ភ្នំពេញ ៖ រដ្ឋមន្ត្រីក្រសួងកិច្ចការនារីមាន សុទិដ្ឋិនិយមចំពោះការរីកចម្រើនសេដ្ឋកិច្ចនៅកម្ពុជា ក្រោមការដឹកនាំរបស់រាជរដ្ឋាភិបាលនៃព្រះរាជាណាចក្រកម្ពុជា បានធ្វើអោយអ្នកវិនិយោគិនបានចូលមកបណ្តាក់ទុនរកស៊ីជាច្រើន។ ដោយមើលឃើញនូវសក្តានុពលសេដ្ឋកិច្ចកម្ពុជានិងកត្តាសន្តិភាពនេះហើយ មានក្រុមហ៊ុនជាច្រើនទាំងនៅក្នុងស្រុកក្រៅស្រុកបានបើកហាងលក់នៅក្នុងផ្សារទំនើបនៅទីក្រុងភ្នំពេញ។
លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារីរួមជាមួយស្ថានទូតដាណាម៉ាកនិងតំណាងសម្ព័ន្ធសហគ្រាសចំរុះកាណាឌីយ៉ារួមជាមួយភ្ញៀវកិត្តិយសជាច្រើនបានសម្ពោធហាងសាខាទី៥ស្ថិតនៅផ្សារទំនើបអ៊ីអនសែនសុខកាលពីថ្ងៃទី6ខែធ្នូឆ្នាំ២០១៨។
លោកធារី ទៀ នាយកប្រតិបត្តិបានបញ្ជាក់ថា គោលបំណងនៃការវិនិយោគរបស់សម្ព័ន្ធសហគ្រាសចំរុះកាណាឌីយ៉ាកំពុងឈានចូលទៅក្នុងទីផ្សារលក់រាយនិងចែកចាយនូវផលិតផលឧស្សាហកម្មក្នុងប្រទេសកម្ពុជាដែលសម្ព័ន្ធសហគ្រាសចំរុះនេះ បានស្រូបយកនូវបុគ្គលិកប្រមាណ1ម៉ឺននាក់នូវវិស័យការងារជាច្រើននោះ។
លោកនាយកប្រតិបត្តិបន្តថា ប្រទេសកម្ពុជានឹងក្លាយជាឱកាសដល់អ្នកបណ្តាក់ទុននៅក្រៅប្រទេសចូលមកដាក់ទុនវិនិយោគដើម្បីបង្កើនកម្លាំងសេដ្ឋកិច្ចក៏ដូចជាបង្កើនការងារដល់បុគ្គលិកនិងប្រាក់ចំណូលដល់ក្រុមគ្រួសារជូនទៅដល់ពលរដ្ឋកម្ពុជាផងដែរ៕
Source: Kampuchea Thmey Daily
0 Comments