លទ្ធផល បានបង្ហាញកាលពីថ្ងៃអង្គារថា គណបក្សកាន់អំណាចរបស់ប្រទេសឥណ្ឌា បានទទួលបរាជ័យក្នុងការបោះឆ្នោតនៅរដ្ឋរឹងមាំយ៉ាងហោចណាស់ពីរ ដែលនេះជាបញ្ហាដ៏ធំមួយចំពោះលោកនាយករដ្ឋមន្ត្រី Narendra Modi មុនការបោះឆ្នោតជាតិនៅក្នុងឆ្នាំ២០១៩។
ការបោះឆ្នោតដែលបានធ្វើឡើងកាលពីដើមខែនេះនិងនៅក្នុងខែវិច្ឆិកាត្រូវបានគេមើលឃើញថាជាការធ្វើតេស្តមួយសម្រាប់ឆ្នាំក្រោយនៅពេលដែលលោក Modi ទំនងជានឹងត្រូវតទល់ជាមួយលោក Rahul Gandhi នៃគណបក្ស Congress សម្រាប់អាណត្តិទីពីរ។
លោក Modi បាននិយាយនៅលើបណ្តាញសង្គម Twitter ថា “យើងទទួលយកការតម្រង់ផ្លូវរបស់ប្រជាជនដោយក្តីគោរព។ ខ្ញុំសូមថ្លែងអំណរគុណដល់ប្រជាជននៃរដ្ឋ Chhattisgarh, Madhya Pradesh និង Rajasthan ដែលបានផ្តល់ឱកាសដល់ពួកយើងដើម្បីបម្រើរដ្ឋទាំងនេះ។ រដ្ឋាភិបាលរបស់គណបក្ស BJP នៅក្នុងរដ្ឋទាំងនេះបានធ្វើការដោយមិនខ្លាចនឿយហត់សម្រាប់សុខុមាលភាពរបស់ប្រជាជន”។
ស្របពេលជាមួយគ្នានោះដែរ ប្រព័ន្ធផ្សព្វផ្សាយឥណ្ឌាបានដកស្រង់សម្តីរបស់លោក Gandhi ដែលបាននិយាយថា “ថ្ងៃនេះយើងបានផ្តួល BJP ។ យើងក៏នឹងផ្តួលពួកគេនៅឆ្នាំ២០១៩ដែរ។ លោក Modi បានលក់ចក្ខុវិស័យមួយដល់ប្រទេសនេះកាលពីប្រាំឆ្នាំមុន។ ប្រទេសឥណ្ឌាមានការអត់ធ្មត់ដើម្បីផ្តល់អោយពួកគេនូវរយៈពេល៥ឆ្នាំ។ ប៉ុន្តែពួកគេបានបរាជ័យហើយ”។
នៅក្នុងរដ្ឋ Chhattisgarh ដែលគ្រប់គ្រងដោយគណបក្ស BJP អស់រយៈពេល១៥ឆ្នាំមកហើយនោះ លទ្ធផលបឋមបានបង្ហាញថា គណបក្ស BJP ឈ្នះបានត្រឹមតែ១៦អាសនៈប៉ុណ្ណោះពោលគឺធ្លាក់ចុះពី៤៩អាសនៈនៅក្នុងសភាដោយតាមពីក្រោយគណបក្ស Congress ដែលមាន៦៨អាសនៈនៅក្នុងរដ្ឋសភាដែលមាន៩០អាសនៈ។
គណបក្ស Congress ក៏បានវ៉ាដាច់គណបក្ស BJP ផងដែរនៅក្នុងរដ្ឋ Rajasthan ដែលត្រូវគ្រប់គ្រងចាប់តាំងពីឆ្នាំ២០១៣មកដោយលោកស្រី Vasundhara Raje នៃគណបក្ស BJP ។ គណបក្ស Congress ទទួលបាន៩៩អាសនៈនាំមុខគណបក្ស BJP ដែលមាន៧៣អាសនៈតិចជាងការបោះឆ្នោតចុងក្រោយបំផុតដែលទទួលបាន៨៩អាសនៈ៕ AFP
Source: Kampuchea Thmey Daily
0 Comments