងហើយទើបអ្នកស្នេហាកីឡាប្រដាល់ភាគច្រើននៅតែគាំទ្រកីឡាករ ឡុង សុវណ្ណឌឿន ថាជាកីឡាករដែលមានសក្ដានុពល ហើយមានសមត្ថភាពគួរឲ្យសរសើរ ដោយម្នាក់ៗហាក់សម្ដែងនូវទំនុកចិត្តចង់ទស្សនាយ៉ាងខ្លាំងនៅគ្រប់ពេលកីឡាកររូបនេះឡើងរេញប្រកួតម្តងៗនោះ តែមួយរយៈចុងក្រោយនេះគេធ្វើមិនសូវបានល្អនោះទេ។ ចាំមើលកីឡាករ ឡុង សុវណ្ណឌឿន និងកីឡាករកាណាដា Hung Ngoc នេះនរណាជាអ្នកឈ្នះ?។
ចំណែកកីឡាករ ពុយ វណ្ណៈ ជួបជាមួយកីឡាករថៃភិតដាំ គាតបាន ឌិតយីម ក្នុងប្រភេទទម្ងន់៦៣.៥គីឡូក្រាម អ្នកទាំង២មិនដែលជួបគ្នាទេពីមុនមក តែយ៉ាងណាកីឡាករថៃគេរឹងមាំ កម្លាំងស៊ុហ្វខ្លាំង និងស្នៀតជើងទាត់ ជង្គង់របស់គេវាយចេញរហ័ស និងខ្លាំងទៀតផង។
រីឯកីឡាករ ពុយ វណ្ណៈ គេជាកីឡាករជើងថ្មីតែស្នៀតប្រយុទ្ធរបស់គេល្អ ពិសេសគឺស្នៀតកណ្ដាប់ដៃ និងជង្គង់តែម្ដង ដែលអាចវាយប្រយោល ក៏បានចូលកៀកក៏បាន ដោយប្រើបានលឿន ហើយធ្ងន់ថែមទៀត។ ចាំមើលក្នុងការប្រកួតនេះកីឡាករ ពុយ វណ្នៈ ជាអ្នកឈ្នះ ឬកីឡាករថៃថៃភិតដាំ គាតបានឌិតយីម?។
ដោយឡែក កីឡាករលិញ ភារម្យ ត្រូវជួបជាមួយកីឡាករ ថៃភេតណងបី គាតបានឌិតយីម ក្នុងប្រភេទទម្ងន់៦០គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក តែកីឡាករថៃម្នាក់នេះធ្លាប់មកប្រកួតនៅប្រទេសកម្ពុជាជាច្រើនលើកមកហើយ ស្នៀតខ្លាំងរបស់គេ គឺជើងទាត់កាត់ ជង្គង់ និងស្នៀតកាច់ផ្ដួល។
ចំណែកកីឡាករលិញ ភារម្យ គេជាកីឡាករជើងថ្មីកំពុងធ្វើឲ្យអ្នកតាមដានប្រដាល់ចាប់អារម្មណ៍ចំពោះស្នៀតប្រយុទ្ធរបស់គេ ការប្រកួតកន្លងមកគេប្រើបានទាំងដៃទាំងជើងតែម្ដងលិញ ភារម្យ គេជាអ្នកស្រករក្រោយមែន តែចិត្តរបស់គេធំខ្លាំងណាស់មិនតែប៉ុណ្ណោះ គេវាយដោយហ៊ានប្ដូរកែងជាមួយគូប្រកួតដោយគ្មានញញើតទៀតផង។ ចាំមើលរវាងកីឡាករ លិញ ភារម្យ និងកីឡាករថៃភេតណងបី គាតបានឌិតយីម នរណាជាអ្នកឈ្នះ?៕
Source: Kampuchea Thmey Daily
0 Comments