មន្ត្រីម្នាក់នៃក្រុមចម្រុះដឹកនាំដោយអារ៉ាប៊ីសាអ៊ូឌីតដែលគាំទ្រពួកស្មោះស្ម័គ្របាននិយាយកាលពីថ្ងៃអង្គការថា កងទ័ពគាំទ្ររដ្ឋាភិបាលចំនួន១០នាក់ត្រូវបានសម្លាប់និង១៤៣នាក់បានរងរបួសក្នុងទីក្រុង Hodeida ចាប់តាំងពីបទឈប់បាញ់មួយចូលជាធរមានកាលពីសប្តាហ៍មុន។
វាជាលើកដំបូងហើយដែលក្រុមចម្រុះនិយាយថា កងកម្លាំងគាំទ្ររដ្ឋាភិបាលត្រូវបានសម្លាប់ចាប់តាំងពីបទឈប់បាញ់គ្នាដ៏ផុយស្រួយមួយបានចូលជាធរមាននៅថ្ងៃទី១៨ខែធ្នូ។
មន្ត្រីដែលនិយាយក្នុងលក្ខខណ្ឌមិនបញ្ចេញឈ្មោះរូបនេះក៏បានចោទប្រកាន់ក្រុមឧទ្ទាម Huthi ដែលមានទំនាក់ទំនងជាមួយប្រទេសអ៊ីរ៉ង់ថាបានរំលោភបំពានលើបទឈប់បាញ់នេះ១៨៣ដងនៅក្នុងនិងជុំវិញទីក្រុង Hodeida ផងដែរ។
លោកបាននិយាយថា “ក្រុមចម្រុះមិនបានសងសឹកហើយក៏មិនបានធ្វើការវាយប្រហារតាមអាកាសណាមួយឬបាញ់កាំភ្លើងធំដែរចាប់តាំងពីបទឈប់បាញ់គ្នាបានចាប់ផ្តើម”។
បទឈប់បាញ់ដែលជាលទ្ធផលនៃកិច្ចខិតខំប្រឹងប្រែងការទូតយ៉ាងខ្លាំងក្លាដឹកនាំដោយ UN គឺនៅតែមានការរង្គោះរង្គើខណៈភាគីទាំងពីរបានចោទប្រកាន់គ្នាទៅវិញទៅមកអំពីការបំពាន។
ឧត្តមសេនីយ៍ចូលនិវត្តន៍សញ្ជាតិហូឡង់លោក Patrick Cammaert កំពុងដឹកនាំគណៈកម្មាធិការរួមមួយដែលរួមមានទាំងសមាជិករដ្ឋាភិបាលនិងក្រុម Huthi ផងដែរដើម្បីត្រួតពិនិត្យមើលបទឈប់បាញ់នេះ។
លោក Cammaert បានទៅដល់ទីក្រុង Hodeida កាលពីថ្ងៃអាទិត្យពីរដ្ឋធានី Sanaa ដែលកាន់កាប់ដោយពួកឧទ្ទាមបន្ទាប់ពីលោកបានជួបជាមួយមន្ត្រីរដ្ឋាភិបាលនៅទីក្រុង Aden ។
ភាគីសង្គ្រាមយេមែនបានយល់ព្រមលើបទឈប់បាញ់ដើម្បីបញ្ឈប់ការវាយលុកដ៏បំផ្លិចបំផ្លាញមួយដោយកងកម្លាំងរដ្ឋាភិបាលនិងសម្ព័ន្ធមិត្តដឹកនាំដោយប្រទេសអារ៉ាប៊ីសាអ៊ូឌីតនៅទីក្រុង Hodeida អំឡុងកិច្ចចរចាសន្តិភាពក្នុងប្រទេសស៊ុយអែតនៅខែនេះ។
យោងតាមអង្គការសុខភាពពិភពលោកបានបង្ហាញថា មនុស្សប្រហែល១ម៉ឺននាក់ត្រូវបានសម្លាប់ចាប់តាំងពីក្រុមចម្រុះចូលធ្វើអន្តរាគមន៍ក្នុងឆ្នាំ២០១៥បើទោះបីជាក្រុមសិទ្ធិមនុស្សនិយាយថា ចំនួនអ្នកស្លាប់អាចកើនឡើងខ្ពស់ជាងនេះប្រាំដងក៏ដោយ៕ AFP
Source: Kampuchea Thmey Daily
0 Comments