លោក​ឧកញ៉ា ឆាយ សុធា និង​សប្បុរសជន​ខ្មែរ​រស់នៅ​កាណាដា ចុះ​ចែក​អំណោយ​ដល់​ពលរដ្ឋ​ក្រីក្រ​ជាង​២០​គ្រួសារ​នៅ​ខេត្តកណ្តាល

ភ្នំពេញ​ ៖ អគ្គនាយក​ក្រុមហ៊ុន Diamond Lucky Asia Co.,Ltd លោក​ឧកញ៉ា ឆាយ សុធា រួម​ទាំង​ក្រុម​គ្រួសារ និង​ដោយមាន​ការ​សហការ​ពី​ពលរដ្ឋ​ខ្មែរ​រស់នៅ​ប្រទេស​កាណាដា ក្រោម​ការ​ផ្តួចផ្តើម​ដឹកនាំ​ដោយ លោក ឋាន វុ​ឌ្ឍី​គឹម​ពៅ និង​លោក ហេង ប៊ុន​ហាក់ កាលពី​ថ្ងៃទី​២៦ ខែធ្នូ ឆ្នាំ២០១៨ បាន​នាំយក​អំណោយ​ចុះ​ចែកជូន​ដោយផ្ទាល់​ដល់​ប្រជាពលរដ្ឋ​ទីទ័លក្រ​ចំនួន​២៨​គ្រួសារ​រស់នៅ​ភូមិ​កោះ​រកា ភូមិ​ឈើទាល ឃុំ​ព្រែក​អញ្ចាញ​, ភូមិ​ស្ពាន​ថ្មី ភូមិ​ព្រែក​ជ្រៅ ឃុំ​រកា​កោង និង ភូមិ​ឡឥដ្ឋ ភូមិ​ស្វាយជ្រុំ ឃុំ​ព្រែក​ដំបង ស្រុក​មុខកំពូល ខេត្តកណ្តាល​។



លោក​ឧកញ៉ា ឆាយ សុធា បាន​ឲ្យ​ដឹង​ថា ថ្ងៃនេះ​លោក​ពិតជា​សប្បាយរីករាយ និង​មាន​កិត្តិយស​ណាស់ ដែល​បាន​បងប្អូន​ខ្មែរ ដែល​រស់នៅ​ប្រទេស​កាណាដា បាន​ចាត់តាំង​លោក​ឲ្យ​ធ្វើ​ជា​តំណាង ដើម្បី​ពាំ​នាំ​នូវ​ថវិកា និង​គ្រឿង​ឧបភោគបរិភោគ​មួយចំនួន ចុះ​ចែកជូន​ដល់​ប្រជាពលរដ្ឋ​ទីទ័លក្រ ចំនួន​៥៤​គ្រួសារ ដែល​រស់នៅ​ជាង​១០​ភូមិ​ផ្សេងៗ​គ្នា ក្នុង​ខេត្តកណ្ដាល ខេត្តកំពង់ចាម ខេត្ត​ត្បូងឃ្មុំ និង​ខេត្តកំពង់ឆ្នាំង ហើយ​ថ្ងៃនេះ លោក​រៀបចំ​ចែក​ត្រឹមតែ​ជាង ២០​គ្រួសារ​សិន​ប៉ុណ្ណោះ ព្រោះ​ដោយសារ​ពួកគាត់​មាន​ចំនួន​ច្រើន​គ្រួសារ ហើយ​រស់នៅ​កន្លែង​ឆ្ងាយៗ ពី​គ្នា​ក្នុង​ខេត្ត​ផ្សេងៗ​គ្នា​ទៀត ហើយ​លោក​នឹង​រៀបចំ​ចែកជូន​អំណោយ​ទាំងអស់នោះ នៅ​ថ្ងៃ​បន្តបន្ទាប់​ទៀត រហូតដល់​អំណោយ​បាន​ដល់​ពួកគាត់​គ្រប់ៗ​គ្នា​។



