ចិន​កូរ​ពេញ​ស្រុក ៖ បញ្ជូន​ក្រុម​ចិន​៧​នាក់​ ដែល​ចាប់ជំរិត​ចិន​ដូចគ្នា​ ទារ​ប្រាក់​ឡើង​តុលាការ​

ភ្នំពេញ ៖ ជនជាតិ​ចិន​ចំនួន​៧​នាក់​ ក្នុងចំណោម​១៥​នាក់ ដែល​សមត្ថកិច្ច​ចាប់ខ្លួន​ពាក់ព័ន្ធ​ករណី​បង្ខាំង​មនុស្ស​ខុសច្បាប់ និង​ជំរិត​ទារ​ប្រាក់ នា​ព្រឹក​ថ្ងៃ​ទី​២៦ ខែ​ធ្នូ ឆ្នាំ​២០១៨ ត្រូវបាន​សមត្ថកិច្ច​នគរបាល​ព្រហ្មទណ្ឌ​កម្រិត​ធ្ងន់ ក្រសួងមហាផ្ទៃ​បញ្ជូន មកកាន់​សាលាដំបូង​រាជធានី​ភ្នំពេញ ដើម្បី​ធ្វើការ​ចោទប្រកាន់​ជា​ផ្លូវការ ។
​
ជនសង្ស័យ​ជា​ជនជាតិ​ចិន​ដែក​ត្រូវ​បញ្ជូន​ឡើង​តុលាការ​នេះ ​ទី​១.​ឈ្មោះ WANG LONG ភេទ​ប្រុស អាយុ​៣០​ឆ្នាំ។ ទី​២.​ឈ្មោះ YU HAO ភេទ​ប្រុស អាយុ​២០​ឆ្នាំ​។ ទី៣.​ឈ្មោះ PENG CHONG ភេទ​ប្រុស អាយុ​៣០​ឆ្នាំ​។ ទី៤.​ឈ្មោះ ឈឹង លី​មីង ហៅ ហ្វា​ង សឺ ភេទ​ប្រុស អាយុ​៣០​ឆ្នាំ។ ទី​៥.​ឈ្មោះ អ៊ូ រួយ ភេទ​ប្រុស អាយុ​១៩​ឆ្នាំ។ ​ទី៦.​ឈ្មោះ ZHOU YUAN ភេទ​ប្រុស អាយុ​៣១​ឆ្នាំ និង​ទី​៧.​ឈ្មោះ DENG CHOAN QIANG ភេទ​ប្រុស អាយុ​៣០​ឆ្នាំ។ ព្រះរាជអាជ្ញា​អម​សាលាដំបូង​កំពុង​ធ្វើការ​សាកសួរ​ក្រុម​ជន​ជាតិ​ចិន​ទាំង​៧​នាក់​នៅឡើយ។​
​
នៅឯ​សាលាដំបូង​រាជធានី​ភ្នំពេញ ត្រូវបាន​គេ​ដឹងថា កាលពី​វេលា​ម៉ោង​៨​និង​៣០​នាទី​យប់ ​ថ្ងៃទី​២២ ធ្នូ មាន​ករណី​ជនជាតិ​ចិន​២​នាក់ ជិះ​រថយន្ត​ម៉ាក​ឡិច​ស៊ី​ស​អែ​រអិច​៣០០​ ពណ៌​ខ្មៅ​១​គ្រឿង បាន​ធ្វើ​សកម្មភាព​ចាប់​ឈ្មោះ HAN XIAO FEI ជា​ជន​ជាតិចិន​ដូចគ្នា​ដាក់​ចូល​ក្នុង​រថយន្ត នៅ​ចំណុច​មុខ​ព្រលានយន្តហោះ​អន្តរជាតិ​ភ្នំពេញ ស្ថិត​ក្នុង​សង្កាត់​កា​កាប ខណ្ឌ​ពោធិ៍​សែន​ជ័យ យក​ទៅ​បង្ខាំង​ទុក​ធ្វើ​ទារុណកម្ម​ដើម្បី​ជំរិត​ទារប្រាក់។
​
ប្រភព​បន្ត​ថា ជនសង្ស័យ​បាន​ចាប់​ជនរងគ្រោះ​យកទៅ​បង្ខាំង​ទុក​នៅ​អាគារ​លេខ​៦៩KJ ផ្លូវ​កាំ​កូ​ស៊ី​ធី ភូមិ​ពោងពាយ សង្កាត់​ទួល​សង្កែ​២ ខណ្ឌ​ឫស្សី​កែវ រាជធានី​ភ្នំពេញ ដែលមាន​បក្សពួក​ចិន​ដូចគ្នា​មួយ​ចំនួន​ទៀត​កំពុង​រង់ចាំ​នៅ​ទីនោះ។ នៅពេល​ជនសង្ស័យ​បាន​ចាប់ខ្លួន​ជនរងគ្រោះ​យកទៅ​បង្ខាំង​ទុក ក្រោយមក​ស្រាប់តែ​ជនសង្ស័យ​បាន​ទូរស័ព្ទ​គំរាម​ទារ​ប្រាក់​ពី​ក្រុម​ក្រុមគ្រួសារ​ជនរងគ្រោះ​ចំនួន​៦. ០០០​ដុល្លារ​អាមេរិក ( ប្រាំមួយ​ពាន់ ) ជា​ថ្នូរ​នឹង​ការធ្វើ​ទារុណកម្ម​ រួមទាំង​ការដោះលែង​ជនរងគ្រោះ ។
​
លុះ​ថ្ងៃទី​២៣​ធ្នូ ក្រុមគ្រួសារ​ជនរងគ្រោះ​ក៏បាន​ទៅប្តឹង​សមត្ថកិច្ច ដើម្បី​ឲ្យ​ជួយ​សហការ​វែកមុខ​ក្រុម​ឧក្រិដ្ឋជន​ចាប់ជំរិត​ទារប្រាក់។ បានជា​នៅ​រសៀល​ថ្ងៃ​ដដែល​នោះ កម្លាំង​សមត្ថកិច្ច​នាយកដ្ឋាន​នគរបាល​ព្រហ្មទណ្ឌ​ក្រសួង​មហាផ្ទៃ ធ្វើការ​ឡោមព័ទ្ធ​ចាប់ខ្លួន​ជនសង្ស័យ​នៅ​ពេល​ពួកគេ​បាន​ណាត់​ក្រុមគ្រួសារ​ជនរងគ្រោះ​ឲ្យ​ទៅ​ទទួលយក​ប្រាក់ និង​ឈានដល់​ក្រសោប​ទាំង​សំបុក​ចំនួន​១៥​នាក់ នៅ​ម្តុំ​កាំ​កូ​ស៊ី​ធី ដែល​ពេលនោះ​សមត្ថកិច្ច ក៏បាន​រំដោះ​ជនរងគ្រោះ​ពី​កណ្ដាប់ដៃ​ក្រុម​ឧក្រិដ្ឋជន​មក​វិញ​ដែរ។

