បន្ទាយមានជ័យ ៖ ទីតាំង កែច្នៃកាត់តរថយន្តអត់ពន្ធមួយកន្លែងកណ្តាលក្រុងសិរីសោភ័ណ ត្រូវបានព្រះរាជអាជ្ញារងអមសាលាដំបូងខេត្តបន្ទាយមានជ័យ ដឹកនាំកម្លាំងនគរបាល ចុះត្រួតពិនិត្យ បិទអាជីវកម្ម។
ការត្រួតពិនិត្យ បិទអាជីវកម្មនេះ ធ្វើឡើងកាលពីល្ងាចថ្ងៃទី២៥ ខែធ្នូ ឆ្នាំ២០១៨ ត្រង់ចំណុចទីតាំងធ្វើអាជីវកម្មផ្ទាល់ ស្ថិតនៅចន្លោះផ្លូវលេខ៧ និងផ្លូវលេខ៨ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ដឹកនាំដោយលោក សុក កែវបណ្ឌិត ព្រះរាជអាជ្ញារងអមសាលាដំបូងខេត្តបន្ទាយមានជ័យ និងលោកឧត្ដមសេនីយ៍ត្រី ចាប សុផាឬទ្ធិ ស្នងការរងប្រឆាំងបទល្មើសសេដ្ឋកិច្ច នៃស្នងការនគរបាលខេត្តបន្ទាយមានជ័យ។
លោកឧត្ដមសេនីយ៍ត្រី ចាប សុផាឬទ្ធិ ស្នងការរងប្រឆាំងបទល្មើសសេដ្ឋកិច្ច នៃស្នងការនគរបាលខេត្តបន្ទាយមានជ័យ បានឲ្យដឹងថា ទីតាំងអាជីវកម្មកាត់ត កែច្នៃរថយន្តអត់ពន្ធ ដែលត្រូវសមត្ថកិច្ចត្រួតពិនិត្យ អនុវត្តច្បាប់នេះជារបស់ឈ្មោះ សំ ប៊ុនធឿន ភេទប្រុស អាយុ៤០ឆ្នាំ បានបើកធ្វើអាជីវកម្មប្រហែល១ឆ្នាំមកហើយ។ ក្នុងការត្រួតពិនិត្យនេះ សមត្ថកិច្ចរកឃើញថា មានជាប់ពាក់ព័ន្ធនឹងបទល្មើស ២គឺ ទី១ កាត់តរថយន្តខុសលក្ខណៈបច្ចេកទេសដោយនាំយកក្បាល និងកន្ទុយរថយន្ត មកផ្សាផ្គុំគ្នាក្លាយជាទ្រង់ទ្រាយរថយន្ត ដែលការធ្វើបែបនេះអាចបង្កគ្រោះថ្នាក់ធ្ងន់ធ្ងរណាស់ដល់អ្នកប្រើប្រាស់រថយន្តប្រភេទនេះ។ និងទី២ វាក៏ជាបទល្មើសគេចពន្ធមួយដែរ ព្រោះក្បាលរថយន្តដែលគាត់នាំចូលមក គឺមិនមានការបង់ពន្ធនោះទេ ដូច្នេះរថយន្តដែលគាត់ផ្គុំឡើង គឺជារថយន្តគ្មានពន្ធ។
លោកបន្តថា ប្រតិបត្តិការត្រួតពិនិត្យនេះ សមត្ថកិច្ចរកឃើញវត្ថុតាមមួយចំនួនដូចជា - រថយន្តឡុចស៊ីស RX300 ពណ៌ខ្មៅកាត់ត ១គ្រឿង - រថយន្តឡុចស៊ីស RX300 ពណ៌បៃតងកំពុងកាត់ត ១គ្រឿង - រថយន្តតូយ៉ូតាកាមរីហាយព្រីត ពណ៌ទឹកមាស ផលិតឆ្នាំ២០០៧ ដាច់ជា២មិនទាន់តភ្ជាប់ ១គ្រឿង - ក្បាលរថយន្តតូយ៉ូតាព្រូស ពណ៌ខ្មៅ ១គ្រឿងគ្មានតួ និង សម្ភារៈពាក់ព័ន្ធនឹងការកាត់តតម្លើងរថយន្តមួយចំនួនទៀត។
លោកបញ្ជាក់ថា ជាបឋមទីតាំងនេះត្រូវបានកម្លាំងសមត្ថកិច្ច ធ្វើការបិតជាបណ្ដោះអាសន្នដើម្បីឲ្យម្ចាស់អាជីវកម្មចូលខ្លួនដោះស្រាយ ហើយករណីនេះ សមត្ថកិច្ច នឹងកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់៕
Source: Kampuchea Thmey Daily
0 Comments