ភ្នំពេញ ៖ លោកចៅក្រមកូយ សៅ ចៅក្រមស៊ើបសួរសាលាដំបូងរាជធានីភ្នំពេញ នាថ្ងៃទី០៤ធ្នូ ឆ្នាំ២០១៨ បានសម្រេចចេញដីកាឃុំខ្លួនបុរសជនជាតិចិនដែលបែកថ្នាំកាប់អ្នកលក់ទឹកអំពៅម្នាក់និងប៉ូលិសម្នាក់ឲ្យរងរបួស ក្រោមបទចោទប្រកាន់ហិង្សាដោយចេតនាមានស្ថានទម្ងន់ទោស តាមមាត្រា២១៨នៃក្រមព្រហ្មទណ្ឌ។
ជនដៃដល់ឈ្មោះជិន ឈុន ភេទប្រុស អាយុ៣៥ឆ្នាំ គ្មានមុខរបរពិតប្រាកដដើរជក់ថ្នាំលេង។ ជននេះត្រូវបានបញ្ជូនមកកាន់សាលាដំបូងកាលពីថ្ងៃទី០៤ធ្នូ ឆ្នាំ២០១៨ ក្នុងនោះក្រោយសាកសួរ តំណាងអយ្យការអមតុលាការបានសម្រេចចោទប្រកាន់ពីបទហិង្សាដោយចេតនាមានស្ថានទម្ងន់ទោសតាមមាត្រា២០១៨នៃក្រមព្រហ្មទណ្ឌ ហើយរឿងក្ដីនេះត្រូវបញ្ជូនទៅឲ្យចៅក្រមស៊ើបសួរចាត់ការបន្តតាមនីតិវិធី។ ដូច្នេះចៅក្រមសើបសួរបានសម្រេចចេញដីកាឃុំខ្លួនជនត្រូវចោទដាក់ពន្ធនាគារជាបណ្ដោះអាសន្នដើម្បីរង់ចាំការកាត់ទោសនៅពេលក្រោយ។
តាមការសារភាពរបស់ជនជាប់ចោទបានឲ្យដឹងថា ខ្លួនគេបានមកលេងស្រុកខ្មែរជាមួយមិត្តភ័ក្រ ដើម្បីមើលការរកស៊ី ប៉ុន្តែពេលមកដល់បានមួយរយៈមិត្តភ័ក្រដែលមកជាមួយបានគេចខ្លួនចោលអស់មិនដឹងទៅណាក៏ចេះតែទិញគ្រឿងញៀនដែលគេលក់យ៉ាងសម្បូរបែបដូចលក់ស្ករគ្រាប់ជក់លេងៗទៅរហូតដល់ពេលប៉ូលិសចាប់ខ្លួននេះមិនដឹងរឿងអីទេ។
គួររំលឹកថា បុរសជនជាតិចិនបែកថ្នាំបានយកកាំបិតកាប់លើស្ត្រី អ្នកអូស អំពៅ លក់ម្នាក់និងមន្ត្រីនគរបាលចំដៃខាងស្តាំបណ្តាលឲ្យរងរបួសធ្ងន់បញ្ជូនទៅមន្ទីរពេទ្យចំណែក ឯជនដៃដល់ក៏ត្រូវបានប្រជាពលរដ្ឋចាប់ខ្លួនប្រគល់ឲ្យប៉ូលិសកសាងសំណុំរឿងបញ្ជូនឡើងតុលាការ។
អំពើហិង្សានេះបានកើតឡើង កាលពីវេលាម៉ោង២និង៤៤នាទីរសៀល ថ្ងៃទី១ ខែធ្នូ ឆ្នាំ២០១៨ តាមបណ្ដោយផ្លូវ៤៣២ ស្ថិតក្នុងសង្កាត់បឹងត្របែក ខណ្ឌចំការមន រាជធានីភ្នំពេញ។
សាក្សីបាននិយាយឲ្យដឹងថា នៅមុនពេលកើតហេតុគេឃើញ បុរសជនជាតិចិនម្នាក់ដោះអាវសង្ស័យបែកថ្នាំបានកាន់កាំបិតនិងដៃរួមទាំងមានប្រឡាក់ឈាមផង បានដើរអុកឡុកលំនៅឋានប្រជាពលរដ្ឋនៅតាមដងផ្លូវ៤៣២ ស្ថិតក្នុងសង្កាត់បឹងត្របែក ខណ្ឌចំការមន រាជធានីភ្នំពេញមិនតែប៉ុណ្ណោះបុរសរូបនោះថែមទាំងបានយកកាំបិតទៅកាប់ស្ត្រី អ្នកអូសអំពៅលក់ម្នាក់បណ្តាលឲ្យបែកក្បាល ខណៈនោះមានការរាយការណ៍ពីសំណាក់ពលរដ្ឋសមត្ថកិច្ចចុះទៅអន្តរាគមន៍ក៏ត្រូវ ជននោះកាប់ បណ្តាលឲ្យរងរបួសដៃ ហូរឈាមផងដែរ។
ក្រោយកើតហេតុជនសង្ស័យដែលជាជនជាតិចិននោះ ត្រូវបានប្រជាពលរដ្ឋដែលរស់នៅម្ដុំនោះចាប់បានប្រុងព្រួតវាយតែត្រូវសមត្ថកិច្ច អន្តរាគមន៍ ឃាត់មិនឲ្យមានអំពើហិង្សារួចក៏បញ្ជូនមន្ទីរពេទ្យរុស្ស៊ីដើម្បីព្យាបាល៕
Source: Kampuchea Thmey Daily
0 Comments