ចិន​ភ័យខ្លាច​នូវ​ការ​ធ្វើ​ទារុណកម្ម, លោត​ពីលើផ្ទះ​វិឡារ​ទាំង​ដៃ​ជាប់​ខ្នោះ

ព្រះសីហនុ ៖ កាលពី​វេលា​ម៉ោង​ប្រមាណ​៦​ល្ងាច​ ថ្ងៃទី​២៥ ខែ​ធ្នូ ឆ្នាំ​២០១៨ សមត្ថកិច្ច​នគរបាល​ខេត្ត​ព្រះសីហនុ បាន​ចុះ​បង្ក្រាប​ករណី​ចាប់​ឃុំឃាំង និង​បង្ខាំង​មនុស្ស​ខុសច្បាប់​មួយ​ ដោយ​ឃាត់ខ្លួន​សង្ស័យ​ជា​ជនជាតិ​ចិន​ចំនួន​៤​នាក់។
​
ក្រុម​ជនសង្ស័យ​ខាងលើនេះ ត្រូវបាន​សមត្ថកិច្ច​ឲ្យ​ដឹងថា ដំបូង​មាន​ប្រជាពលរដ្ឋ​បាន​រាយការណ៍​ថា មាន​ជនជាតិ​ចិន​ម្នាក់ ភេទ​ប្រុស បាន​លោត​ចេញពីផ្ទះ​វិឡារ​មួយ ដែល​ស្ថិតនៅ ភូមិ​៥ សង្កាត់​៤ ក្រុង​-​ខេត្ត​ព្រះសីហនុ ដោយ​ដៃ​មាន​ជាប់​ខ្នោះ មិនមាន​សម្លៀកបំពាក់ ស្លៀក​តែ​ខោ​លីអូ​ រត់​ចូល​ព្រៃ​បាត់។

បន្ទាប់ពី​បានទទួល​ដំណឹង​នេះ​ភ្លាម កម្លាំង​ជំនាញ​ផែន​នគរបាល​ព្រហ្មទណ្ឌ បាន​សហការ​ជាមួយ​កម្លាំង​អធិការដ្ឋាន​នគរបាល​ក្រុង កម្លាំង​ប៉ុស្តិ៍នគរបាល​សង្កាត់​៤ បាន​ចុះទៅ​ផ្ទះ​វិឡារ​នោះ ពេល​ទៅ​ដល់ កម្លាំង​សមត្ថកិច្ច​យើង​បានឃើញ​ជនជាតិ​ចិន​០៤​នាក់ ប្រុសៗ នៅមុខ​ផ្ទះ​វិឡារ​នោះ សមត្ថកិច្ច​បាន​ឃាត់​ឲ្យ​ពួកគេ​នៅ​ស្ងៀម តែ​ពួកគេ​បាន​ព្យាយាម​រត់ សមត្ថកិច្ច​ក៏​ដេញតាម​ចាប់​ឃាត់ខ្លួន​ជនជាតិ​ចិន​ទាំង​០៤​នាក់​នោះ​តែម្ដង។​
​
បន្ទាប់មក​កម្លាំង​សមត្ថកិច្ច​បាន​ឲ្យ​ពួកគេ​បើក​សោ​របង​ដើម្បី​ធ្វើ​រដ្ឋបាល តែ​ពួកគេ​ប្រាប់ថា កូនសោ​នៅ​គ្នា​របស់​ពួកគេ​ម្នាក់ទៀត រត់គេចខ្លួន​បាត់​ហើយ។ ពេលនោះ​ដោយមាន​ការ​អនុញ្ញាត​ពី​លោក​ព្រះរាជអាជ្ញា នៃ​អយ្យការ​អម​សាលាដំបូង​ខេត្ត​ព្រះសីហនុ បាន​ឲ្យ​កម្លាំង​សមត្ថកិច្ច​កាត់​សោ ដើម្បី​ធ្វើ​រដ្ឋបាល​ឆែកឆេរ ជា​លទ្ធផល​កម្លាំង​សមត្ថកិច្ច​យើង បាន​រកឃើញ​វត្ថុតាង​មួយចំនួន​ដែល​ពាក់ព័ន្ធ​ក្នុងករណីនេះ។​

ជនរងគ្រោះ​ជា​ជនជាតិ​ចិន ភេទ​ប្រុស បាន​រត់​ចូលទៅ​ក្នុងព្រៃ​បាត់​កម្លាំង​សមត្ថកិច្ច​យើង​កំពុងធ្វើការ​ស្វែងរក។​

