ក្រសួងអប់រំ យុវជន និងកីឡា បានសម្រេចបង្កើនគណៈកម្មការ ដើម្បីចុះត្រួតពិនិត្យ និងដោះស្រាយបញ្ហាទីលាននៃកីឡដ្ឋានបាល់ទាត់ខេត្តកំពង់ឆ្នាំងហើយ ដោយលោកបណ្ឌិតសភាចារ្យ ហង់ ជួនណារ៉ុន រដ្ឋមន្ដ្រីក្រសួងអប់រំ យុវជន និងកីឡា បានចេញលិខិតឧទ្ទេសនាមបង្កើតក្រុមគណៈកម្មការជំនាញមួយ ដើម្បីចុះអន្តរាគមន៍បញ្ហាទីលានខាងលើ ដោយចាត់តាំងលោក ស សុខា រដ្ឋលេខាធិការក្រសួងអប់រំ ធ្វើជាប្រធានអមដោយអនុប្រធាន និងសមាជិកចំនួន ១១រូបផ្សេងទៀត។
យោងតាមលិខិតឧទ្ទេសនាមរបស់លោករដ្ឋមន្ដ្រីខាងលើ លោក ស សុខា នឹងត្រូវដឹកនាំគណៈកម្មការដើម្បីចុះត្រួតពិនិត្យ និងដោះស្រាយបញ្ហាកីឡដ្ឋានបាល់ទាត់ នៅខេត្តកំពង់ឆ្នាំង នាថ្ងៃទី១៤-១៥ ខែធ្នូ ឆ្នាំ២០១៨ចុងសប្ដាហ៍នេះ បន្ទាប់ពីរដ្ឋបាលខេត្ត បានចេញសេចក្ដីប្រកាសបញ្ឈប់មិនឲ្យមានការប្រកួតបាល់ទាត់ការហ្វឹកហាត់ និងការលេងកម្សាន្ដ ដើម្បីសុខភាពផ្សេងៗ នៅលើទីលាននេះ កាលពីថ្ងៃទី០៣ ខែធ្នូកន្លងទៅដែលកំពុងត្រូវបានមហាជនធ្វើការរិះគន់នាពេលបច្ចុប្បន្ន។
គួរបញ្ជាក់ថា កីឡដ្ឋានបាល់ទាត់ខេត្តកំពង់ឆ្នាំង ត្រូវបានរដ្ឋបាលខេត្ត ឯកភាពចេញសេចក្ដីប្រកាសបញ្ឈប់សកម្មភាពផ្សេងៗ ក្រោមមូលហេតុចម្បង ២យ៉ាង ទី១-ដើម្បីបង្ការ និងបញ្ចៀសនូវគ្រោះថ្នាក់ចរាចរណ៍ជាយថាហេតុ និងទី២-ជៀសវាងការរំខានដល់អង្គភាពនៅជុំវិញកីឡដ្ឋាន ក្នុងការបំពេញភារកិច្ចប្រចាំថ្ងៃ។
ដូច្នេះហើយទើបក្រសួងអប់រំ យុវជន និងកីឡា បង្កើតក្រុមគណៈកម្មការខាងលើឡើង ដើម្បីចុះត្រួតពិនិត្យនិងដោះស្រាយ។ ជាលទ្ធផលក្រោយបានប្រជុំពិភាក្សារវាងរដ្ឋបាលខេត្តកំពង់ឆ្នាំងនិងតំណាងក្រសួងអប់រំយុវជននិងកីឡា នៅព្រឹកថ្ងៃសុក្រ សប្តាហ៍នេះ បានសម្រេចចេញជាលទ្ធផល២ចំណុច ដោយក្នុងនោះទី១)តារាងមុខសាលាខេត្ត អនុញ្ញាតឲ្យប្រើប្រាស់តែកម្មវិធីកីឡាថ្នាក់ជាតិ ឬកម្មវិធីធំៗ តែប៉ុណ្ណោះ។ ដោយឡែក ការហាត់សម ឬលេងល្មមៗ ប្រើប្រាស់ទីលានផ្សេងមួយទៀត។ ទី២)តារាងមុខសាលាខេត្ត រៀបចំដាក់សំណាញ់ ព័ទ្ធជុំវិញ កុំឲ្យបាល់ចេញក្រៅ បង្កជាគ្រោះថ្នាក់ផ្សេងៗ ដោយ យថាហេតុ៕
Source: Kampuchea Thmey Daily
0 Comments