មនុស្ស​១០,៥០០​នាក់ ​ត្រូវ​ចាប់ខ្លួន ​មុន​ការបោះឆ្នោតរ​បស់បង់​ក្លា​ដែ​ស

គណបក្សប្រឆាំង​បាន​និយាយ​កាលពី​ថ្ងៃ​អង្គា​រថា ប៉ូលិស​បង់​ក្លា​ដែ​សបាន​ចាប់ខ្លួន​សកម្មជន​បក្ស​ប្រឆាំង​ជាង​១០,៥០០​នាក់​នៅក្នុង​ការបង្ក្រាប​មួយ​មុន​ការបោះឆ្នោត​ក្នុង​សប្តាហ៍​នេះ​។​
​
តួលេខ​នេះ​ត្រូវបាន​បញ្ចេញ​បន្ទាប់ពី​សហរដ្ឋអាមេរិក​ជំរុញ​រដ្ឋាភិបាល​របស់​នាយករដ្ឋមន្ត្រី Sheikh Hasina ឲ្យ​ធ្វើការ​បន្ថែមទៀត​ដើម្បី​ធានា​ការបោះឆ្នោត​ដោយ​សេរី​នៅ​ថ្ងៃអាទិត្យ​ស្របពេល​ដែល​លោកស្រី​មានបំណង​ឈ្នះ​អាណត្តិ​ទី​បួន​។​
​
គណបក្សប្រឆាំង​បាន​និយាយថា ការចាប់ខ្លួន​ចាប់តាំងពី​ការបោះឆ្នោត​ត្រូវបាន​ប្រកាស​កាលពី​ថ្ងៃទី​៨​ខែវិច្ឆិកា​នេះ​គឺមាន​បំណង​បង្កើត “​បរិយាកាស​ភ័យខ្លាច​”​។​
​
គណបក្សប្រឆាំង​ដ៏​ធំ​គឺ Bangladesh Nationalist Party (BNP) ដែល​មេដឹកនាំ​របស់ខ្លួន​ឈ្មោះ Khaleda Zia កំពុង​ជាប់ពន្ធនាគារ​រយៈពេល​១៧​ឆ្នាំ​បាន​និយាយថា សកម្មជន​របស់ខ្លួន​ចំនួន ៧,០២១​នាក់​ត្រូវបាន​ឃាត់ខ្លួន​។​
​
ចំណែក​គណបក្ស Jamaat-e-Islami ដែលជា​សម្ព័ន្ធ​ឥស្លាម​របស់ខ្លួន​បាន​និយាយថា អ្នកគាំទ្រ​ជាង​៣,៥០០​នាក់​ត្រូវបាន​គេ​ឃុំឃាំង​។ គណបក្ស Jamaat-e-Islami ត្រូវបាន​ហាមឃាត់​ពី​ការចូលរួម​ក្នុងការ​បោះឆ្នោត​។​
​
អគ្គលេខាធិការ Jamaat លោក Shafiqur Rahman បាន​ប្រាប់ AFP ថា “​ជា​រៀងរាល់ថ្ងៃ សកម្មជន​របស់​យើង​ពី​៨០​ទៅ​៩០​នាក់​ត្រូវបាន​ចាប់ខ្លួន​នៅ​ទូទាំងប្រទេស​។ ការចាប់ខ្លួន​ទាំងនេះ​បាន​បង្កើត​បរិយាកាស​ភ័យខ្លាច​”​។​
​
អ្នកនាំពាក្យ​ប៉ូលិស​លោក Sohel Rana មិនបាន​បញ្ជាក់​ពី​បុគ្គល​ណាមួយ​សម្រាប់​ការចាប់ខ្លួន​នោះទេ​ប៉ុន្តែ​បាន​និយាយថា ពួកគេ​មិនបាន​ធ្វើការ​ចាប់ខ្លួន​ដោយ​គ្មាន​ដីកា​បញ្ជា​ឡើយ​។​
​
លោក​បាន​ប្រាប់ AFP ថា “​យើង​មិនដែល​ផ្តោតលើ​បុគ្គល​ណា​ម្នាក់​ទេ​លុះត្រាតែ​ពួកគេ​បំពាន​ច្បាប់​។ មនុស្ស​ទាំងនេះ​មាន​ដីកា​ជាក់លាក់​ប្រឆាំងនឹង​ពួកគេ​”​។​
​
លោកស្រី Hasina និង​លោកស្រី Zia គឺជា​គូសត្រូវ​នយោបាយ​ចាប់តាំងពី​ការណែនាំ​លទ្ធិប្រជាធិបតេយ្យ​ក្នុង​ឆ្នាំ​១៩៩១​។ ពួកគេ​បាន​ផ្លាស់ប្តូរ​អំណាច​ប៉ុន្តែ​ការគ្រប់គ្រង​បច្ចុប្បន្ន​របស់លោក​ស្រី Hasina បាន​បន្ត​ចាប់តាំងពី​ឆ្នាំ​២០០៩​មកម្ល៉េះ​ហើយ​រយៈពេល​ជាប់ពន្ធនាគារ​របស់លោក​ស្រី Zia នៅ​ឆ្នាំនេះ​បាន​រារាំង​លោកស្រី​ពី​ការចូលរួម​ក្នុងការ​បោះឆ្នោត​៕ AFP

​

Source: Kampuchea Thmey Daily