កងកម្លាំងសន្តិសុខរាប់រយនាក់ ត្រូវបានដាក់ពង្រាយកាលពីថ្ងៃពុធដើម្បីតាមប្រមាញ់ខ្មាន់កាំភ្លើងម្នាក់ដែលបានសម្លាប់មនុស្សយ៉ាងតិចបីនាក់និងរងរបួសជាច្រើននាក់ទៀតនៅឯទីផ្សារលក់ផលិតផលបុណ្យណូអែលដ៏ល្បីល្បាញមួយក្នុងទីក្រុង Strasbourg ខណៈដែលរដ្ឋាភិបាលបារាំងបានបង្កើនកម្រិតនៃការព្រមានសន្តិសុខនិងពង្រឹងការត្រួតពិនិត្យព្រំដែន។
រដ្ឋមន្ត្រីក្រសួងមហាផ្ទៃលោក Christophe Castaner បាននិយាយថា មនុស្សប្រហែល៣៥០នាក់រួមទាំងប៉ូលិស កងទ័ពនិងឧទ្ធម្ភាគចក្រផងដែរត្រូវបានដាក់ពង្រាយដើម្បីតាមរកអ្នកវាយប្រហារដែលត្រូវបានគេសន្មតថា បង្កការភិតភ័យភេរវកម្មនៅក្នុងទីក្រុងនេះ។
ជនល្មើសបានបើកការបាញ់ប្រហារនៅម៉ោងប្រហែល៨យប់លើផ្លូវដ៏មមាញឹកបំផុតមួយនៃទីក្រុងនេះដែលជាហេតុបង្កអោយហ្វូងអ្នកដើរទិញឥវ៉ាន់ពេលល្ងាចរត់រកកន្លែងសុវត្ថិភាព។
លោក Castaner បាននិយាយថា ខ្មាន់កាំភ្លើងបានសម្លាប់មនុស្ស៣នាក់និងរងរបួស១២នាក់។
ប្រភពប៉ូលិសបាននិយាយថា ទាហានល្បាតតំបន់នេះដែលជាផ្នែកមួយនៃប្រតិបត្តិការប្រឆាំងភេរវកម្មជាទៀងទាត់បានបាញ់តបតជាមួយជនសង្ស័យហើយបានធ្វើអោយគាត់រងរបួសប៉ុន្តែមិនអាចបញ្ឈប់គាត់ពីការរត់គេចបានទេ។ ទាហានម្នាក់បានរងរបួសស្រាលពីការបាញ់ប្រហារដោយខ្មាន់កាំភ្លើង។
លោក Castaner ក៏បាននិយាយផងដែរថា ប្រទេសបារាំងបានបង្កើនកម្រិតប្រុងប្រយ័ត្នសន្តិសុខរបស់ខ្លួនទៅដល់កម្រិតនៃ “ការវាយប្រហារជាបន្ទាន់” ជាមួយនឹងការអនុវត្តពង្រឹងការត្រួតពិនិត្យព្រំដែននិងបង្កើនការត្រួតពិនិត្យយ៉ាងតឹងរ៉ឹងនៅតាមទីផ្សារលក់ផលិតផលបុណ្យណូអែលទាំងអស់ក្នុងប្រទេសបារាំងដើម្បីចៀសវាងការវាយប្រហារ។
សេចក្តីថ្លែងការណ៍មួយពីសេវាសន្តិសុខក្នុងតំបន់បាននិយាយថា ខ្មាន់កាំភ្លើងត្រូវបានគេកំណត់អត្តសញ្ញាណហើយកំពុងស្ថិតនៅលើបញ្ជីឃ្លាំមើលក្រុមជ្រុលនិយមដែលគេសង្ស័យ។
លោកប្រធានាធិបតី Emmanuel Macron បានបង្ហាញនៅលើ Twitter អំពីសាមគ្គីភាពរបស់ប្រទេសជាតិទាំងមូលក្រោយពីបានរៀបចំកិច្ចប្រជុំវិបត្តិមួយជាមួយមន្ត្រីខុទ្ទកាល័យនៅទីក្រុងប៉ារីស៕ AFP
Source: Kampuchea Thmey Daily
0 Comments