ជនសង្ស័យ​ចំនួន​០៤​នាក់ ​៖ ទី ១-​ឈ្មោះ HUANG WU ភេទ​ប្រុស អាយុ​៣០​ឆ្នាំ ជនជាតិ​ចិន មុខរបរ បុគ្គលិក​ក្រុម​ចងការ​ប្រាក់​តាម​កាស៊ីណូ មាន​ទីលំនៅ ភូមិ​៥ សង្កាត់​៤ ក្រុង​-​ខេត្ត​ព្រះសីហនុ។​
​ទី​២-​ឈ្មោះ GUO PAN ហៅ A ZHENG ភេទ​ប្រុស អាយុ​៣២​ឆ្នាំ ជនជាតិ​ចិន លិខិតឆ្លងដែន​លេខៈ EC០៧៨៩៤១៣ មុខរបរ បុគ្គលិក​ក្រុម​ចងការ​ប្រាក់​តាម​កាស៊ីណូ មាន​ទីលំនៅ ភូមិ​៥ សង្កាត់​លេខ​៤ ក្រុង​-​ខេត្ត​ព្រះសីហនុ។​
​ទី​៣-​ឈ្មោះ ZHOU TAO TAO ហៅ XIAO YI ភេទ​ប្រុស អាយុ៣៥​ឆ្នាំ ជនជាតិ​ចិន មុខរបរ បុគ្គលិក​ក្រុម​ចងការ​ប្រាក់​តាម​កាស៊ីណូ មាន​ទីលំនៅ ភូមិ​៥ សង្កាត់​៤ ក្រុង​-​ខេត្ត​ព្រះសីហនុ។​
​ទី​៤-​ឈ្មោះ LU SHENMAN ហៅ A YUE ភេទ​ប្រុស អាយុ​៣០​ឆ្នាំ ជនជាតិ​ចិន មុខរបរ បុគ្គលិក​ក្រុម​ចងការ​ប្រាក់​តាម​កាស៊ីណូ មាន​ទីលំនៅ ភូមិ​៥ សង្កាត់​៤ ក្រុង​-​ខេត្ត​ព្រះសីហនុ។ វត្ថុតាង​ចាប់​យក​បាន​រួមមាន ​៖
-​ដំបង​ដែក​រលាស់ ០២​ដើម​
-​កន្ត្រៃ ០១
-​ស្គុត ០១​ដុំ​
-​ខ្នោះដៃ ០១​គូរ​
-​ស្រោម​ខ្នោះ ០២
-​ដៃ​ស្មា​ហាល​ខោអាវ បត់​រុំ​ស្គុត ០១
-​ទូរស័ព្ទ​ដៃ​ចំនួន​០៦​គ្រឿង​
-​វ៉ាលីស៍​សំលៀកបំពាក់​០៤ ក្នុងនោះ​មាន​សំលៀកបំពាក់​មួយចំនួន​
-​កាបូបស្ពាយ​០៣ ក្នុងនោះ​មាន​សំលៀកបំពាក់​មួយចំនួន។​
​
បើតាម​ការស្រាវជ្រាវ ករណីនេះ កើតឡើង​ដោយសារ​ជនរងគ្រោះ​បាន​ខ្ចីលុយ​ពី​ក្រុម​ជនសង្ស័យ ដើម្បី​លេងល្បែង​ក្នុង​កាស៊ីណូ ពេល​លេង​ចាញ់​គ្មាន​លុយ​សង ក៏ត្រូវ​ក្រុម​ជនសង្ស័យ​ចាប់​យកមក​ឃុំខ្លួន​នៅផ្ទះ​កីឡា​កន្លែងកើតហេតុ​តែម្តង លុះ​នៅ​ថ្ងៃទី​២៥ ខែធ្នូ ឆ្នាំ​២០១៨ វេលា​ម៉ោង១៨និង​០០​នាទី ពេល​ក្រុម​ជនសង្ស័យ​កំពុង​ដេកលក់ ជនរងគ្រោះ​ក៏​ឆ្លៀត​ឱកាស​ផ្លោះ​របង​រត់​ចូលទៅក្នុង​ព្រៃ​បាត់ ហើយ​ត្រូវ​បងប្អូន​ប្រជាពលរដ្ឋ​ដែល​នៅក្បែរនោះ​ឃើញ ក៏​រាយការណ៍​ជូន​សមត្ថកិច្ច​តែម្ដង។​
​
ចំពោះ​ករណីនេះ ការិយាល័យ​នគរបាល​ព្រហ្មទណ្ឌ​កម្រិត​ស្រាល កំពុង​កសាង​សំណុំរឿង បញ្ជូន​ទៅ​សាលាដំបូង​ខេត្ត​ព្រះសីហនុ​ដើម្បី​ចាត់ការ​តាម​នីតិវិធី៕

 

Source: Kampuchea Thmey Daily