ក្រុមស្វែងរកនិងជួយសង្គ្រោះឥណ្ឌូនេស៊ីនៅថ្ងៃពុធ បាននាំពលរដ្ឋដែលជាប់គាំងចេញពីកោះដាច់ស្រយាលនិងបានធ្វើដំណើរទៅកាន់បណ្តាសហគមន៍ដាច់ស្រយាលដែលនៅតែត្រូវការជំនួយបន្ទាប់ពីរលកយក្សស៊ូណាមិដែលបានសម្លាប់មនុស្សជាង៤០០នាក់។
បុគ្គលិកពេទ្យបានព្រមានថា ការផ្គត់ផ្គង់ទឹកស្អាតនិងឱសថកំពុងតែមានកម្រិតទាបដែលនាំឲ្យមានក្តីព្រួយបារម្ភអំពីវិបត្តិសុខភាពសាធារណៈខណៈអ្នកនៅរស់រាប់ពាន់នាក់បានប្រមូលផ្តុំគ្នានៅជម្រកនិងមន្ទីរពេទ្យ។ មនុស្សជាច្រើនត្រូវបាត់បង់ផ្ទះសម្បែងដោយសាររលកយក្សនេះ។
ទីភ្នាក់ងារគ្រោះមហន្តរាយបានឲ្យដឹងថា ខ្លួនបានបញ្ជូនឧទ្ធម្ភាគចក្រដើម្បីទម្លាក់ការផ្គត់ផ្គង់ទៅសហគមន៍តូចៗដែលពិបាកទៅដល់នៅតាមបណ្តោយឆ្នេរកោះជ្វានិងស៊ូម៉ាត្រាខាងត្បូង។
ទីភ្នាក់ងារនេះបាននិយាយថា ពលរដ្ឋរាប់រយនាក់ដែលនៅតែជាប់លើកោះតូចៗនៃច្រកសមុទ្រ Sunda នឹងត្រូវបាននាំចេញតាមឧទ្ធម្ភាគចក្រឬជិះទូកទៅកាន់ជម្រក។
សត្វឆ្កែហិតក្លិនកំពុងត្រូវបានគេប្រើដើម្បីស្វែងរកអ្នកដែលនៅបាត់ខ្លួនខណៈសាច់ញាតិដែលរងទុក្ខវេទនាបានតម្រង់ជួរនៅមជ្ឈមណ្ឌលកំណត់អត្តសញ្ញាណប៉ុន្តែក្តីសង្ឃឹមនៃការរកឃើញអ្នកដែលរស់រានមានជីវិតនៅក្រោមកម្ទេចថ្មគឺបានរសាត់បាត់ទៅហើយ។
មន្ត្រីទីភ្នាក់ងារគ្រោះមហន្តរាយជាន់ខ្ពស់លោក Dody Ruswandi បាននិយាយថា “យើងកំពុងចាប់ផ្តើមចូលឲ្យដល់កន្លែងនៅដាច់ឆ្ងាយបំផុតដែលត្រូវរងការវាយប្រហារដោយរលកយក្សស៊ូណាមិ។ ការបំផ្លិចបំផ្លាញមានទំហំធំណាស់ប៉ុន្តែយើងមិនអាចចូលទៅទីនោះបានទេក្នុងរយៈពេលពីរថ្ងៃដំបូង”។
លោកបានបន្ថែមថា ផ្លូវថ្នល់និងស្ពានខ្លះនៅជិតសហគមន៍ដាច់ស្រយាលគឺបានរងការខូចខាតដែលជាហេតុធ្វើឲ្យផ្លូវថ្នល់ចូលទៅកាន់ទីនោះកាន់តែលំបាក។
រលកយក្សស៊ូណាមិដ៏ខ្លាំងក្លាបានវាយប្រហារកាលពីយប់ថ្ងៃសៅរ៍ដោយគ្មានការព្រមានណាមួយ។ វាបានបោកបក់លើឆ្នេរសមុទ្រដ៏មានប្រជាប្រិយភាពហើយបានជន់លិចសណ្ឋាគារទេសចរណ៍និងសហគមន៍នៅតាមឆ្នេរសមុទ្រ។
ចំនួនអ្នកស្លាប់ចុងក្រោយគឺ៤២៩នាក់ខណៈមនុស្ស១,៤៨៥នាក់រងរបួសនិង១៥៤នាក់ទៀតកំពុងបាត់ខ្លួន៕ AFP
Source: Kampuchea Thmey Daily
0 Comments