កុមារ​អន្តោប្រវេសន៍​ហ្គា​តេ​ម៉ា​ឡា​ទី​ពីរ​បាន​ស្លាប់​ក្នុង​ការ​ឃុំឃាំង​របស់​ស​ហ​រដ្ឋ​អាមេរិក

ភ្នាក់ងារ​គយ​និង​ការពារ​ព្រំដែន (CBP) បាន​និយាយ​ថា ជនអន្តោប្រវេសន៍​អាយុ​៨​ឆ្នាំ​ម្នាក់​មកពី​ប្រទេស​ហ្គា​តេ​ម៉ា​ឡា​ បាន​ស្លាប់​នៅ​ក្នុង​ការ​ឃុំ​ឃាំង​របស់​រដ្ឋាភិបាល​សហរដ្ឋអាមេរិក​កាលពី​ថ្ងៃ​អង្គារ​ដែល​នេះ​ជា​កុមារ​ទី​ពីរ​ហើយ​ដែល​បាន​ស្លាប់​ក្នុងការ​ឃុំឃាំង​របស់​អា​មេ​រិ​ក​នៅ​ខែ​នេះ។

ភ្នាក់ងារ​នេះ​បាន​និយាយថា ក្មេងប្រុស​ម្នាក់នេះ​ដែល​នៅ​ជាមួយ​ឪពុក​គឺ​ត្រូវបាន​បញ្ជូន​ទៅកាន់​មជ្ឈមណ្ឌល​វេជ្ជសាស្ត្រ New Mexico បន្ទាប់ពី​បានបង្ហាញ​សញ្ញា​ថា​មាន​ជំងឺ​កាលពី​ថ្ងៃ​ចន្ទ​។​

បុគ្គលិក​បានធ្វើ​រោគវិនិច្ឆ័យ​ឃើញថា កុមារ​រូបនេះ​មាន​ជំងឺ​ផ្តាសាយ​ប៉ុន្តែ​ក្រោយមក​បាន​រកឃើញ​មាន​ជំងឺ​គ្រុនក្តៅ​។ កុមារ​ត្រូវបាន​បញ្ជូន​ចេញពី​មជ្ឈមណ្ឌល​វេជ្ជសាស្ត្រ​នេះ​នៅពេល​ថ្ងៃត្រង់​ជាមួយ​វេជ្ជបញ្ជា​ឲ្យ​ទិញ​ថ្នាំ Ibuprofen និង​ថ្នាំ Antibiotic Amoxicillin​។​

ក្រោយមក​កុមារ​រូបនេះ​ត្រូវបាន​បញ្ជូន​ត្រលប់​ទៅ​មន្ទីរពេទ្យ​វិញ​បន្ទាប់ពី​មាន​សញ្ញា​នៃ​ការ​ចង្អោរ​និង​ក្អួត​ហើយ​បាន​ស្លាប់​ភ្លាមៗ​បន្ទាប់ពី​ពេល​ពាក់​កណ្តាលយប់​។​

CBP បាន​និយាយថា ខ្លួន​មិន​បង្ហាញ​មូលហេតុ​នៃ​ការស្លាប់​នោះទេ​ប៉ុន្តែ​នឹង​ធានា​នូវ​ការពិនិត្យ​ឡើងវិញ​ដោយ​ឯករាជ្យ​និង​ហ្មត់ចត់​នៃ​កាលៈទេសៈ​នេះ​។​

ស្របពេល​ជាមួយគ្នា​នោះ ប្រទេស​ហ្គា​តេ​ម៉ា​ឡា​បាន​អំពាវនាវ​ឲ្យ​អាជ្ញាធរ​អាមេរិក​ធ្វើការ​ស៊ើបអង្កេត​ច្បាស់លាស់​អំពី​ការស្លាប់​នេះហើយ​បន្ថែមថា “​របាយការណ៍​វេជ្ជសាស្ត្រ​ត្រូវបាន​ស្នើ​ឲ្យ​បញ្ជាក់​ពី​មូលហេតុ​នៃ​ការស្លាប់​របស់​កុមារ​រូបនេះ​”​។​

ការស្លាប់​របស់​ក្មេងប្រុស​រូបនេះ​បានកើត​ឡើង​នៅ​ថ្ងៃ​តែមួយ​ដែល​កុមារី Jakelin Caal ត្រូវបាន​គេ​បញ្ចុះ​។ កុមារី Jakelin Caal ដែលជា​ជនអន្តោប្រវេសន៍​ហ្គា​តេ​ម៉ា​ឡា​គឺ​បាន​ស្លាប់​នៅក្នុង​មន្ទីរឃុំឃាំង​អាមេរិក​ក្រោម​កាលៈទេសៈ​ដូចគ្នានេះ​កាលពី​ដើមខែ​នេះ​។​

សាកសព​របស់​នាង​ត្រូវបាន​គេ​ធ្វើ​មាតុភូមិនិវត្តន៍​កាលពី​ថ្ងៃអាទិត្យ​ហើយ​បន្ទាប់ពី​ការធ្វើដំណើរ​ដ៏​វែងឆ្ងាយ សាកសព​របស់​នាង​បាន​ទៅដល់​ភូមិ​ដាច់ស្រយាល​ដែលជា​កន្លែង​គ្រួសារ​របស់​នាង​រស់នៅ​។​
​
ការស្លាប់​របស់​នាង Jakelin Caal កាលពី​ថ្ងៃ​ទី​៨​ ខែធ្នូ ​បាន​បញ្ឆេះ​ឲ្យ​មាន​ការជជែក​ពិភាក្សាគ្នា​ជាថ្មី​នៅ​សហរដ្ឋអាមេរិក​ស្តីពី​គោលនយោបាយ​អន្តោប្រវេសន៍​និង​ការប្រព្រឹត្ត​លើ​ជន​ចំណាកស្រុក​៕ AFP

​

Source: Kampuchea Thmey Daily