អគ្គលេខាធិការអង្គការសហប្រជាជាតិ នឹងចូលរួមក្នុងពិធីបិទកិច្ចប្រជុំរវាងរដ្ឋាភិបាលយេមែននិងក្រុមឧទ្ទាមដែលជាគូប្រជែងនៅប្រទេសស៊ុយអែតក្នុងសប្តាហ៍នេះ ចំពេលមានការជំរុញនៅនាទីចុងក្រោយអោយទប់ស្កាត់អំពើហិង្សាក្នុងចំណុចក្តៅចំនួនពីររបស់ប្រទេស ដែលហែកហួរដោយសង្គ្រាមមួយនេះ។ នេះបើតាមការអោយដឹងកាលពីថ្ងៃអង្គារពីការិយាល័យរបស់គាត់។
រយៈពេលជិតបួនឆ្នាំនៅក្នុងសង្គ្រាមមួយដែលបានរុញច្រានប្រជាជនយេមែនរហូតដល់ទៅ១៤លាននាក់អោយធ្លាក់ចូលក្នុងភាពអត់ឃ្លានដ៏ធំមួយ, រដ្ឋាភិបាលរបស់លោក Abedrabbo Mansour Hadi ដែលគាំទ្រដោយប្រទេសអារ៉ាប៊ីសាអ៊ូឌីតនិងក្រុមឧទ្ទាម Huthi ដែលមានទំនាក់ទំនងជាមួយប្រទេសអ៊ីរ៉ង់បានចូលរួមក្នុងកិច្ចពិភាក្សារបស់អង្គការសហប្រជាជាតិនៅភូមិ Rimbo ក្នុងប្រទេសស៊ុយអែត។
ក្រុមអ្នកសម្របសម្រួលកំពុងជំរុញអោយបន្ធូរបន្ថយអំពើហឹង្សាក្នុងទីក្រុងចំណុចក្តៅចំនួនពីរដូចជាទីក្រុង Hodeida ដែលកំពង់ផែដ៏សំខាន់សម្រាប់ការផ្តល់ជំនួយមនុស្សធម៌និងទីក្រុង Taiz ដែលជាទីក្រុងធំបំផុតទីបីរបស់យេមែននិងជាកន្លែងប្រយុទ្ធគ្នាខ្លាំងបំផុតនៃសង្គ្រាម។
ទោះបីជាយ៉ាងណាក៏ដោយ បណ្តាភាគីដែលជាគូប្រជែងមិនទាន់បានព្រមព្រៀងគ្នាលើសេចក្ដីព្រាងដែលស្នើឡើងដោយអង្គការសហប្រជាជាតិស្តីពីទីក្រុង Hodeida និងទីក្រុង Taiz នៅឡើយទេ។ សំណើទាំងពីររួមមានការបន្ធូរបន្ថយអរិភាព។
ប្រធានអង្គការសហប្រជាជាតិលោក Antonio Guterres គ្រោងនឹងចូលរួមនៅថ្ងៃចុងក្រោយនៃកិច្ចចរចាក្នុងប្រទេសស៊ុយអែតនៅថ្ងៃព្រហស្បតិ៍។
អង្គការសហប្រជាជាតិបាននិយាយនៅក្នុងសេចក្តីថ្លែងការណ៍មួយថា លោកនឹងរៀបចំកិច្ចប្រជុំជាមួយគណៈប្រតិភូទាំងពីរហើយនឹងថ្លែងទៅកាន់ពិធីបិទនៃការពិគ្រោះយោបល់ជុំនេះ។ កាលពីសប្តាហ៍មុនលោក Guterres បានអំពាវនាវអោយមានការបន្ធូរបន្ថយជម្លោះនៅជុំវិញទីក្រុង Hodeida ជាពិសេស។
គួរបញ្ជាក់ថា កិច្ចពិភាក្សាជុំមួយទៀតត្រូវបានគ្រោងធ្វើឡើងនៅដើមឆ្នាំ២០១៩៕ AFP
Source: Kampuchea Thmey Daily
0 Comments