ក្រោយពេល​រំដោះ ​ជនរងគ្រោះ​បាន​រៀបរាប់​ប្រាប់​សមត្ថកិច្ច​ថា កាលពី​ថ្ងៃ​មិន​ចាំ​ខែ​ធ្នូ ឆ្នាំ​២០១៨ រូប​គេ​បាន​ខ្ចីប្រាក់​ឈ្មោះ WANG ZIHIO ចំនួន​២.២០០​ដុល្លារ​អាមេរិក​(​ពីរ​ពាន់​ពីរ​រយ​) និង​គិត​ការ​ប្រាក់​៨០០​ដុល្លារ​អាមេរិក។
​
លុះ​វេលា​ម៉ោង​៨​និង​៣០​នាទី​យប់ ​ថ្ងៃ​ទី​២២​ធ្នូ ម្ចាស់​ប្រាក់ និង​បក្សពួក បាន​ជិះ​រថយន្ត​ឡិច​ស៊ី​ស​ណាត់​រូបគេ​ទៅ​ជួប​នៅ​ជិត​ព្រលានយន្តហោះ​អន្តរជាតិ​ភ្នំពេញ នៅ​ពេល​ជួប​គ្នា​ហើយ​ជនសង្ស័យ​បាន​បង្ខំ​ឲ្យ​រូបគេ​សង​ប្រាក់​ចំនួន​៣.៥០០​ដុល្លារ​អាមេរិក (​បី​រយ​) ពេលនោះ​ពួកគេ​មិនទាន់បាន​និយាយ​គ្នា​ស្រួលបួល​ផង ស្រាប់តែ​ជនសង្ស័យ​ចាប់ខ្លួន​រុញ​ចូល​រថយន្ត​ដឹកចេញទៅ និង​បង្ខាំង​ទុក​ធ្វើ​ទារុណកម្ម​ជំរិត​ទារប្រាក់​៦​ពាន់​ដុល្លារ។

ករណី​ខាងលើនេះ ​ដំបូង​សមត្ថកិច្ច​នគរបាល​នាយកដ្ឋាន​ព្រហ្មទណ្ឌ បាន​ធ្វើការ​ឡោមព័ទ្ធ​ចាប់ខ្លួន​ជនជាតិ​ចិន​ចំនួន​១៥​នាក់ ដាក់​ដៃ​ខ្នោះ​រឹង​ក្រញង់​គ្រប់គ្នា ប៉ុន្តែ​នៅពេល​នាំទៅ​សាកសួរ មានតែ​៧​នាក់​ទេ​ ដែល​ពាក់​ពន្ធ​ករណី​បង្ខំ និង​ជំរិត​ទារប្រាក់ ចំណែក​៨​នាក់​ទៀត​នគរបាល​បាន​រាយការណ៍​ជូន​ស្ថាប័ន​អយ្យការ​អម​សាលាដំបូង​ថា ពេល​ចាប់​ស្ថិតក្នុង​រង្វង់​ប្រតិបត្តិការ មិន​មាន​ជាប់​ពាក់ព័ន្ធ​នឹង​បទល្មើស​ទេ ដូច្នោះ​តម្រូវ​ឲ្យ​ពួកគេ​វិល​ទៅវិញ​ហើយ៕



Source: Kampuchea Thmey Daily