ភ្នំពេញ ៖ ប្រជាពលរដ្ឋនៅភូមិមួយចំនួន ក្នុងសង្កាត់ព្រែកថ្មី ខណ្ឌច្បារអំពៅ ជាពិសេសភូមិព្រែកថ្មីមានការព្រួយបារម្ភយ៉ាងខ្លាំងអំពីបញ្ហាសេចក្តីសុខសុវត្ថិភាព ផ្ទាល់ខ្លួនពោលគឺភាពអសន្តិសុខនៅភូមិតែម្ដង មានដូចជា ចោរលួច ឆក់ ប្លន់ គ្រឿងញៀន និងក្មេងទំនើង និងល្បែងស៊ីសងជាដើម ហើយពួកគាត់ទាមទារឲ្យលោកមេប៉ុស្តិ៍ព្រែកថ្មី និងអធិការខណ្ឌច្បារអំពៅ មេត្តាជួយមានវិធានការផង។
ប្រភពខាងលើបន្តថា បច្ចុប្បន្នក្រុមក្មេងទំនើងនៅក្នុងភូមិព្រែកថ្មី សង្កាត់ព្រែកថ្មី កំពុងដើរអុកឡុករាតត្បាតលួច ឆក់ ប្លន់ និងគ្រឿងញៀនពេញបន្ទុក ដែលធ្វើឲ្យពួកគាត់ព្រួយបារម្ភយ៉ាងខ្លាំងស្ទើរតែមិនហ៊ានដេកពួនទេ។
ក្រុមប្រជាពលរដ្ឋបន្តថា រាល់ថ្ងៃនេះ របស់របរផ្សេងៗ សត្វមាន់ ទា ជ្រូក គោ ក៏ក្រុមនេះលួចគ្មានសល់ដែរ រហូតមានដល់ករណីប្លន់សម្លាប់ទៀតផង ហើយសូម្បីតែទុយយោបូមទឹកដែលពួកគាត់តបាញ់ទឹកស្រោចបន្លែនៅចម្ការ ឬទុយយោបូមខ្សាច់ ក៏ពួកចោរហារយក្នុងភូមិប្រមូលលួចយកទៅវាយបំបែកលក់អេតចាយខ្ទេចខ្ទីដែរ ដើម្បីយកលុយទៅទិញគ្រឿងញៀនជក់។ រីឯល្បែងស៊ីសងវិញកើតឡើងពេញបន្ទុកតែម្ដង មានដូចជា បៀរ អាប៉ោង និងជល់មាន់ក៏មានដែរ គេអះអាងថា បានសែនព្រេនឲ្យអាជ្ញាធរ និងសមត្ថកិច្ចរួចរាល់ហើយ។
ជាមួយគ្នានោះ ពេលមានចោរលួច ឆក់ម្តងៗ ពួកគាត់ទៅប្តឹងប៉ូលិសប៉ុស្តិ៍ព្រែកថ្មី ដោយប៉ូលិសសួររកភស្តុតាង និងសួររកភិនភាគចោរ ហើយមិនទទួលពាក្យបណ្ដឹងនោះទេ ធ្វើឲ្យពួកគាត់រស់នៅក្នុងភាពភ័យខ្លាច និងអស់ជំនឿទៅលើសមត្ថកិច្ចប៉ុស្តិ៍ព្រែកថ្មីយ៉ាងខ្លាំង។
ប្រការនេះ បញ្ជាក់ថា មេប៉ុស្តិ៍ព្រែកថ្មី លោក ម៉ៅ ស៊ីវន ដែលទើបមកកាន់តំណែងថ្មីៗនេះ និងលោក អេម សារ៉ាវុធ អធិការខណ្ឌច្បារអំពៅ អសមត្ថភាពក្នុងការការពារសន្តិសុខសុវត្ថិភាពជូនប្រជាពលរដ្ឋនៅក្នុងមូលដ្ឋាន ដែលផ្ទុយស្រឡះពីបទបញ្ជារបស់សម្ដេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ដែលលោកតែងតែណែនាំឲ្យកងកម្លាំងថ្នាក់មូលដ្ឋានចូលរួមអនុវត្តនូវគោលនយោបាយភូមិ/ឃុំមានសុវត្ថិភាពទាំង៩ចំណុច។
ប្រជាពលរដ្ឋនៅសង្កាត់ព្រែកថ្មីទាំងអស់ បានធ្វើការសំណូមពរទៅមន្ត្រីពាក់ព័ន្ធទាំងអស់ ពិសេស គណៈបញ្ជាការឯកភាពខណ្ឌច្បារអំពៅ ជួយអន្តរាគមន៍ ឬមានវិធានការចំពោះភាពអសន្តិសុខ នៅក្នុងសង្កាត់ព្រែកថ្មីនេះ ដើម្បីឲ្យពួកគាត់រស់នៅដោយមិនមានភាពភ័យខ្លាចតទៅទៀត៕
Source: Kampuchea Thmey Daily
0 Comments