ប្រដាល់ ៖ អ្នកប្រដាល់ជើងខ្លាំងស្រករក្រោយកម្ពុជា គឺ ឯម ឡេងលី ក្លិបថ្មគោលពោធិ៍សែនជ័យ ត្រូវគេផ្តល់ឱកាសឲ្យឡើងប្រកួតជាមួយអ្នកប្រដាល់ជើងខ្លាំងថៃ វ៉ាន់ ពីយ៉ាក់(Van Piyak) នារសៀលថ្ងៃសៅរ៍ ទី១៥ ខែធ្នូ ឆ្នាំ២០១៨នេះ នៅលើសង្វៀនSEATV។ ពួកគេទាំងពីរ ជួបប្រកួតគ្នាក្នុងប្រភេទទម្ងន់៧១គីឡូក្រាម។
វ៉ាន់ ពីយ៉ាក់ អ្នកប្រដាល់ថៃរូបនេះ មុននេះ(២៥វិច្ឆិកា២០១៨) គេដាក់ឈ្មោះថា Buakeaw មកប្រកួតជាមួយ ម៉ឺន សុភា ហើយវាយស្មើពិន្ទុគ្នា។ ហើយបើកាលពីពីរឆ្នាំមុនអ្នកប្រដាល់ថៃនេះ គេមានឈ្មោះថា Rarueng Luk Champachai ធ្លាប់មកប្រកួតនៅកម្ពុជាច្រើនលើកហើយដែរ។ អ្នកប្រដាល់ថៃរូបនេះ គេមានសមត្ថភាពខ្លាំងក្លាណាស់ គួបផ្សំនឹងកាយសម្បទាល្អ គឺខ្ពស់ ដៃ-ជើងវែង ដែលអំណោយផលដល់ការប្រើគ្រប់ស្នៀតទាំងអស់ ទាំងដៃ ជើង ជង្គង់កែងនោះ។
គេនៅចាំបានទៀតថា អ្នកប្រដាល់ថៃរូបនេះ ធ្លាប់វាយឈ្នះ ឯម ខ្លឹមខ្មៅ ក្នុងទឹកទី៣ វាយស្មើជាមួយពេជ្រ សីហា ចាញ់កែវ រំចង់ដោយពិន្ទុ វាយឈ្នះ វង្ស ណយ ក្នុងទឹកទី៤ និងធ្លាប់វាយឈ្នះចាញ់ និងស្មើជាមួយម៉ឺន សុភាផងដែរ។ មិនធម្មតាទេ វ៉ាន់ ពីយ៉ាក់ វាយឈ្នះចាញ់ស្មើជាមួយ ម៉ឺន សុភា ហើយនោះ តើ ឯម ឡេងលី អាចយកឈ្នះគេបាន ឬអត់លើកនេះ?។
យ៉ាងណា វ៉ាន់ ពីយ៉ាក់ ជាជើងខ្លាំងនិងជាម្ចាស់ខ្សែក្រវាត់ដល់ទៅពីរស្ថាប័ននៅស្រុកថៃ។ អ្នកប្រដាល់ថៃរូបនេះ មានប្រវត្តិប្រកួតចំនួន៨៣លើក ឈ្នះ៧១លើក ចាញ់១១លើក និងស្មើ០១លើក។
ឯម ឡេងលី ពិបាកសង្ឃឹម ឈ្នះ វ៉ាន់ ពីយ៉ាក់ ណាស់ បើធៀបជាមួយប្រវត្តិប្រកួតរបស់គេនោះ ដោយ ឯម ឡេងលី មានកំណត់ត្រាប្រកួតតែ៥០លើក ឈ្នះ៤១លើក ចាញ់០៨លើក ស្មើ០១លើកនោះ។
ទោះជាយ៉ាងនេះក្តី ឯម ឡេងលី មិនអាចធ្វេសប្រហែស ឬមើលងាយ វ៉ាន់ ពីយ៉ាក់ បានឡើយ ព្រោះអ្នកប្រដាល់ថៃរូបនេះ មិនសាមញ្ញនោះទេ ព្រោះគេធ្លាប់ឈ្នះជើងខ្លាំងរបស់កម្ពុជាច្រើនរូបហើយ គឺបញ្ជាក់ថា គេមិនអន់នោះទេ។
