បាត់ដំបង ៖ យុវជនម្នាក់ដែលមានមុខងារជា បុគ្គលិកក្រុមហ៊ុន ថ្នាំលាបអ៊ុយ ៩០ បានរងរបួសយ៉ាងធ្ងន់ធ្ងរ ព្រមទាំងបានបញ្ជូនទៅកាន់មន្ទីរពេទ្យដើម្បីសង្គ្រោះផងដែរ បន្ទាប់ពីត្រូវរថយន្តបើកបរមិនប្រកាន់ស្តាំ មកបុកស្ទើរតែមិនដឹងខ្លួន។
ហេតុការណ៍ នៃករណីគ្រោះថ្នាក់ចរាចរណ៍នេះ បានកើតឡើង នៅវេលាម៉ោង២និង៤០នាទី រសៀល ថ្ងៃទី៤ ខែធ្នូ ឆ្នាំ ២០១៨ ត្រង់ចំណុចភូមិអន្លង់វិល ឃុំអន្លង់វិល ស្រុកសង្កែ ខេត្តបាត់ដំបង លើកំណាត់ផ្លូវជាតិលេខ ៥ ដែលផ្លូវមានសភាពកោង ផងដែរ រវាងរថយន្ត មនិងម៉ូតូ។
បើតាមប្រភពនៅទីនោះបានឲ្យដឹងថា នៅមុនពេលកើតហេតុ គឺមាន រថយន្តម៉ាកហាយឡិនឌ័រ ពណ៌ស ពាក់ស្លាកលេខ ភ្នំពេញ 2AP7442 ដែលបើកបរដោយ កូនមន្ត្រីប៉ូលិសច្រកទ្វារអន្តរជាតិដូង បានធ្វើដំណើរ ពីកើត ទៅលិច តាមបណ្តោយផ្លូវជាតិលេខ ៥ ដោយឪពុកបានបើករថយន្តមួយគ្រឿងផ្សេងទៀត។
ប្រភពដដែលបានបន្តថា លុះដល់ត្រង់ចំណុច កើតហេតុខាងលើ បានបុកនិងម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខ បាត់ដំបង 1B-5137 បើកបរដោយឈ្មោះ សម គឹមសឿន ភេទប្រុស អាយុ ២៨ ឆ្នាំ មានមុខងារជា បុគ្គលិកថ្លាំលាបអ៊ុយ៩០ ស្នាក់នៅភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង បណ្តាលឲ្យរបួសធ្ងន់ និងបានបញ្ជូនទៅមន្ទីរពេទ្យអ៊ីមេចិនស៊ី ដើម្បីសង្គ្រោះ។
តាមការសារភាពពីភាគីរថយន្ត នៅចំពោះមុខសមត្ថកិច្ចគេបានបញ្ជក់ថា ការប៉ះទង្គិចគ្នា ក្នុងទិសដៅច្រាស់គ្នានេះ គឺមកពីខាងភាគីម៉ូតូឡើងជែងមិនប្រយ័ត្នបានមកបុកនឹងក្បាលរថយន្តរបស់គេ ដូច្នេះកំហុសគឺខាងម៉ូតូជាអ្នកប្រព្រឹត្ត។
ប៉ុន្តែតាមការសិក្សារបស់លោកអធិការរង ជា វណ្ណឌី ដែលបានវិភាគនៅកន្លែងកើតហេតុ បានបញ្ជាក់ថា រថយន្តទេដែលជាអ្នកបង្ក ព្រោះបានឡើងជែងគ្មានការប្រុងប្រយ័ត្ន ដូច្នេះបច្ចុប្បន្ន រថយន្ត និង ម៉ូតូ បានយកទៅរក្សាទុកនៅអធិការនគរបាលស្រុកសង្កែជាបណ្តោះអាសន្នហើយ រង់ចាំដោះស្រាយជាក្រោយ៕
Source: Kampuchea Thmey Daily
0 Comments