បែកធ្លាយ អ្នកមានអំណាចម្នាក់នៅខេត្តឧត្ដរមានជ័យ លក់ដីព្រៃភ្នំជប់ត្រឡោក គ្រប់គ្រងដោយរដ្ឋ តម្លៃ៧០ម៉ឺនដុល្លារ ឲ្យទៅលោកឧកញ៉ា លឹម ហេង

Cambodia News December 12, 2018

ឧត្ដរមានជ័យ ៖ នៅថ្ងៃទី១២ ខែធ្នូ ឆ្នាំ២០១៨នេះ មានសេចក្ដីរាយការណ៍ មកថា អ្នកមានអំណាចម្នាក់នៅខេត្តឧត្ដរមានជ័យ បានលក់ដីព្រៃ និងភ្នំជប់ត្រឡោក ដែលគ្រប់គ្រងដោយរដ្ឋរាប់សិបហិកតា ឲ្យទៅលោកឧកញ៉ា លឹម ហេង ក្នុងតម្លៃ៧០ម៉ឺនដុល្លារ ស្ថិតនៅភូមិជប់គគីរខាងលិច ឃុំជប់គគីរ ស្រុកបន្ទាយអំពិល ខេត្តឧត្តរមានជ័យ។

តាមប្រភពបានឲ្យដឹងថា សព្វថ្ងៃនេះ កំពុងតែមានការកៀរគរប្រជាពលរដ្ឋឲ្យទៅស៊ី ឈ្នួល កាប់បំផ្លាញព្រៃឈើរានយកដី នៅតំបន់ខាងលើយ៉ាងអនាធិបតេយ្យ ក្រោយពីមានការលក់ទិញរួចរាល់។

ជាក់ស្ដែងនៅតាមកំផែងថ្មនៅក្នុងព្រៃលើភ្នំ ជប់ត្រឡោក គេឃើញមានការបាញ់ថ្នាំក្រហមដាក់ថា ហាម ហើយសញ្ញាខ្លះទៀតដាក់ឈ្មោះលោកឧកញ៉ា លឹម ហេង។

តាមប្រភពដដែលបានបញ្ជាក់ថា ហាមពលរដ្ឋមិនឲ្យទៅរានព្រៃឈើ យកដីនៅទីនោះជាកម្មសិទ្ធិរបស់ខ្លួន ព្រោះជាដីរបស់លោកឧកញ៉ា លឹម ហេង ទាំងអស់ទៅហើយ។

អ្នកមានអំណាច បានឃុបឃិតគ្នាលក់ទិញលក់ដីព្រៃភ្នំ ដែលគ្រប់គ្រងដោយរដ្ឋ នៅភូមិជប់គគីរខាងលិច ឃុំជប់គគីរ ស្រុកបន្ទាយអំពិលនោះ ក៏ព្រោះតែតំបន់នោះ កំពុងតែមានការអភិវឌ្ឍ និងមានហាងឆេងដីឡើងថ្លៃកប់ពពក រហូតដល់ថ្នាក់ក្រុមអ្នកមានអំណាចមួយចំនួន បានលក់ដីរដ្ឋនៅតំបន់នោះ ឲ្យលោកឧកញ៉ា លឹមហេង បានប្រាក់រហូតដល់ទៅចំនួន៧០ម៉ឺនដុល្លារ យកទៅចែកគ្នាសោយសុខយ៉ាងស្រួល។

លោករតនា តំណាងឲ្យ លោកឧកញ៉ា លឹម ហេង បានបញ្ជាក់ថា ខាងក្រុមហ៊ុន មិនបានទិញដីពីអ្នកមានអំណាចនៅខេត្តឧត្ដរមានជ័យក្នុងតម្លៃ៧០ម៉ឺននោះទេ បើទិញពីប្រជាពលរដ្ឋនោះ ពិតជាមានមែន។

លោកក៏មិនអាចបញ្ជាក់ ឬក៏បង្ហាញឯកសារលក់ទិញពីបុគ្គលណាម្នាក់ នៅតំបន់ចោទប្រកាន់ ខាងលើនោះបានទេ៕