តាកែវ ៖ លោក ឈៀង គីម និងប្រពន្ធឈ្មោះ សា លីម បានធ្វើការអំពាវនាវដល់អាជ្ញាធរមានសមត្ថកិច្ចនិងលោក អ៊ូច ភា អភិបាលនៃគណៈអភិបាលខេត្តតាកែវមេត្តាជួយរកយុត្តិធម៌ពិសេសមេត្តាពន្លឿនការស្រាវជ្រាវស្វែងរកចាប់ខ្លួនជនល្មើស ដែលបានធ្វើសកម្មភាពចាប់រំលោភសេពសន្ថវៈ និងសម្លាប់កូនស្រីវ័យ០៩ឆ្នាំរបស់គាត់ទាំងកំពុងនៅរៀនផង ខណៈហេតុការណ៍នេះបានកើតឡើងជិតកន្លះខែមកហើយ។
ស្របពេលដែលជនល្មើសត្រូវបានស្គាល់អត្តសញ្ញាណច្បាស់ហើយនោះ ឪពុកម្តាយក្មេងស្រីរងគ្រោះដែលត្រូវគេរំលោភសម្លាប់កាលពីពេលថ្មីៗនេះ បានអំពាវនាវដល់សមត្ថកិច្ចយុត្តិធម៌ពិសេសលោក អ៊ូច ភា អភិបាលនៃគណៈអភិបាលខេត្តតាកែវមេត្តាពន្លឿនការស្រាវជ្រាវចាប់ខ្លួនជនល្មើសយកមកផ្តន្ទាទោសតាមផ្លូវច្បាប់ឲ្យខានតែបានផងដើម្បីឲ្យវិញ្ញាណកូនស្រីអភ័ព្វរបស់គាត់បានស្ងប់។
គួររំឭកថា ក្មេងស្រីអនីតិជនវ័យ០៩ឆ្នាំម្នាក់ត្រូវបានជនប្រមឹកល្មោភកាមម្នាក់ចាប់យកទៅរំលោភសេពសន្ថវៈ និងសម្លាប់កាលពីថ្ងៃទី០៣ ខែធ្នូ ឆ្នាំ២០១៨ វេលាម៉ោង ១៥និង៤៥នាទី នៅភូមិជម្ពូព្រឹក្ស ឃុំចំប៉ា ស្រុកព្រៃកប្បាស ខេត្តតាកែវ។ ករណីឃាតកម្មរំលោភសម្លាប់នេះ តាមការឲ្យដឹងពីប៉ូលិសជំនាញស្រុកព្រៃកប្បាសប្រាប់ថា គឺបង្កឡើងដោយជនសង្ស័យឈ្មោះ យ៉េន ធី ភេទប្រុស អាយុ៣៧ឆ្នាំ មុខរបរមិនពិតប្រាកដ និងជាមនុស្សស្រវឹងខួប រស់នៅភូមិជម្ពូព្រឹក្ស ឃុំចំប៉ា ស្រុកព្រៃកប្បាស ខេត្តតាកែវ។ ចំណែកក្មេងស្រីរងគ្រោះឈ្មោះ ឆៃ លីកា អាយុ០៩ឆ្នាំ រស់នៅភូមិ ឃុំ ជាមួយគ្នា។ សមត្ថកិច្ចបានបន្តថា ជនសង្ស័យបានចាប់ក្មេងស្រីយកទៅរំលោភនៅផ្ទះរបស់ខ្លួនខណៈដែលស្រវឹងស្រាជោកជាំ ពេលកំពុងធ្វើសកម្មភាព ក៏ត្រូវបានក្មេងប្រុសឈ្មោះ សម្បត្តិ ផាន់ណេត អាយុ១៤ឆ្នាំ រស់នៅភូមិ ឃុំ ជាមួយឃើញ ក្រោយដឹងថាមានគេឃើញហើយជនសង្ស័យឈ្មោះ យ៉េន ធី ក៏បានចាប់ច្របាច់ក ក្មេងស្រីរងគ្រោះសម្លាប់ចោល រួចយកសពទៅទម្លាក់ចោលក្នុងទឹកស្រះខាងលិចផ្ទះរបស់ខ្លួននិងបានរត់គេចខ្លួនបាត់។
បច្ចុប្បន្នមកទល់នឹងថ្ងៃទី១២ ខែធ្នូ ឆ្នាំ២០១៨ ជនល្មើសក្នុងករណីនេះ នៅមិនទាន់សមត្ថកិច្ចចាប់ខ្លួនយកមកផ្តន្ទាទោសបាននៅឡើយទេ ស្របពេលជាមួយគ្នានេះដែរឪពុកម្តាយក្មេងស្រីរងគ្រោះបានអំពាវនាវឲ្យសមត្ថកិច្ចយុត្តិធម៌ជួយពន្លឿនការស្រាវជ្រាវចាប់ខ្លួនជនល្មើសឲ្យបានឆាប់ៗផង៕
Source: Kampuchea Thmey Daily
0 Comments