តាកែវ ៖ មានហេតុការណ៍គ្រោះថ្នាក់ចរាចរណ៍មួយ បានកើតឡើងរវាងរថយន្តធុនធ្ងន់បុកជាមួយនឹងម៉ូតូឌ្រីមសង់បណ្តាលឲ្យប្រពន្ធអ្នកបើកបរម៉ូតូស្លាប់នៅនឹងកន្លែងគួរឲ្យរន្ធត់។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅថ្ងៃទី០៧ ខែធ្នូ ឆ្នាំ២០១៨ វេលាម៉ោង១៣និង១០នាទីរសៀល ស្ថិតនៅរង្វង់មូលអូចំបក់ ក្នុងភូមិប្រហូត សង្កាត់រកាក្រៅ ក្រុងដូនកែវ ខេត្តតាកែវ រវាងរថយន្តដឹកស្រូវធុនធ្ងន់ជាមួយនឹងម៉ូតូក្នុងទិសដៅខ្វែងគ្នា។
តាមការឲ្យដឹងពីប៉ូលិសក្រុងដូនកែវប្រាប់ថា រថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខព្រះសីហនុ 3A 2518 ដែលបើកបរដោយឈ្មោះ ថាន ប្រុស ភេទប្រុស អាយុ៣០ឆ្នាំ រស់នៅភូមិល្អាង ឃុំល្អាង ស្រុកដងទង់ ខេត្តកំពត។ ចំណែកភាគីម្ខាងទៀតបើកបរម៉ូតូម៉ាកហុងដាឌ្រីមសេ១២៥ស៊េរីឆ្នាំ២០១៤ ពណ៌ខ្មៅ ពាក់ស្លាក់លេខភ្នំពេញ 1GG 6197 ដែលអ្នកបើកបរមានឈ្មោះ ជ័យ សែន ភេទប្រុស អាយុ៤៥ឆ្នាំ រងរបួសស្រាល ចំណែកអ្នករួមដំណើរជាប្រពន្ធមានឈ្មោះ ឆល សុខុម អាយុ៤៣ឆ្នាំ បានស្លាប់នៅនឹងកន្លែងកើតហេតុ ដែលអ្នកទាំងពីររស់នៅភូមិធ្យា ឃុំលាយបូរ ស្រុកត្រាំកក់ ខេត្តតាកែវ។
ក្រោយកើតហេតុប៉ូលិសក្រុងដូនកែវបានចុះដល់ធ្វើការវាស់វែងនិងបាននាំយកមធ្យោបាយទាំងពីរគ្រឿងមករក្សាទុកនៅអធិការដ្ឋាននគរបាលក្រុងដើម្បីរង់ចាំដោះស្រាយគ្នានៅពេលក្រោយ ចំណែកសពស្ត្រីរងគ្រោះត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments