អ្នកវាយប្រហារអត្តឃាតបានវាយលុកក្រសួងការបរទេសលីប៊ីនៅរដ្ឋធានីទ្រីប៉ូលីកាលពីថ្ងៃអង្គារដោយបានសម្លាប់មនុស្សយ៉ាងតិចបីនាក់រួមទាំងមន្ត្រីជាន់ខ្ពស់ម្នាក់ផងដែរនៅក្នុងការវាយប្រហារមួយដែលអះអាងដោយក្រុមជីហាដនិយមរដ្ឋឥស្លាម។
អាជ្ញាធរបាននិយាយថា មនុស្ស២១នាក់ផ្សេងទៀតបានរងរបួសនៅក្នុងការវាយប្រហារនេះ។
អ្នកនាំពាក្យកងកម្លាំងពិសេសលោក Tarak al-Dawass បាននិយាយថា គ្រាប់បែកក្នុងរថយន្តមួយបានផ្ទុះនៅក្បែរក្រសួងដែលជំរុញឲ្យកងកម្លាំងសន្តិសុខប្រញាប់ទៅកន្លែងកើតហេតុ។
គាត់បាននិយាយថា បន្ទាប់មក អ្នកបំផ្ទុះគ្រាប់បែកអត្តឃាតបានបំផ្ទុះខ្លួនឯងនៅជាន់ទីពីរនៃអគារខណៈដែលអ្នកវាយប្រហារទីពីរបានស្លាប់នៅពេលវ៉ាលីដែលគាត់កាន់បានផ្ទុះឡើង។
លោក Dawass បានបន្ថែមថា អ្នកវាយប្រហារទីបីដែលគ្មានអាវុធនិងពាក់អាវការពារគ្រាប់កាំភ្លើងគឺត្រូវបានសម្លាប់ដោយកងកម្លាំងសន្តិសុខនៅខាងក្រៅ។
យោងតាមក្រសួងសុខាភិបាលបានឲ្យដឹងថា មនុស្សយ៉ាងតិច៣នាក់ត្រូវបានសម្លាប់និង២១នាក់រងរបួស។
រដ្ឋមន្ត្រីការបរទេសលោក Tahar Siala បាននិយាយថា អ្នកស្លាប់ម្នាក់គឺជាអ្នកការទូតជាន់ខ្ពស់ឈ្មោះ Ibrahim al-Shaibi ដែលជាប្រមុខនាយកដ្ឋាននៅក្នុងក្រសួងរបស់គាត់។
ផ្សែងខ្មួលខ្មាញ់ត្រូវបានគេមើលឃើញហុយចេញពីអគារខណៈរថយន្តសង្គ្រោះបន្ទាន់ បុគ្គលិកពេទ្យនិងកងកម្លាំងសន្តិសុខបានប្រមូលផ្តុំគ្នានៅខាងក្រៅ។
ក្រុម IS បានអះអាងទទួលខុសត្រូវចំពោះការវាយប្រហារនេះនៅក្នុងសេចក្តីថ្លែងការណ៍មួយដែលត្រូវបានចែកចាយនៅលើបណ្តាញសង្គមដោយនិយាយថា វាត្រូវបានអនុវត្តឡើងដោយទាហានរដ្ឋកាលីហ្វ៣នាក់ដែលមានប្រដាប់ដោយខ្សែក្រវ៉ាត់អត្តឃាតនិងអាវុធស្វ័យប្រវត្តិ។
រដ្ឋមន្ត្រីក្រសួងមហាផ្ទៃលោក Fathi Bash Agha បានទទួលស្គាល់ក្នុងសន្និសីទសារព័ត៌មានមួយថា “ភាពវឹកវរផ្នែកសន្តិសុខបានឆាបឆេះឡើងនៅក្នុងប្រទេសលីប៊ីហើយមិនអាចគ្រប់គ្រងបានទេ”៕ AFP
Source: Kampuchea Thmey Daily
0 Comments