បន្ទាយមានជ័យ ៖ ថ្មីៗនេះនៅចំណុចក្លិបកម្សាន្តហ្គោលថោន ស្ថិតនៅភូមិក្បាលស្ពាន សង្កាត់ព្រះពន្លា ក្រុងក្រុងសិរីសោភ័ណ ខេត្តបន្ទាយមានជ័យ បើកការប្រយុទ្ធគ្នារវាងយុវជន២ក្រុមបណ្តាលឲ្យស្លាប់ម្នាក់និងរបួសស្រាល២នាក់ ក្រោយពីសម្លាប់មនុស្សហើយជនដៃដល់ត្រូវបានកម្លាំងជំនាញព្រហ្មទណ្ឌ សហការជាមួយកម្លាំងអន្តរាគមន៍កងរាជអាវុធហត្ថខេត្ត ដឹកនាំដោយលោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌ ធ្វើការស្រាវជ្រាវឃាត់ខ្លួនជនសង្ស័យបានម្នាក់នៅវេលាម៉ោង២រសៀល ថ្ងៃទី២ ខែធ្នូ ឆ្នាំ២០១៨ នៅចំណុចក្លិបកំសាន្តហ្គោលថោន ស្ថិតនៅភូមិក្បាលស្ពាន សង្កាត់ព្រះពន្លា ក្រុងក្រុងសិរីសោភ័ណ ខេត្តបន្ទាយមានជ័យបានភ្លាមៗហើយបានបញ្ជូនមកទីបញ្ជាការកងរាជអាវុធហត្ថដើម្បីសាកសួរ។
លោកវរសេនីយ៍ឯក ម៉ែន ភិរម្យ បានឲ្យដឹងថា ជនសង្ស័យមានឈ្មោះ ស៊ុយ ឧត្តម ភេទប្រុស អាយុ១៨ឆ្នាំ រស់នៅភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។ លោកបានបញ្ជាក់ឲ្យដឹងទៀតថា តាមការបំភ្លឺរបស់សាក្សី បានឲ្យដឹងថា នៅថ្ងៃទី២ ខែធ្នូ ឆ្នាំ២០១៨ ជនរងគ្រោះ និងបក្សពួក ចំនួន២នាក់ បានចូលទៅលេងកម្សាន្តក្នុងក្លឹបកម្សាន្តហ្គោលថោន ហើយក៏មានរឿងជាមួយក្រុមផឹកស៊ីក្នុងក្លឹបមានគ្នាប្រមាណ ១០នាក់ បណ្តាលឲ្យជនរងគ្រោះឈ្មោះ លាង ឡេង ភេទប្រុស អាយុ២២ឆ្នាំ ស្លាប់នៅនឹងកន្លែងកើតហេតុតែម្តងក្រោយពីកើតហេតុកម្លាំងជំនាញបានចុះដល់កន្លែងកើតហេតុភ្លាមៗ និងឃាត់ខ្លួនបានជនសង្ស័យ ម្នាក់ យកមកសួរនាំនៅទីបញ្ជាការកងរាជអាវុធហត្ថខេត្ត។ បន្ទាប់ពីកម្លាំងជំនាញធ្វើការសាកសួរ ជនសង្ស័យបានសារភាពថា នៅយប់ថ្ងៃទី១ ខែធ្នូ ឆ្នាំ២០១៨ ខ្លួន និងបក្សពួក បាននាំគ្នាទៅផឹកស៊ីនៅក្លឹបកម្សាន្តហ្គោលថោន លុះដល់ម៉ោងប្រហែល ២ល្ងាចខែធ្នូ ឆ្នាំ២០១៨ ក្រុមខ្លួនក៏ផឹកស្រវឹងជោគ ហើយមានរឿងវាយតប់គ្នាជាមួយក្រុមផ្សេងទៀត មានគ្នា៣នាក់ ពេលនោះខ្លួនបានឃើញឈ្មោះ ហេង រតនា កំពុងប្រតាយប្រតប់គ្នាក្រុមខ្លួនបានយកវត្ថុចុងស្រួច ចាក់ទៅលើជនរងគ្រោះ បណ្តាលឲ្យជនរងគ្រោះដួល និងហូរឈាមយ៉ាងខ្លាំងនៅកន្លែងកើតហេតុបន្ទាប់ពីធ្វើសកម្មភាពរួច បក្សពួករបស់ខ្លួនបានរត់គេចខ្លួនអស់ នៅសល់តែខ្លួនម្នាក់ឯងត្រូវបានកម្លាំងកងរាជអាវុធហត្ថឃាត់ខ្លួនតែម្តង។ ចំណែកជនសង្ស័យផ្សេងទៀត កម្លាំងជំនាញកងរាជអាវុធហត្ថខេត្ត កំពុងបន្តស្រាវជ្រាវតាមចាប់ខ្លួនដើម្បីយកមកផ្តន្ទាទោសទៅតាមច្បាប់។ ផ្អែកលើចម្លើយសារភាពរបស់ជនសង្ស័យ អាចត្រូវចោទពីបទសម្លាប់មនុស្សកម្លាំងជំនាញបានកសាងសំណុំរឿងបញ្ជូនជនសង្ស័យ ទៅតុលាការ ដើម្បីចាត់ការទៅតាមនីតិវិធីច្បាប់៕
Source: Kampuchea Thmey Daily
0 Comments