តាម​លោក​ឆាយ សុធា អំណោយ​ដែល​ប្រជាពលរដ្ឋ​ទីទ័លក្រ​ទាំងអស់ ដែល​ទទួល​បាន រួមមាន​ក្នុង​មួយ​គ្រួសារ ទទួលបាន​អង្ករ ១​បាវ ៥០​គីឡូក្រាម ទឹកត្រី​១​យួរ ទឹកស៊ីអ៊ីវ ១​យួរ ត្រីខកំប៉ុង ១​យួរ មី ១​កេស និង​ថវិកា​ចំនួន ១៥​ម៉ឺន​រៀល​ចំនួន ៩​គ្រួសារ ដែល​ពួកគាត់​មាន​ជីវភាព​ទីទ័លក្រ​ខ្លាំង ថែមទាំង​មាន​ជំងឺ​ប្រចាំកាយ និង​ចំនួន​គ្រួសារ​ផ្សេងៗ​ទៀត ទទួលបាន​អង្ករ ១​បាវ ៥០​គីឡូក្រាម ទឹកត្រី​១​យួរ ទឹកស៊ីអ៊ីវ ១​យួរ ត្រីខកំប៉ុង ១​យួរ មី ១​កេស និង​ថវិកា ១០​ម៉ឺន​រៀល និង​មានគ្រួសារ​ខ្លះ​ទទួលបាន​អង្គរ​មួយ​បាវ និង​ទឹកប្រាក់​មួយចំនួន​ផងដែរ​។​



តាំង​នាម​លោក​តំណាង​ឲ្យ​ប្រជាពលរដ្ឋ​ទីទ័លក្រ​ទាំងអស់ លោក ឆាយ សុធា បាន​ថ្លែងអំណរគុណ​ដល់​បងប្អូន​ខ្មែរ ដែល​រស់នៅ​ប្រទេស​កាណាដា ទាំងអស់​ដែល​តែងតែ​យកចិត្តទុកដាក់ មាន​ក្តី​អាណិតអាសូរ និង​តែងតែ​ស្វះស្វែង រក​វិធី​បង្កើត​ជា​កម្មវិធី​មនុស្សធម៌​ផ្សេងៗ ដើម្បី​រៃអង្គាស​ថវិកា មកជួយ​ដល់​ប្រជាជន​ទីទាល់ក្រ​នេះ​។ លោក​ក៏បាន​លើក​ឡើងជា​ទស្សន​ទាន​មួយ​ថា “​សូមអ្នក​ដែលមាន​លទ្ធភាព​ទាំងឡាយ មេត្តា​ចូលរួម​បរិច្ចាគ ធនធាន​ផ្ទាល់ខ្លួន​តាម​សទ្ធា​ជ្រះថ្លា ជួយ​ដល់​អ្នក​ដែល​ទីទ័លក្រ​”​។



សូម​ជម្រាប​ដែរ​ថា ពលរដ្ឋ​ទីទ័លក្រ ២៨​គ្រួសារ នៅ​ខេត្តកណ្តាល​ដែល​ទទួលបាន​អំណោយ​នេះ រួមមាន ទី​១, ភូមិ​កោះ​រកា ភូមិ​ឈើទាល ឃុំ​ព្រែក​អញ្ចាញ ស្រុក​មុខកំពូល ខេត្តកណ្តាល ទទួល​អំណោយ​បាន ៧​គ្រួសារ ទី​២, ភូមិ​ស្ពាន​ថ្មី ភូមិ​ព្រែក​ជ្រៅ ឃុំ​រកា​កោង ស្រុក​មុខកំពូល ខេត្តកណ្តាល ទទួល​អំណោយ​បាន ១០​គ្រួសារ ទី​៣, ភូមិ​ឡឥដ្ឋ ភូមិ​ស្វាយជ្រុំ ឃុំ​ព្រែក​ដំបង ស្រុក​មុខកំពូល ខេត្តកណ្តាល ទទួល​អំណោយ​បាន ១១​គ្រួសារ​ផងដែរ​។



សូម​បញ្ជាក់​ថា ក្រុមហ៊ុន Diamond Lucky Asia Co.,Ltd គឺជា​ក្រុមហ៊ុន​ពិគ្រោះ​យោបល់ ខាង​ផ្នែក​ច្បាប់ និង​ការងារ​វិនិយោគ​នៅក្នុង​ប្រទេស​កម្ពុជា ហើយ​ក្រុមហ៊ុន​មួយ​នេះ ​ក៏​មាន​មេធាវី​ជាច្រើន បាន​ប្រតិបត្តិការ​ការងារ​ដើម្បី​ជួយ​ដល់​ប្រជាជន​ក្រីក្រ នាពេល​កន្លងមក​បាន​យ៉ាងច្រើន​ផងដែរ ហើយ​នាពេល​កន្លងមក​ក្រុមហ៊ុន ក៏​តែងតែ​ធ្វើជា​អំណោយទាន ចែកជូន​ដល់​ប្រជាជន​ទីទ័លក្រ ជារឿយៗ​ផងដែរ​៕

Source: Kampuchea Thmey Daily