កំពង់ឆ្នាំង ៖ មន្ត្រីសាខាកាំកុងត្រូលខេត្តកំពង់ឆ្នាំង នៅថ្ងៃទី០៦ ខែធ្នូ ឆ្នាំ២០១៨ បានចុះត្រួតពិនិត្យលើទំនិញ មានត្រីងៀត ងៀតបបែល អាហារកំប៉ុង និង ទំនិញជាច្រើនមុខទៀត នៅក្នុងផ្សារពន្លៃ ស្រុកបរិបូណ៌ ដើម្បីធានាបាននូវសុវត្ថិភាពចំណីអាហារ ក្នុងការប្រើប្រាស់ និងការបរិភោគប្រចាំថ្ងៃ មានគុណភាពល្អ សម្រាប់សុខភាពប្រជាពលរដ្ឋ។
លោក យីវ ណារិន ប្រធានសាខាកាំកុងត្រូល ខេត្តកំពង់ឆ្នាំង បានអោយដឹងថា ៖ ក្រោយការត្រួត ពិនិត្យ លើមុខទំនិញដែលកំពុងដាក់តាំងលក់នៅផ្សារពន្លៃ ស្រុកបរិបូរណ៍ យើងបានរកឃើញថា ជាទំនិញដែលបានត្រួតពិនិត្យទាំងអស់គឺមានគុណភាព និង សុវត្ថិភាពល្អសម្រាប់ប្រើប្រាស់។ ចំពោះការពិនិត្យបែបនេះ គឺធ្វើឡើងក្នុងគោលបំណងរកមើលសុពលភាពរបស់ទំនិញដែលកំពុងដាក់លក់អោយប្រជាពលរដ្ឋប្រើប្រាស់ប្រចាំថ្ងៃ និងបានធ្វើតេស្តរកមើលសារធាតុគីមី ហាមឃាត់ នៅក្នុងត្រីងៀត ឬបន្លែ និងក្រោយពីបានធ្វើតេស្ត នៅមុខទំនិញទាំងអស់នេះ បានបង្ហាញថា ទំនិញទាំងអស់នេះ ជាទំនិញដែលមានគុណភាពល្អគ្មានសារធាតុគីមីនោះទេ ទាំងនៅលើបន្លែនិង ត្រីងៀត។
លោកប្រធានសាខាបានអោយដឹងទៀតថា ៖ តាមរយៈការចុះអប់រំផ្សព្វផ្សាយ ដល់អាជីវករកន្លងមក ឃើញថា ក្រុមអាជីវករមានការយល់ដឹងច្រើន ការដាក់លក់ទំនិញតាមទីផ្សារ គឺមានគុណភាពនិង មានអនាម័យល្អ។ ជាមួយគ្នានេះ មន្ត្រីជំនាញក៏បាន អំពាវនាវដល់អាជីវករទាំងអស់ ត្រូវយល់ដឹងអំពីសុវត្ថិភាពចំណីអាហារដែលយកទៅដាក់លក់ឲ្យប្រជាពលរដ្ឋ យកទៅប្រើប្រាស់ ឬ បរិភោគ។ ដោយបានណែនាំអោយអាជីវករ បញ្ឈប់សកម្មភាព យកទំនិញដែលខូចគុណភាពលក់ឱ្យប្រជាពលរដ្ឋ ព្រោះធ្វើអោយប៉ះពាល់ដល់សុខភាពប្រជាពលរដ្ឋ និងអ្នកលក់ក៏ត្រូវប្រឈមនឹងការទទួលខុសត្រូវចំពោះមុខច្បាប់ផងដែរ៕
Source: Kampuchea Thmey Daily
0 Comments