ភ្នំពេញ ៖ តារាសម្ដែង និងជាប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា បានសរសេររំលេចសារនៅលើបណ្ដាញសង្គមហ្វេសប៊ុករបស់ខ្លួនតាមរយៈការបំផុស និងអំពាវនាវឲ្យប្រជាពលរដ្ឋខ្មែរគ្រប់មជ្ឈដ្ឋានត្រូវចូលរួមគោរពច្បាប់ចរាចរណ៍ និងមានការប្រុងប្រយ័ត្នខ្ពស់ ដើម្បីបញ្ចៀសបញ្ហាគ្រោះថ្នាក់ដែលអាចកើតឡើងគ្រប់ពេលចំពោះខ្លួនឯង និងលើអ្នកដទៃរួមដំណើរជាមួយគ្នានោះ។
ការអំពាវនាវរបស់តារាស្រីចាស់វស្សា អ្នកនាង ចន ច័ន្ទលក្ខិណា នាពេលនេះ នាងក៏បានភ្ជាប់មកជាមួយនូវឃ្លីបវីដេអូចម្រៀងរបស់ អ្នកនាង ទូច ស្រីល័ក្ខ ដែលក្នុងអត្ថន័យបទនោះ គឺជាការច្រៀងរៀបរាប់ពីទុក្ខសោក និងការឈឺចាប់ ក្រោយពេលត្រូវបានបាត់បង់សមាជិកគ្រួសារ ឬមនុស្សជាទីស្រលាញ់លើបញ្ហា នៃករណីគ្រោះថ្នាក់ចរាចរណ៍ដែលគេចាត់ទុកថាជាឃាតកលាក់មុខផងនោះ។
អ្នកនាង ចន ច័ន្ទលក្ខិណា បានបំផុសដល់មហាជនបែបនេះថា មុនឆ្លងឆ្នាំ នាងខ្ញុំសុំផុសរម្លឹកបងប្អូនឲ្យប្រយ័ត្នប្រយែងទាំងអស់គ្នា។ អរគុណអូន Jenny Outver ដែលបានផលិតបទនេះដើម្បីបង្ហាញពីភាពឈឺចាប់ នៃការបាត់បង់មនុស្សជាទីស្រលាញ់ដោយសារ គ្រោះថ្នាក់ចរាចរណ៍។
តារាសម្តែង អ្នកនាង ចន ច័ន្ទលក្ខិណា បានប្រាប់ឲ្យដឹងបន្ថែមទៀតថា ដូចដែលយើងដឹងហើយថាបញ្ហាគ្រោះថ្នាក់ចរាចរណ៍ គឺជាឃាតកលាក់មុខដ៏គួរឲ្យខ្លាចបំផុតដែលមនុស្សគ្រប់រូបមិនអាចមើលឃើញ ចាប់បាន ឬអាចដឹងច្បាស់មុនថាវាអាចនឹងកើតឡើងមកលើខ្លួនយើងនៅពេលណាមួយនោះទេ ពោលគឺវាអាចនឹងកើតឡើងលើប្រជាពលរដ្ឋខ្មែរគ្រប់នាទីទាំងអស់ប្រសិនបើគ្មានការប្រុងប្រយ័ត្ន ឬគោរពច្បាប់ចរាចរណ៍។
សូមជម្រាបថា ការបង្ហោះពីសំណាក់ប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា ខាងលើនេះ គឺធ្វើឡើងខណៈពេលដែលឱកាស នៃពិធីឆ្លងឆ្នាំសកលជិតឈានចូលមកដល់ឆាប់ៗខាងមុខ។
ម្យ៉ាង ក្រៅពីការអំពាវនាវ អ្នកនាង ចន ច័ន្ទលក្ខិណា ក៏បាននិយាយភ្ជាប់ជាមួយឃ្លឹបវីដេអូនោះថាយើងដឹងហើយថា នៅក្នុងសង្គម បច្ចុប្បន្នមានប្រជាជនជាច្រើនបានរងគ្រោះថ្នាក់ដោយបញ្ហាចរាចរណ៍ ដូច្នេះសូមប្រជាពលរដ្ឋខ្មែរយើងគួរប្រុងប្រយ័ត្នករណីមួយនេះ៕
Source: Kampuchea Thmey Daily
0 Comments