ប៉ុន្តែយ៉ាងណា វ៉ាន់ ពីយ៉ាក់ ក៏មិនទាន់ប្រាកដថាអាចឈ្នះ ឯម ឡេងលី បានដែរ ព្រោះអ្នកប្រដាល់ជើងខ្លាំងស្រករក្រោយរបស់កម្ពុជារូបនេះ មិនសាមញ្ញនោះទេ ព្រោះគេធ្លាប់ឈ្នះជើងខ្លាំងរបស់ថៃច្រើនរូបហើយ គឺបញ្ជាក់ថា គេមិនអន់នោះទេ រឿងអីគេខ្លាចជួបជាមួយ វ៉ាន់ ពីយ៉ាក់ នោះ?។
ចាំមើល ឯម ឡេងលី និង វ៉ាន់ ពីយ៉ាក់ តើនរណាឈ្នះ នៅក្នុងការជួបគ្នាលើកដំបូងនេះ?។ ឯម ឡេងលី គេប្រកួតជាមួយថៃចុងក្រោយនេះ បានវាយស្មើពិន្ទុជាមួយ អ្នកប្រដាល់ថៃ កាំឡៃភេត កាលពីថ្ងៃទី០៩ធ្នូ កន្លងទៅនេះ។
ចំពោះ សេង ស្រឿន អ្នកប្រដាល់កម្ពុជាក្លិបមហិទ្ធរិទ្ធមេសរថ្ងកមានជ័យ ត្រូវគេផ្តល់ឱកាសឲ្យជួបប្រកួតជាមួយអ្នកប្រដាល់ថៃចំណូលថ្មីយ៉ត ប៉ាគីផាន(Yorth Pakiphan)។
ពួកគេពីរនាក់នេះ ជួបគ្នាក្នុងប្រភេទទម្ងន់៦៣,៥០០គីឡូក្រាម។ សេង ស្រឿន និង យ៉ត ប៉ាគីផាន នេះ ពុំធ្លាប់ជួបគ្នាទេពីមុនមក។
សេង ស្រឿន គេជាជើងឯករងខ្សែក្រវាត់គូបូតា ទម្ងន់៦៥គ.ក្រ។ អ្នកប្រដាល់រូបនេះ គេល្អទាំងកណ្ដាប់ដៃ ជង្គង់ និង កែង។ សេង ស្រឿន ធ្លាប់ជួបប្រកួតជាមួយថៃជិត៣០លើកហើយ កន្លងមក ដោយឈ្នះ១៨លើក និងចាញ់០៨លើក ដែលការប្រកួតចុងក្រោយរបស់គេ គឺវាយចាញ់អ្នកប្រដាល់ថៃ ឈោគឆៃ ក្នុងទឹកទី១ កាលពីថ្ងៃទី២៨ ខែតុលា ឆ្នាំ២០១៨។
យ៉ត ប៉ាគីផាន គេមិនដែលមកស្រុកខ្មែរទេកន្លងមក គឺជាលើកទី១ ដែលគេមកជួបជាមួយ សេង ស្រឿន នេះ។ អ្នកប្រដាល់ថៃរូបនេះ មានប្រវត្តិប្រកួត៥៧លើក ឈ្នះ៤៧លើក ចាញ់១០លើក មិនដែលស្មើ ខណៈដែល សេង ស្រឿន មានកំណត់ត្រាប្រកួត៨១លើក ឈ្នះ៦៤លើក ចាញ់១៧លើក និងមិនដែលស្មើ។
អ្នកប្រដាល់ក្លិបមហិទ្ធរិទ្ធមេសរថ្ងករូបនេះ មួយរយៈកន្លងមកនេះ គេរាងស្រុតធ្លាក់ដោយវាយចាញ់ថៃបីលើកជាប់ៗគ្នា។ ចាំមើល សេង ស្រឿន អាចយកឈ្នះអ្នកប្រដាល់ថៃចំណូលថ្មីនេះ បាន ឬអត់ ?៕
Source: Kampuchea Thmey Daily
0 Comments